ސިޔާސީ ޕާޓީތަކަށް ވަންނަ ފޯމު އޮންލައިންކޮށް ހުށަހެޅޭ ގޮތް ހަދައިފި
ސިޔާސީ ޕާޓީގައި ދަފުތަރުކުރުމަށް "ސިމެދަ" ޕޯޓަލް މެދުވެރިކޮށް އޮންލައިންކޮށް މިހާރު ހުށަހެޅޭނެ
އިލެކްޝަންސް ކޮމިޝަން
ސިޔާސީ ޕާޓީގެ މެންބަރަކަށް ވުމަށް އެދޭ ފޯމުތައް އޮންލައިންކޮށް ހުށަހެޅޭ ގޮތަށް ސިޔާސީ ޕާޓީގެ ގަވާއިދަށް އިސްލާހު ގެނެސްފިއެވެ.
ހޯމަ ދުވަހު ގެޒެޓުކޮށްފައިވާ ސިޔާސީ ޕާޓީގެ ގަވާއިދަށް ފަސް ވަނަ އިސްލާހު ގެނައުމުގެ ގަވާއިދުގައި ވަނީ ދެ އަކުރެއް ވަނީ އިތުރުކޮށްފައެވެ. އެގޮތުން ސިޔާސީ ޕާޓީގައި ދަފުތަރުކުރުމަށް "ސިމެދަ" ޕޯޓަލް މެދުވެރިކޮށް އޮންލައިންކޮށް މިހާރު ހުށަހެޅޭއިރު ޕާޓީގެ މެންބަރަކަށް ވުމަށް އެދޭ ފޯމުތައް، ސިޔާސީ ޕާޓީތަކުން ދިހަ އަހަރުވަންދެން ބަލަހައްޓަން ޖެހޭނެއެވެ. އަދި "ސިމެދަ" ޕޯޓަލް މެދުވެރިކޮށް ފޯމު ހުށަނޭޅޭ ހާލަތެއް މެދުވެރިވެއްޖެނަމަ، އީސީއަށް ފޯމު ހުށަހެޅޭނެ ކަމަށް ވެސް ވަނީ ބުނެފައެވެ.
ގަވާއިދު އިސްލާހު ކުރުމުގެ ކުރިން ފޯމުތައް ރައްކާ ކުރުމުގެ ޒިންމާ ނަގަން ޖެހެނީ އީސީ އިންނެވެ. އަދި ފޯމު ހުށަހަޅަން ޖެހެނީ އީސީއަށެވެ.
މި ގަވާއިދުގައި ބުނެފައިވާ ގޮތުން ކޮންމެ ޕާޓީއަކަށް ވެސް މެންބަރުން ވެއްދުމަށް އީސީން ކަނޑައަޅާފައިވާ ފޯމެޓަށް އެ ޕާޓީއަކުން ފޯމެއް ތައާރަފު ކުރަން ޖެހޭނެއެވެ. އެ ފޯމު އޮންލައިންކޮށް ހުށަހަޅާއިރު އީސީން ކަނޑައަޅާފައިވާ ހުރިހާ މައުލޫމާތެއް ފުރިހަމަވާން ޖެހޭނެ ކަމަށާއި ހާއްސަކޮށް އިނގިލީގެ ނިޝާން އީސީއިން ގަބޫލުކުރެވޭ ފެންވަރަކަށް ފެންނަން ހުންނަންވާނެ ކަމަށްވެސް ވަނީ ބުނެފައެވެ.
މެންބަރުންގެ ގޮތުގައި ދަފުތަރު ކުރުމަށް ސިޔާސީ ޕާޓީތަކުން "ސިމެދަ" ޕޯޓަލް މެދުވެރިކޮށް ހުށަހަޅާ ފޯމު އީސީގެ ދަފުތަރުގައި ހިމެނުމުގެ ކުރިން، އެ ފޯމަކީ ސައްހަ ފޯމެއްކަން ކަށަވަރުކުރުމަށްޓަކައި ފޯމާ ގުޅޭ ގޮތުން އެއްވެސް ޝަކުވާއެއް އޮތްނަމަ، އެ ޝަކުވާއެއް ހުށަހެޅުމުގެ ފުރުސަތު ހުޅުވާލާނެއެވެ.
