ޕޮޓާ އުއްމީދު ކުރަނީ ސްޓާލިން މިރޭ ގޯލު ޖަހާނެ ކަމަށް

ޗެމްޕިއަންސް ލީގު ފުޓްބޯޅަ މުބާރާތުގެ ކުއާޓާ ފައިނަލުން ޖާގަ ހޯދުމަށް މިރޭ ޖަރުމަނުގެ ބޮރޫޝިޔާ ޑޯޓްމުންޑާ ދެކޮޅަށް ނުކުންނައިރު ފޯވަޑް ރަހީމް ސްޓާލިންގެ ރެކޯޑްތަކުން ޗެލްސީ ހިތްހަމަޖެހުން ހޯދަން ފަށައިފި އެވެ.

ސްޓާލިން އަކީ މި ސީޒަނުގައި ޗެލްސީގެ ޓޮޕް ސްކޯރަރެވެ. ޖަހާފައިވަނީ ހަ ގޯލެވެ. އެކަމަކު އޭނާގެ ކުރީގެ ކުލަބު މެންޗެސްޓާ ސިޓީ އަށް ޗެމްޕިއަންސް ލީގުގައި ކުޅެދިން 67 މެޗުން ވަނީ 24 ގޯލު ޖަހައިދީފަ އެވެ. މިހެންވެ ސްޓާލިން އަކީ މުބާރާތުގައި ކޮންމެހެން މޮޅުވާންޖެހޭ މެޗަކަށް ނުކުންނައިރު ކޯޗު ގްރެހަމް ޕޮޓާ ވަރަށް ބޮޑަށް އުއްމީދުކުރާ ކުޅުންތެރިއެކެވެ.

ކޯޗު ބުނީ ޑޯޓްމުންޑަކީ މޮޅު ޓީމެއް ކަމަށާއި އެމީހުންގެ ދަނޑުގައި 1-0އިން ބަލިވެފައިވާތީވެ މިރޭ އަމިއްލަ ދަނޑުގައި 2 ލަނޑުން ކޮންމެހެން މޮޅުވާން ޖެހޭއިރު ސަޕޯޓަރުންގެ އެހީތެރިކަން ވަރަށް ބޮޑު ކަމަށެވެ.

މި މެޗަށް ނުކުންނައިރު ޗެލްސީގެ ޑިފެންޑަރު ތިއާގޯ ސިލްވާ އަށް އަނިޔާގެ ސަބަބުން ނުކުޅެވޭނެ އެވެ. ނަމަވެސް ޑިފެންޑަރު ރީސް ޖޭމްސް އާއި މިޑްފީލްޑަރު ކްރިސްޓިއަން ޕުލިސިޗް ވަނީ މި މެޗަށް ފިޓްވެފަ އެވެ. ފަރިތަކުރަން ފެށި ނަމަވެސް މިޑްފީލްޑަރު އެންގޯލޯ ކާންޓޭ އަށް ކުޅެވޭވަރަށްވުރެ މި މެޗު މިއޮތީ މާ އަވަހަށެވެ.

ޖަރުމަނު ލީގުގައި ވަރަށް ރަނގަޅު ނަތީޖާތަކަކާއެކު ޕޮއިންޓްގެ ގޮތުން ހަމަހަމަވެ، ދެ ވަނާގައި އޮތް ޑޯޓްމުންޑުން އުއްމީދު ކުރަނީ މި މެޗަށް ކީޕަރު ގްރެގޯ ކޯބެލް އާއި ފޯވަޑް ޑޮންޔެލް މަލެން މި މެޗަށް ފިޓްވާނެ ކަމަށެވެ. ނަމަވެސް މި ދެ ޓީމު ކުޅުނު ފުރަތަމަ މެޗުގައި ގޯލު ޖެހި ކަރީމް އަޑެޔޭމީ އަށް މި މެޗުގައި ނުކުޅެވޭނެ އެވެ. މިދޔަ ފެބްރުއަރީ މަހުގެ 19 ވަނަ ދުވަހުން ފެށިގެން އޭނާ ހުރީ އަނިޔާގަ އެވެ.