ގއ.ކޮލަމާފުށީގައި ޕްރިންޓް ކުރުމަށް ބޭނުން ކުރާ އިމާރާތެއްގައި ރޯވި އަލިފާން ނިއްވާލައިފިއެވެ.

ފުލުހުން ބުނީ ކޮލަމާފުށީގައި ޕްރިންޓް ކުރުމަށް ބޭނުންކުރާ ތަނެއްގައި އަލިފާނުގެ ހާދިސާއެއް ހިނގައިގެން އުޅޭތީ އަލިފާން ނިއްވުމުގެ މަސައްކަތް ފުލުހުންނާއި ރަށު ރައްޔިތުން ގުޅިގެން މިއަދު މެންދުރު ކޮށްފައިވާ ކަމަށެވެ.

ރައްޔިތުންނާއި ފުލުހުން ގުޅިގެން ކުރި މަސައްކަތުން އަލިފާން ނިއްވާލެވިފައިވާކަމަށް ފުލުހުން ބުނެއެވެ. އަދި މި ހާދިސާގައި އެއްވެސް މީހަކަށް އަނިޔާލިބިފައި ނުވެއެވެ. ނަމަވެސް އެ އިމާރާތަށް ވަނީ ބޮޑެތި ގެއްލުންތަކެއް ވެފައެވެ.

ފުލުހުން ބުނީ އަލިފާނުގެ ހާދިސާއާއި ގުޅިގެން ބަލަންޖެހޭ ކަންކަން ފުލުހުން ބަލަމުންދާ ކަމަށެވެ.