އިންތިހާބުތަކުގައި ވޯޓުލާ ސަރަހައްދުގައި މޮނީޓާކުރުމަށް ހަރަކާތްތެރިވެވޭނީ ރަޖިސްޓާކޮށްފައިވާ ނޫސްވެރިންނަށް އެކަނި ކަމަށް ގާނޫނަށް ގެންނަން ހުށަހެޅި އިސްލާހަަށް އިދިކޮޅުގެ ގިނަ މެންބަރުންތަކެއް ފާޑުވިދާޅުވެއްޖެއެވެ.
އިންތިހާބާ ބެހޭ އާންމު ގާނޫނަށް އިސްލާހު ގެނައުމަށް ބިލު ހުށަހެޅީ ސަރުކާރުގެ ފަރާތުން ހެންވޭރު އުތުރު ދާއިރާގެ މެންބަރު އިބްރާހީމް މުއިއްޒެވެ.
އެ ބިލަށް ބަހުސް ކުރައްވަމުން ހެންވޭރު ހުޅަނގު ދާއިރާގެ މެންބަރު ހަސަން ލަތީފް ވިދާޅުވީ އެމްޑީޕީއަކީ އިންތިހާބުތައް އިންސާފުވެރި، މިނިވަން އަދި ދެފުށް ފެންނަ އިންތިހާބުތަކަކަށް ހެދުމަށް މަސައްކަތްކޮށް އުފެދިފައިވާ ސިޔާސީ ޕާޓީއެއް ކަމަށެވެ. އަދި އިންތިހާބުތައް ހިނގަމުންދާއިރު އެ ހިނގާ ކަންކަމުގެ މައުލޫމާތު ރައްޔިތުންނަށް ސާފުކޮށް ފޯރުކޮށްދިނުމަށް ވަކާލާތު ކުރާ ޕާޓީއެއް ކަމަށެވެ.
ހަސަން ލަތީފް ވިދާޅުވީ މިހާރުގެ ގާނޫނުގައި ނޫސްވެރިންނަށް އިންތިހާބުގެ ކަންކަން ކަވަރު ކުރެވޭނެ ގޮތްތައް ވަރަށް ސާފުކޮށް ބަޔާންކޮށްފައިވާ ކަމަށެވެ. އޭގެ ތެރޭގައި، ނޫސް މަޖައްލާތަކުން ކަނޑައަޅާ ރިޕޯޓަރުންނަށް އިންތިހާބުގެ ކަންކަން ހިނގާނުހިނގާ ގޮތުގެ މައުލޫމާތު ރައްޔިތުންނަށް ފޯރުކޮށްދިނުމުގެ މަގު ފަހިކޮށްދީފައިވާ ކަމަށެވެ. ނަމަވެސް، އެ މަގު ހަނިކުރަން މި ބިލުން މަސައްކަތް ކުރާތީ އެ ކަމާ ކަންބޮޑުވެވަޑައިގަންނަވާ ކަމަށެވެ.
ދިވެހިރާއްޖޭގައި ރަޖިސްޓްރީކޮށްފައިވާ ނޫސްވެރިންނަށް އެކަނި އެ މައުލޫމާތު ރައްޔިތުންނަށް ފޯރުކޮށްދެވޭ ގޮތަށް ހަނިކޮށްލީމަ އަޅުގަނޑުމެންނަށް މުޅި ރާއްޖޭގައި ހިނގާ އިންތިހާބުތަކުގައި ހާއްސަކޮށް ކުރިއަށް މި އޮތް ރިޔާސީ އިންތިހާބުގައި އެ މައުލޫމާތު މީޑިއާތަކަކަށް ރައްޔިތުންނަކަށް ފޯރުކޮށެއް ނުދެވޭނެ.ހަސަން ލަތީފު / ހެންވޭރު ހުޅަނގު ދާއިރާގެ މެންބަރު
އޭނާ އިތުރަށް ވިދާޅުވީ ރާއްޖޭގެ މީޑިއާތަކަކީ މާ ގިނަ މުވައްޒަފުން ލައިގެން ހިންގާ މީޑިއާތަކެއް ނޫން ކަމަށާއި ސަރުކާރުން ހަރަދުކުރާ މީޑިއާތަކުގައި ވެސް އިންތިހާބެއް ކަވަރުކުރަން ބޭނުންވާ އަދަދަށް މުވައްޒަފުން ނުތިބޭނެ ކަމަށެވެ. އެހެންކަމުން، ރިޔާސީ އިންތިހާބުފަދަ ބޮޑެތި އިންތިހާބުތައް ރައްޔިތުންގެ ލޯމަތިން ކައްސައިލައިގެން ގޮސް ނުފެންނަ ގޮތަށް އިންތިހާބު ބާއްވައި ނިންމައިލަން އުޅޭކަމަށް ސުވާލު އުފެދޭ ކަމަށް ހަސަން ލަތީފް ވިދާޅުވިއެވެ.
