ފުޓްބޯޅަ ކުޅުންތެރިއެއްގެ ތިން ލައްކަ ޕައުންޑް އޮޅިގެން ބާސްކެޓް ކުޅުންތެރިއަކަށް

ބްރެޒިލްގެ ފްލެމިންގޯ އަށް ކުޅޭ ޔާއޯ ގޮމޭޒަށް ދޭން ޖެހޭ ތިން ލައްކައަށްވުރެ ގިނަ ޕައުންޑް އެކުލަބަށް ކުރިން ބާސްކެޓް ކުޅުނު އެނަން ކިޔާ ކުޅުންތެރިއެއްގެ އެކައުންޓަށް އޮޅިގެން ޖަމާކޮށްފި އެވެ.

ފައިސާ ޖަމާކުރެވުނީ ނުބައި ޔާއޯ ގޮމޭޒަށް ކަން އެނގުމާއެކު ފްލެމިންގޯއިން ވަނީ މި ފައިސާ އަލުން ހޯދުމަށް ބްރެޒިލްގެ ރިއޯޑިޖެނީރޯގެ ކޯޓަށް ހުށަހަޅާފަ އެވެ.

އިނގިރޭސިވިލާތުގެ ވުލްވުސް އިން ފްލެމިންގޯ އާއި މިދިޔަ ޖެނުއަރީ މަހު ޔާއޯ ގޮމޭޒް ސޮއިކުރީ 15 މިލިއަން ޕައުންޑަށެވެ. އަދި އޭނާގެ އެކައުންޓަށް ޖަމާކުރި 306،000 ޕައުންޑަކީ އިކޮނޮމިކް ރައިޓްސްގެ ގޮތުގައި ދޭން ޖެހޭ ފައިސާ އެވެ. މި ފައިސާ ޖަމާވި އެކައުންޓްގެ ވެރިއަކީ ކުރިން ފްލެމިންގޯ އަށް ބާސްކެޓް ކުޅުނު ޔާއޯ ގޮމޭޒް އެވެ.

މި ފައިސާ ޖަމާވިކަން އޭނާ ވެސް ވަނީ ކަށަވަރުކޮށްދީފަ އެވެ.

އޭނާ ބުނީ މި ފައިސާއަކީ ކޮންމެ ވެސް މީހަކަށް އޮޅިގެން ފޮނުވުނު ފައިސާކަމަށް ގަބޫލުކުރެވުނު ކަމަށާއި އޭނާ ބަލައި ބޮޑުކުރި ބައްޕަ ވެސް މިފަދަ ފައިސާތަކާމެދު ސަމާލުވުމަށް ނަސޭހަތްދީފައިވާ ކަމަށެވެ.

ބްރެޒިލްގެ ރިއޯޑިޖެނީރޯ ކޯޓުން މިހާރު ވަނީ މި ފައިސާ އަކީ ބާސްކެޓް ކުޅުންތެރިޔާގެ ފައިސާ ނޫން ކަމަށް ގަބޫލުކުރިކަން އަންގައިފަ އެވެ. އަދި ފައިސާ އަނބުރާ ފްލެމިންގޯ އަށް ހޯދައިދިނުގެ މަސައްކަތް ވެސް ވަނީ ފަށައިފަ އެވެ.