މާލެ ގްރޭންޑާއި ގާކޮށީގެ ފްލެޓުތަކުގައި، އުސޫލާ ޚިލާފަށް ހުރި ކަންކަން ރަނގަޅުކުރުމަށް އަންގައިފި
8 މާރިޗު 2023 | ބުދަ 12:36އުސޫލާ ޚިލާފަށް ކޮށްފައިވާ ކަންކަން މި މަހުގެ 20 ވަނަ ދުވަހުގެ ކުރިން ރަނގަޅުކުރުމަށް ވަނީ އަންގާފައި
ގާކޮށި ފްލެޓުތައް
މާލެ ގްރޭންޑާއި ގާކޮށީގެ ފްލެޓުތަކުގައި އުސޫލާ ޚިލާފަށް ހުރި ކަންކަން މި މަހުގެ 20 ވަނަ ދުވަހުގެ ކުރިން ރަނގަޅުކުރުމަށް ހައުސިންގ ޑެވެލޮޕްމަންޓް ކޯޕަރޭޝަން (އެޗްޑީސީ)ން އަންގައިފިއެވެ.
އެ ކުންފުނިން ނެރުނު އިއުލާނެއްގައި ބުނީ މއ. ވޭވްސައިޑް ނުވަތަ މާލެ ގްރޭންޑާއި ގާކޮށި ފްލެތުތައް ހިމެނޭ އެއްމެދު އިމާރާތްތަކުގެ އާއްމު ތަންތަނާއި ވަސީލަތްތައް ބޭނުންކުރުމާބެހޭ އުސޫލު، އަދި ސަރުކާރުގެ އިމާރާތްކުރުމާބެހޭ އިދާރީ ގަވާއިދާ ޚިލާފަށް އެ އިމާރާތުގައި ދިރިއުޅޭ ފަރާތްތަކުން އަމަލު ކުރާކަން ފާހަގަކުރެވިފައި ވާކަމަށެވެ. އެގޮތުން އިމާރާތުގެ އާއްމު ބައިތަކުގައި ގަސްމުއްޓާއި ފަރުނީޗަރާއި ކުންޏާއި އެހެނިހެން ހިފާގެންގުޅޭ ތަކެތި ބަހައްޓާކަން ފާހަގަކުރެވިފައިވާ ކަމަށް އެ ކުންފުނިން ވަނީ ބުނެފައެވެ.
މީގެ އިތުރުން އޭސީ އައުޓްޑޯރ ޔުނިޓުގެ ފެންހޮޅިތަކުން ތިރިއަށް ފެން ލީކުވާގޮތަށް ދޫކޮށްލާފައި ހުންނަަކަމާއި، އިމާރާތުގެ އަލިފާން ނިއްވާ ނިޒާމުގެ ފަޔަރ ހޯސް ބޮކްސްތަކުގެ ކައިރީގައާއި އޭގެ މަތީގައި ތަކެތި ބަހައްޓާފައި ހުންނަކަންވެސް ފާހަގަކުރެވިފައިވާކަމަށް އެޗްޑީސީން ބުނެއެވެ.
މިފަދަ ކަންކަން އިސްލާހުކުރުމަށް ތަކުރާރުކޮށް އެތަންތަނުގައި ދިރިއުޅޭ ފަރާތްތަަކަށް އަންގާފައިވާނެކަން ފާހަގަކޮށް އެޗްޑީސީން ބުނީ، މިފަދަ ކަންކަމަކީ އިމާރާތުގެ ސަލާމަތާއި ރައްކާތެރިކަން ގެންލިގެންދާފަދަ ކަންކަމަށް ވުމުން، އިމާރާތުގައި ދިރިއުޅޭ ހުރިހާ ފަރާތެއްގެ ލާބައަށްޓަކައި އެފަދަ ކަންކަން ނުކުރުމަށް އިލްތިމާސްކުރާކަމަށެވެ. އަދި ފްލެޓުގައި ދިރިއުޅޭ މީހުންގެ އަމަލުތައް އިމާރާތުގެ އުސޫލުތަކާ އެއްގޮތައް ބެހެއްޓުމަކީ އެ ފްލެޓެއްގެ ވެރިފަރާތުގެ ޒިންމާއެއް ކަމަށްވެސް އެ ކުންފުނިން ވަނީ ބުނެފައެވެ.
އެޗްޑީސީން ވަނީ މާލެ ގްރޭންޑާއި ގާކޮށީގެ ފްލެޓުތަކުގައި ދިރިއުޅޭ ފަރާތްތަކުން، އުސޫލާ ޚިލާފަށް ކޮށްފައިވާ ކަންކަން މި މަހުގެ 20 ވަނަ ދުވަހުގެ ކުރިން ރަނގަޅު ކުރުމަށް އަންގާފައެވެ. އެ ތާރީހުގެ ކުރިން ރަނގަޅުނުކުރާނަމަ ފްލެޓު ވިއްކުމުގެ އެއްބަސްވުމާއެއްގޮތަށް ފިޔަވަޅު އަޅާނެ ކަމުގެ އިންޒާރުވެސް އެޗްޑީސީން ވަނީ ދީފައެވެ.
އެޗްޑީސީން އަންނަނީ އެ ކުންފުނީގެ ބެލުމުގެ ދަށުގައި ހުންނަ އިމާރާތްތަކުގައި ދިރިއުޅޭ ފަރާތްތަކުން ގަވާއިދާއި އުސޫލުތަކާ އެއްގޮތަށް އަމަލު ކުރުމަށް ބާރުއަޅަމުންނެވެ. އެގޮތުން ހިޔާ ފްލެޓުތަކުގައިވެސް އުސޫލުތަކާ ޚިލާފަށް ކޮށްފައި ހުންނަ ކަންކަން ރަނގަޅުކުރުމަށް އެ ކުންފުނިން ފްލެޓުތަކުގެ ވެރިންނަށް އަންގައެވެ.