ނައިފަރު ދާއިރާގެ މެންބަރު ޝިޔާމް ވިދާޅުވީ މި އިސްލާހުތަކުގެ ތެރޭގައި ވެސް ކަންބޮޑުވެވަޑައިގަންނަވާ ކަންތައްތަކެއް އެބަހުރި ކަމަށެވެ. އެ ގޮތުން މިހާރު ވެސް 20 ނޫހެއްގެ އެޑިޓަރުންނާއި ނޫސްވެރިން އިންޑިއާއަށް ގޮސްފައިވާ ކަމަށާއި ރާއްޖޭގެ ދާހިލީ ކަންތައްތަކުގެ ތެރެއަށް އެހެން ގައުމުތަކުން ވަންނަމުންދާ ކަމަށް އޭނާ ވިދާޅުވިއެވެ. ކެޕޭސިޓީ ބިލްޑުކުރުމުގެ ނަމުގައި ރާއްޖޭގެ މިނިވަން މުއައްސަސާތައް ވަކި އެމްބަސީއަކުން ހިންގާ ތަމްރީނުތަކުގައި ބައިވެރިކުރުމަކީ ކަންބޮޑުވެވަޑައިގަންނަވާ ކަމެއް ކަމަށް ވެސް ވިދާޅުވިއެވެ.
އެކި ގޮތްގޮތަށް މަސައްކަތްކުރާ ނޫސްވެރިން އުޅޭ ކަމަށާއި ފްރީލޭންސްކޮށް މަސައްކަތްކުރާ ނޫސްވެރިން ވެސް އޭގެ ތެރޭގައި ހިމެނޭކަން ފާހަގަކުރައްވަމުން ޝިޔާމް ވިދާޅުވީ އެ ހުރިހާ ނޫސްވެރިން ނޫސްތަކުގެ ދަފްތަރުގައި ރަޖިސްޓްރީ ކުރާނެ ގޮތެއް އެނގިވަޑައިނުގަންނަވާ ކަމަށެވެ.
ސަރުކާރުން މިހާވަރަށް ނޫސްވެރިން ހިސޯރުކޮށްގެން އޮތް ޒަމާނެއްގައި ފޮށިތައް ދޮށުގައި ތިބޭ ނޫސްވެރިންނަކީ މީގެ ކުރިޔާ ހިލާފަށް ސީދާ އެ ނޫހެއްގެ ރަޖިސްޓަރ ވެފައި ތިބޭ ނޫސްވެރިންތަކަކަށް ވާ ކަމުގައި ވަންޏާ އަޅުގަނޑަކަށް ނޭނގޭ މި ކަން ކުރާނެ ގޮތެއް ވެސް ސަރުކާރުން. ކޮންކަހަލަ ނުފޫޒެއް ކަމެއް ވެސް ފޯރުވަން މި އުޅެނީ.އަހްމަދު ޝިޔާމް / ނައިފަރު ދާއިރާގެ މެންބަރު
މީގެ އިތުރުން ވެސް އިދިކޮޅު ކޯލިޝަންގެ މެންބަރުންނާއި އެމްޑީޕީގެ ތެރެއިން އުފެދިފައިވާ ފިކުރެއްގެ ދިރުން ފެކްޝަނަށް ތާއީދުކުރައްވާ މެންބަރުން ވަނީ މި ބިލަށް ފާޑުވިދާޅުވެ ވާހަކަ ދައްކަވައިފައެވެ. އަދި ރަޖިސްޓާކޮށްފައިވާ ނޫސްވެރިންނަށް އެކަނި އެ ފުރުސަތު ދިނުމަކީ އެންމެ ރަނގަޅު ގޮތެއް ނޫންކަމަށް ވަނީ ވިދާޅުވެފައެވެ.
ގާނޫނު ބުނާ ގޮތުން ނޫސްވެރިންނަށް ވޯޓު ގުނާ ތަނުގައި ތިބެ ވޭނީ އިލެކްޝަންސް ކޮމިޝަނުން ހުއްދަދޭ ރިޕޯޓަރުންނަށެވެ. ގާނޫނަށް ގެނައި އިސްލާހުގައި ރަޖިސްޓްރީ ކޮށްފައިވާ ނޫސްވެރިންނަކީ ކޮބައިކަން ތަފްސީލުކޮށްދީފައި ވެއެވެ. އެގޮތުން، ރަޖިސްޓްރީކޮށްފައިވާ ނޫސްވެރިންނަކީ ރަޖިސްޓްރީކޮށްފައިވާ މީޑިއާއެއްގައި މަސައްކަތް ކުރާ ނޫސްވެރިން ކަމުގައި ކަނޑައަޅާފައި ވެއެވެ.
