ސްޕޯޓްސް އެވޯޑްގެ ތަރިއަކީ އިޓަލީގެ ކަނަވާރޯ

ބުރާސްފަތި ދުވަހުގެ ރޭ ބާއްވާ މޯލްޑިވްސް ސްޕޯޓްސް އެވޯޑްސްގައި ދުނިޔޭގެ ކުރީގެ އެންމެ މޮޅު ކުޅުންތެރިޔާ ފަބިއޯ ކަނަވާރޯ ބައިވެރިވާނެކަން ކުޅިވަރާ ބެހޭ މިނިސްޓްރީން އިއުލާނުކޮށްފި އެވެ.

އިޓަލީ އަށް 2006 ވަނަ އަހަރުގެ ވޯލްޑްކަޕް ކާމިޔާބުކޮށްދިން ތަޖުރިބާކާރު ޑިފެންޑަރު އަދި ކެޕްޓަން ކަނަވާރޯ އަކީ ދުނިޔޭގެ މޮޅު ކުޅުންތެރިޔާގެ މަގާމާއި ބެލޮންޑީއޯ އެވޯޑް ހޯދި ހަމައެކަނި ޑިފެންޑަރެވެ.

އިޓަލީގެ ގައުމީ ޓީމަށް 136 މެޗު ކުޅެދީފައިވާ އިޓަލީގެ ޔުވެންޓަސް އާއި އިންޓަމިލާން އަދި ސްޕޭނުގެ ރެއާލް މެޑްރިޑަށް ވެސް ކުޅެފަ އެވެ. ކުޅުން ހުއްޓާލުމަށްފަހު އޭނާ އަކީ މިހާރު އިޓަލީގެ ބެނެވެންޓޯގެ ކޯޗެވެ.

ސްޕޯޓްސް އެވޯޑް ހަފުލާގައި ބައިވެރިވުމަށް އިނގިރޭސި ކުރީގެ ގައުމީ ކީޕަރު ޑޭވިޑް ޖޭމްސް މިއަދު ހެނދުނު ވަނީ މާލެ އައިސްފަ އެވެ. އޭނާ އަށް ވެލާނާ އިންޓަނޭޝަނަލް އެއާޕޯޓުން މަރުހަބާ ވިދާޅުވީ ކުޅިވަރާ ބެހޭ ވަޒީރު އަހުމަދު މަހުލޫފެވެ. އަދި ޖޭމްސްގެ ޝަރަފުގައި ހާއްސަ ސަގާފީ އައިޓަމްތަކެއް ބޭއްވި އެވެ.

އޭނާގެ އިތުރުން ކުޅިވަރުގެ ބައިނަލްއަގްވާމީ ތަރިން މި ހަފުލާގައި ބައިވެރިވާނެ އެވެ. އޭގެ ތެރޭގައި ތަޖުރިބާކާރު ބެޓްސްމަން ބްރަޔަން ލާރާ އާއި ނައިޖީރިއާގެ ކުޅިވަރާ ބެހޭ ވަޒީރު ސަންޑޭ އަކިންޑާރޭ ވެސް ބައިވެރިވެވަޑައިގަންނަވާނެ ކަމަށް ކުޅިވަރާ ބެހޭ މިނިސްޓްރީން ބުނެ އެވެ.