ކްރިމިނަލް ކޯޓަށް 3 ފަނޑިޔާރުން އައްޔަނުކޮށްފި
12 މާރިޗު 2023 | އާދީއްތަ 02:16ފަނޑިޔާރުން އައްޔަންކޮށްފައިވަނީ ދެ އިއުލާނެއްގެ ދަށުން
ކްރިމިނަލް ކޯޓު
ކްރމިނަލް ކޯޓަށް 3 ފަނޑިޔާރުން އައްޔަންކޮށްފައިވާކަމަށް ޖުޑީޝަލް ސަރވިސް ކޮމިޝަން (ޖޭއެސްސީ)އިން ބުނެފިއެވެ.
ޖޭއެސްސީން ބުނީ ކްރިމިނަލް ކޯޓަށް އައްޔަންކޮށްފައިވަނީ 3 ފަނޑިޔާރުން ކަމަށެވެ.
ޖޭއެސްސީން ބުނީ އެކޯޓަށް 2 ފަނޑިޔާރުން ހޯދުމަށް މިއަހަރުގެ ޖެނުއަރީ 10 ވަނަ ދުވަހު ކުރެވުނު އިއުލާނުގައި އެ މަގާމަށް ކުރިމަތިލި ފަރާތްތަކުގެ ތެރެއިން ސ.މަރަދޫ، އެށެވެލި އަލްއުސްތާޛު އިބްރާހީމް އިޙްސާން އާއި ގއ.ނިލަންދޫ، ބިއްލޫރިޖެހިގެ، އަލްއުސްތާޛު އިބްރާހީމް ޛިހުނީ ކްރިމިނަލް ކޯޓުގެ ފަނޑިޔާރުކަމަށް އައްޔަންކުރުމަށް ފެބްރުއަރީ 5 ވަނަ ދުވަހު ބޭއްވި އެ ކޮމިޝަންގެ 10 ވަނަ ބައްދަލުވުމުގައި ނިންމާފައިވާކަމަށެވެ.
އަދި އެ ކޯޓަށް ފަނޑިޔާރަކު ހޯދުމަށް 2022 ވަނަ އަހަރުގެ ޖުލައި 7 ގައި ކުރި އިއުލާނުގެ ދަށުން އަލްއުސްތާޛާ އާމިނަތު އަޒްލިފާ ކްރިމިނަލް ކޯޓުގެ ފަނޑިޔާރުކަމަށް ޢައްޔަންކުރުމަށް މިއަހަރުގެ ފެބްރުއަރީ 8 ވަނަ ދުވަހު ބޭއްވި އެ ކޮމިޝަންގެ 11 ވަނަ ބައްދަލުވުމުގައި ނިންމާފައިވާކަމަށް ޖޭއެސްސީން ބުނެއެވެ.
އަލްއުސްތާޛު އިބްރާހީމް އިޙްސާންއަކީ 2018 އޮކްޓޫބަރު 29 ވަނަ ދުވަހު މެޖިސްޓްރޭޓްކަމަށް ޢައްޔަން ކުރެވި، މިވަގުތު ގއ.ޖުޑީޝަލް ދާއިރާގެ އިސްމެޖިސްޓްރޭޓްކަމުގެ މަޤާމް އަދާކުރައްވަމުންދާ ފަނޑިޔާރެކެވެ. އަދި ޤާނޫނީ ރޮނގުން ބެޗްލަރ އޮފް ލޯ (އޮނަރސް) ދިވެހިރާއްޖޭގެ ޤައުމީ ޔުނިވަރސިޓީއިން ހާސިލްކުރައްވާފައިވާ ބޭފުޅެކެވެ. މެޖިސްޓްރޭޓްކަމަށް ޢައްޔަންކުރެވުމުގެ ކުރިން 2016 ވަނަ އަހަރުން ފެށިގެން އަލްއުސްތާޛު އިބްރާހީމް އިޙްސާންވަނީ ލީގަލް އޮފިސަރެއްގެ ގޮތުގައި ގއ.ވިލިނގިލީ މެޖިސްޓްރޭޓް ކޯޓުގައި މަސައްކަތްކުރައްވާފައެވެ.
އަލްއުސްތާޛު އިބްރާހީމް ޛިހުނީ ވަނީ މިސްރުގެ އަލް-އަޒްހަރު ޔުނިވަރސިޓީއިން ބެޗްލަރ އޮފް އާރޓްސް އިން ޝަރީޢާ އެންޑް ލޯ ހާސިލްކުރައްވާފައެވެ. އަދި އަލްއުސްތާޛު އިބްރާހީމް ޛިހުނީ އަކީ 2013 ފެބްރުއަރީ އިން ފެށިގެން ލީގަލް މަސައްކަތުގައި އެމް.ޑަބްލިއު.އެސް.ސީ އަދި 2014 ވަނަ އަހަރުން ފެށިގެން ޑްރަގް ކޯޓުގައި ލީގަލް އޮފިސަރެއްގެ ގޮތުގައި މަސައްކަތްކުރައްވާފައިވާ ބޭފުޅެކެވެ. އަދި 2016 ޖަނަވަރީ 20 ވަނަ ދުވަހުން ފެށިގެން މިއަދާ ހަމައަށް އަލްއުސްތާޛު އިބްރާހީމް ޛިހުނީ ހުންނެވީ ޕްރޮސެކިއުޓަރ ޖެނެރަލްގެ އޮފީހުގެ ޕަބްލިކް ޕްރޮސެކިއުޓަރެއްގެ ގޮތުގައެވެ.
އަލްއުސްތާޛާ އާމިނަތު އަޒްލިފާ ވަނީ ކުއްލިއްޔަތުއް ދިރާސާތިލް އިސްލާމިއްޔާއިން ބެޗްލަރ އޮފް ޝަރީޢާ އެންޑް ލޯ (އޮނާރސް) އަދި ވިލާކޮލެޖްއިން މާސްޓަރ އޮފް ޝަރީޢާ ހާސިލްކުރައްވާފައެވެ. އަލްއުސްތާޛާ އާމިނަތު އަޒްލިފާ އަކީ 2012 ވަނަ އަހަރުން ފެށިގެން ޤާނޫނީ ދާއިރާގައި މަސައްކަތްކުރައްވާ ބޭފުޅެކެވެ. އެގޮތުން ޕޮލިސް އިންޓެގްރިޓީ ކޮމިޝަނުގައި މަސައްކަތްކުރެއްވިއެވެ. 2015 އޭޕްރީލް އިން ފެށިގެން އަލްއުސްތާޛާ އާމިނަތު އަޒްލިފާ އަކީ ކްރިމިނަލް ކޯޓުގައި ލީގަލް އޮފިސަރެއްގެ މަޤާމް އަދާކުރައްވަމުން އަންނަ ބޭފުޅެކެވެ.
