ކުމުންދޫގައި ފުލުހުންގެ ޚިދުމަތް ގާއިމުނުކުރެވިއްޖެނަމަ ނުރައްކާތެރި ކަންކަން ހިނގައިފާނެ - އިމްރާން
އަހަރުން އަހަރަށް ކުމުންދޫގައި ކުށްކުރުމުގެ ހާލަތު ގޯސްވަމުންދާކަމަށް ގަބޫލުކުރެވޭ އަދި ރިޕޯޓްތައްވެސް ލިބޭ
ހޯމް މިނިސްޓަރު އިމްރާން އަބްދުﷲ
ކުމުންދޫގައި ފުލުހުންގެ ހިދުމަތް ގާއިމުނުކުރެވި ލަސްވެގެން ދިއުމަކީ ނުރައްކާތެރި ކަންކަން ހިނގާފާނެ ކަމެއް ކަމަށް ގަބޫލުކުރައްވާ ކަމަށް ހޯމް މިނިސްޓަރު އިމްރާން އަބްދުﷲ ވިދާޅުވެއްޖެއެވެ.
މިނިސްޓަރު މިހެން ވިދާޅުވީ އަންގާރަ ދުވަހުގެ ރައްޔިތުންގެ މަޖިލީހުގެ ޖަލްސާފައި މަކުނުދޫ ދާއިރާގެ މެންބަރު މުހައްމަދު ރާއީ ކުރެއްވި ސުވާލަކަށް ޖަވާބު ދެއްވަމުންނެވެ.
މިނިސްޓަރު ވިދާޅުވީ ކުމުންދޫގައި ފުލުހުންގެ ހިދުމަތް ގާއިމުކުރެވިގެން ދިއުމަކީ، ވަރަށް މުހިންމު ކަމެއްގެ ގޮތުގައި ފުލުހުން ދެކޭ ކަމަށެވެ. ސަބަބަކީ އެރަށުގެ ހާލަތު ބަދަލުވަމުންދާ ގޮތުން ފުލުހުންގެ ހިދުމަތް ގާއިމުނުކުރެވި ލަސްވެގެން ދިއުމަކީ ނުރައްކާތެރި ކަންކަން ހިނގައިފާނެކަމަށް ގަބޫލުކުރެއްވޭތީ ކަމަށެވެ. އެހެންކަމުން އެ ދާއިރާގެ މެންބަރާއި ކައުންސިލާއެކު ކުރެވޭ މަސައްކަތުން ތަނެއް ހަމަޖެހިގެން ދިއުމާއެކު ހިދުމަތް ގާއިމުކުރެވިގެންދާނެ ކަމަށް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ ލާމަރުކަޒީ ގާނޫނުގެ އިތުރުން ފުލުހުންގެ ގާނޫނުގެ ތެރެއިން ފުލުހުންނާއި ކައުންސިލްތަކާއެކުގައި ރަށުގެ އަމާންކަން ބެލެހެއްޓުމާއި، ސުލްހަ ގާއިމުކުރުމުގެ މަސައްކަތް ވަރަށް ބޮޑަށް ބާރު އަޅާފައިވާ ކަމަށެވެ. އޭގެ ދަށުން ނެއިބަރހުޑް ޕޮލިސިންގެ މަސައްކަތް ކުރަމުންދާ ކަމަށެވެ.
ކުމުންދޫގައި ފުލުހުންގެ ހިދުމަތް ގާއިމުކުރުމަށް ކުރެވިފައިވާ މަސައްކަތްތަކާއި ގުޅޭގޮތުން މިނިސްޓަރު ވިދާޅުވީ ކުމުންދޫގައި ފުލުހުންގެ ހިދުމަތް ގާއިމުކުރުމަށް އެންމެ ފުރަތަމަ މަޝްވަރާކޮށްފައިވަނީ 10 އޮކްޓޯބަރު 2020 ގައި ކަމަށެވެ. ގާތްގަނޑަކަށް އޭގެ 2 އަހަރެއްހާ ދުވަސް ވެގެން ދިޔައިރުވެސް އެ މަސައްކަތް ނިންމާ ނުލެވި އަދިވެސް ކުރިއަށްދާ ސަބަބަކަށް ވަނީ، ފުލުހުންގެ ހިދުމަތް ގާއިމުކުރުމަށް ކުމުންދޫން އެކަށީގެންވާ ޖާގައެއް ނުލިބުން ކަމަށެވެ.
މިނިސްޓަރު ވިދާޅުވީ އާންމު ގޮތެއްގައި ފުލުހުންގެ ހިދުމަތް ގާއިމުކުރުމަށް ގެންގުޅޭ އުސޫލަކީ، ރަށު ކައުންސިލާއެކު މަޝްވަރާކޮށްގެން ފުލުހުންގެ ހިދުމަތް ގާއިމުކުރުމަށް ތަނެއް ލިބޭތޯ ބެލުން ކަމަށެވެ. އަދި ކައުންސިލްގެ ބެލުމުގެ ދަށުގައި ހުރި ތަނެއް ލިބޭތޯ މަސައްކަތް ކުރުން ކަމަށާއި، އެފުރުސަތު ނެތްކަމުގައިވާނަމަ އެކަށީގެންވާ އަގެއްގައި ކުއްޔަށް ހިފައިގެން ފުލުހުންގެ ހިދުމަތް ގާއިމްކުރުން ކަމަށެވެ. އަދި ކުރެވުނު މަޝްވަރާތަކުން އެނގުނީ ކައުންސިލްގެ ބެލުމުގެ ދަށުގައި އެފަދަތަނެއް ނެތްކަމެވެ.
މިނިސްޓަރު ވިދާޅުވީ މުޅި މި މައްސަލަ ގޮސް ހުއްޓޭ ހިސާބަކީ ހިދުމަތް ގާއިމުކުރުމަށް އެކަށީގެންވާ ތަނެއް ނުލިބުމުގެ މައްސަލަ ކަމަށެވެ. އަދި މިކަމުގައި ދާއިރާގެ މެންބަރު ވަރަށް ބައިވަރު މަސައްކަތްތަކެއް ކުރައްވާ ކަމަށާއި، ކައުންސިލަށް އެހީތެރިކަން ދެއްވާ ކަމަށެވެ. އެހެންނަމަވެސް ތަނެއް ލިބުމަކީ ވަރަށް މުހިންމު ކަމެއްގެ ގޮތުގައި ދެކެވަޑައިގަންނަވާ ކަމަށާއި، މިކަމުގައި އަދިވެސް މެންބަރުގެ އެހީތެރިކަމާއި ކައުންސިލްގެ އެހީތެރިކަން ދެވިއްޖެނަމަ އެކަން ކުރެވިގެންދާނެ ކަމަށް މިނިސްޓަރު ވިދާޅުވިއެވެ.
