ގެނބިގެން މަރުވާ ފަތުރުވެރިން އިތުރުވާތީ ސަމާލުވާން އިލްތިމާސްކޮށްފި
މޫދާ ގުޅުންހުރު އެކި ހަރާކާތްތައް ކުރިއަށް ގެންދާއިރު އަޅަން ޖެހޭ ހުރިހާ ސަލާމަތީ ފިޔަވަޅުތައް އަޅަން އިލްތިމާސްކުރި
ރާއްޖޭގެ ރިސޯޓެއް
މޫދަށް އެރި އުޅުމުގެ ތެެރޭގައި ފަތުރުވެރިން ގެނބިގެން މަރުވާ ހާދިސާތައް އިތުރުވާތީ އެކަމަށް ސަމާލުވުމަށް ޓޫރިޒަމް މިނިސްޓްރީން އިލްތިމާސްކޮށްފިއެވެ.
އެ މިނިސްޓްރީން އަންގާރަ ދުވަހު ރާއްޖޭގެ ހުރިހާ ޓޫރިސްޓް ފެސިލިޓީތަކަށް ފޮނުވާފައިވާ ސާކިއުލާގައި ބުނެފައިވަނީ މޫދާ ގުޅުންހުރި އެކި ހަރަކާތްތަކުގައި ފަތުރުވެރިން މަރުވާ ހާދިސާތައް އިތުރުވަމުންދާތީ ހުރިހާ ފެސިލިޓީއަކުން ވެސް އެކަމަށް ސަމާލުކަން ދޭން ޖެހޭ ކަމަށެވެ. އެގޮތުން، ސްވިމިން އާއި ސްނޯކްލިން އާއި ޑައިވިންގ ފަދަ މޫދާ ގުޅުންހުރު އެކި ހަރާކާތްތައް ކުރިއަށް ގެންދާއިރު އަޅަން ޖެހޭ ހުރިހާ ސަލާމަތީ ފިޔަވަޅުތައް އަޅައިގެން އެ ހަރަކާތްތައް ހިންގުމަށް ވަނީ ނަސޭހަތްތެރިވެފައެވެ.
ޓޫރިޒަމް މިނިސްޓްރީން ބުނެފައިވާ ގޮތުގައި މިފަދަ ހާދިސާތަކުން ރައްކާތެރިވެ ތިބުމަށް މޫދުގެ އެކި ހަރަކާތްތައް ހިންގުމުގެ ކުރިން ރައްކާތެރިކަމުގެ އާންމު މައުލޫމާތާއި، ތަފްސީލީ މައުލޫމާތު ފަތުރުވެރިންނާ ހިއްސާކުރުމަކީ ކޮންމެހެން ސަމާލުކަންދޭންވީ ކަމެކެވެ. އަދި މޫދާ ގުޅުންހުރި އެކި ހަރާތްތައް ހިންގުމުުގައި އުޅޭ މުވައްޒަފުން ތަމްރީނުކުރުމާއި، އިތުރަށް ސަމާލުކަން ދިނުމަށް އިލްތިމާސްކޮށްފައިވާއިރު މުވައްޒަފުން ރައްކާތެރިކަމުގެ ފިޔަވަޅުތައް އެޅުމަށް އިތުރަށްް ހޭލުންތެރިކުރުމާއި، ރައްކާތެރިކަމާ ގުޅުންހުރި ޓްރޭނިންތައް އާންމުކޮށް ހިންގުމަށް ވެސް ވަނީ އިލްތިމާސްކޮށްފައެވެ.
ރާއްޖޭގައި އޮޕަރޭޓް ކުރާ ހުރިހާ ޓޫރިސްޓް ފެސިލިޓީތަކަށް ޓޫރިޒަމް މިނިސްޓްރީން މި ސާކިއުލާ ފޮނުވާފައިވާއިރު މި މަހުގެ ތެރޭގައި އެކަނިވެސް މޫދަށް ގޮސް އުޅުމުގެ ތެރޭގައި ތިން ފަތުރުވެރިއަކު ވަނީ މަރުވެފައެވެ. ފުލުހުން ބުނެފައިވާ ގޮތުގައި މި ތިން ހާދިސާވެސް ހިނގާފައިވަނީ އއ. އަތޮޅުގައެވެ.
މި މަހުގެ ފުރަތަމަ ހާދިސާ ހިނގާފައިވަނީ ފަސް ވަނަ ދުވަހުއެވެ. އެގޮތުން މި މަހުގެ ފަސް ވަނަ ދުވަހު އއ. ކުރަމަތި ރިސޯޓުގައި މޫދަށް އެރުނު ފަތުރުވެރިއަކު މަރުވެފައިވާއިރު، މި ހަފްތާގެ ހޯމަ ދުވަހާއި އަންގާރަ ދުވަހު ވެސް ދެ ފަތުރުވެރިން ވަނީ މަރުވެފައެވެ.
