ކ. މާލެ
|
13 މާރޗް 2023 | ހޯމަ 15:02
މާލޭގެ މަޖީދީމަގު
މާލޭގެ މަޖީދީމަގު
ރާއްޖެއެމްވީ
އެއްގަމު އުޅަނދު ރަޖިސްޓްރީ ކުރުމުގެ މައްސަލަ
ގިނަ އަދަދެއްގެ އެއްގަމު އުޅަނދުގެ ރަޖިސްޓްރީއާމެދު ސުވާލު އުފެދުމާ ގުޅިގެން ވެހިކަލްތަކުގެ ވެރިން މިނިސްޓްރީއަށް ހާޒިރުވުމަށް އަންގައިފި
 
ރަޖިސްޓްރީ އަސްލުކަމަށް ވެރިފަރާތަށް ލިބިފައިވާ ލިޔެކިއުންތައް ގެންދަން ޖެހޭ
 
7 ދުވަސް ތެރޭގައި މިނިސްޓްރީއަށް ހާޒިރުވާން ޖެހޭ

ގިނަ އަދަދެއްގެ އެއްގަމު އުޅަނދުގެ ރަޖިސްޓްރީއާމެދު ސުވާލު އުފެދުމާއި ގުޅިގެން ވެހިކަލްތަކުގެ ވެރިން މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނަށް ހާޒިރުވުމަށް އަންގައިފިއެވެ.

އާދިއްތަ ދުވަހު ޓްރާންސްޕޯޓް މިނިސްޓްރީން ކޮށްފައިވާ އިއުލާނެއްގައި ބުނެފައިވަނީ 50 އެއްގަމު އުޅަނދު ރަޖިސްޓްރީ ކުރުމުގެ ގަވާއިދާއި ޚިލާފަށް ސައްޙަނޫން ލިޔެކިޔުންތަކެއް ބޭނުންކޮށްގެން އުފައްދާފައިވާ ރަޖިސްޓްރީގެ ނަކަލުތަކެއް ކަމަށް ބެލެވޭ ކަމަށެވެ. އެހެންކަމުން އިތުރު މައުލޫމާތު ސާފުކުރަން ބޭނުންވާ ކަމަށް މިނިސްޓްރީން ބުނެފައިވެއެވެ.

ރަޖިސްޓްރީއާ މެދު ސުވާލު އުފެދިފައިވާތީ، ރަޖިސްޓްރީ އަސްލުކަމަށް ވެރިފަރާތަށް ލިބިފައިވާ ލިޔެކިޔުންތަކާއެކު އުޅަނދުގެ ވެރިފަރާތުން އާދިއްތަ ފެށިގެން 7 ދުވަހުގެ ތެރޭގައި މިނިސްޓްރީއަށް އައުމަށް އެދިފައިވެއެވެ.

ގިނަ އަދަދެއްގެ ވެހިކަލް ރަޖިސްޓްރީއާ މެދު ސުވާލު އުފެދިފައިވާއިރު، ވެހިކަލް ރަޖިސްޓްރީ ކުރުމާއި ލައިސަންސް ދޫކުރުމުގައި ޓްރާސްޕޯޓު މިނިސްޓްރީގެ ތެރޭގައި ކޮރަޕްޝަން އަމަލުތައް ހިންގާކަމަށް ގިނަ ބަޔަކު ތުހުމަތު ކުރެއެވެ. އެގޮތުން 2021 ވަނަ އަހަރުގެ ތެރޭގައި ޓްރާންސްޕޯޓް މިނިސްޓްރީގެ ތެރޭގައި ކޮރަޕްޝަނަށް މަގުފަހިވާފަދަ ކަންކަން ހުރިކަން މިނިވަން މުއައްސަސާއާ ބެހޭ ކޮމެޓީއަށް، އެންޓި ކޮރަޕްޝަން ކޮމިޝަނާއި، ރާއްޖޭގައި ނެޝަނަލް އެންޓި ކޮރަޕްޝަން ޕޮލިސީ އެކުލަވާލަމުން އަންނަ ކޮންސަލްޓަންޓުން ގުޅިގެން ވަނީ ހިއްސާކޮށްފައެވެ.

ކޮމެޓީއާ ބައްދަލުކުރައްވާ، ޑރ. ސިމާދު ސައީދު ވިދާޅުވީ ޓްރާންސްޕޯޓް މިނިސްޓްރީގައި ހައްލުނުވެ ގިނަ ދުވަސްވެފައިވާ މައްސަލަތަކެއް ހުރިކަން ފާހަގަކުރެވިފައިވާ ކަމަށެވެ. އެގޮތުން ކޮރަޕްޝަން އެންމެ ބޮޑަށް ހިނގުމުގެ ފުރުސަތު އޮތް ސަރުކާރުގެ އިދާރާތަކުގެ ތެރޭގައި ޓްރާންސްޕޯޓް މިނިސްޓްރީ ހިމެނޭ ކަމަށް ސިމާދު ވިދާޅުވިއެވެ. ސިމާދު އިތުރަށް ވިދާޅުވީ އެއްގަމު އުޅަނދު ދުއްވުމުގެ ލައިސަންސް ދިނުމާއި ވެހިކަލް ރަޖިސްޓްރޭޝަން އޮތީ ކޮރަޕްޝަނަށް މަގުފަހިވާ ގޮތަށް ކަމަށާއި، މި މައްސަލައަށް އޮތް ހައްލަކީ ލައިސަންސް ދިނުން ޑިޖިޓަލައިޒްކުރުން ކަމަށާއި، ލައިސަންސް ދޫކުރުމުގައި ޓްރާންސްޕޯޓުން މިހާރު ގެންގުޅޭ ސިސްޓަމުން ފަސޭހައިން މައުލޫމާތު އޮޅުވައިލެވޭނެ ކަމަށެވެ.

މިމައްސަލަތައް ބޮޑުވުމާއި ގުޅިގެން ހިންގުން އިތުރަށް ހަރުދަނާ ކުރުމުގެ މަސައްކަތްތައް ކުރަމުންދާ ކަމަށް ޓްރާންސްޕޯޓް މިނިސްޓްރީން ބުނެފައިވެއެވެ. އަދި ގެނެވުނު ބަދަލާއެކު މިހާރު ޓްރާންސްޕޯޓް މިނިސްޓްރީން އެއްގަމު އުޅަނދު ދުއްވުމުގެ ލައިސަންސް ދޫކުރަނީ ޑިޖިޓަލްކޮށެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: މަރްޔަމް ދާނިޝް ނަޝީދު
0%
0%
50%
0%
0%
50%
ކޮމެންޓް