ކ. ކުޑަގިރީ ފަރަށް އެރި ބޯޓު 3 މިލިއަން ރުފިޔާއިން ޖޫރިމަނާކޮށްފައިވާކަމަށް, އެންވަޔަރަންމެންޓަލް ޕްރޮޓެކްޝަން އެޖެންސީ (އީޕީއޭ)އިން ބުނެފިއެވެ.

"އެމްއެސްވީ. މާރިއާ ސިންްތަޔާތިރިޔާ ރިޔާނާ" ނަމަކަށް ކިޔާ ބޯޓު ކ. ކުޑަގިރީ ފަރަށް އަރާފައިވަނީ މިއަހަރުގެ ޖެނުއަރީ 31 ވަނަ ދުވަހުއެވެ.

އީޕީއޭއިން ނެރުނު ބަޔާނެއްގައި ވަނީ، މި ބޯޓު ފުންކޮށް ނިމުމުން އެ ސަރަހައްދުގެ ތިމާވެއްޓަށް ލިބުނު ގެއްލުންތައް ބެލުމަށް ބޯޓުގެ ވެރިފަރާތުން ސަރވޭކޮށް، ސަރވޭ ރިޕޯޓު އެ އެޖެންސީއާ ހިއްސާކޮށްފައިވާކަމަށެވެ. އަދި އީޕީއޭގެ ސަރވެޔަރުން އެ ސަރަހައްދަށް ގޮސް ސަރވޭކޮށްފައިވާކަމަށެވެ.

އީޕީއޭއިން ބުނީ ސަރވޭ ރިޕޯޓުން ދައްކާގޮތުގައި އެ އުޅަނދު ކުޑަގިރީ ފަރަށް އެރުމުގެ ސަބަބުން 130 އަކަމީޓަރުގެ ސަރަހައްދަކަށް އެކިވަރުގެ ގެއްލުން ލިބިފައިވާކަމަށެވެ.

އެހެންކަމުން، ބޯޓު ފަރަށް އެރުމާ ގުޅިގެން ފަރުގެ މާހައުލަށް ލިބުނު ގެއްލުންތައް، ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ގާނޫނުގެ ދަށުން ހެދިފައިވާ، "ތިމާވެއްޓަށް ދޭ ގެއްލުންތަކަށް ޖޫރިމަނާ ކަނޑައެޅުމާއި ބަދަލު ހޯދުމުގެ ގަވާއިދު"ގެ ދަށުން 3،098،710 ރ. (ތިން މިލިއަން ނުވަދިހަ އަށްހާސް ހަތްސަތޭކަ ދިހަ ރުފިޔާ)އިން އެ އުޅަނދުގެ ވެރިފަރާތް ޖޫރިމަނާކޮށްފައިވާކަމަށް އީޕީއޭއިން ވަނީ ބުނެފައެވެ. އަދި 30 ދުވަހުގެ ތެރޭގައި ޖޫރިމަނާ ފައިސާ ދެއްކުމަށް، ފެބްރުއަރީ 28ގައި އަންގާފައިވާކަމަށް އީޕީއޭއިން ބުނެއެވެ.

މިކަމާގުޅިގެން ރާއްޖެއެމްވީއަށް މައުލޫމާތުދެއްވަމުން އީޕީއޭގެ ޑިރެކްޓަރ ޖެނެރަލް އިބްރާހީމް ނައީމް ވިދާޅުވީ، ޖޫރިމަނާ ފައިސާ ލިބުމުން، ފަރަށް ލިބުނު ގެއްލުން އަލުން އިއާދަކުރުމަށް ކުރަންޖެހޭ މަސައްކަތްތައް ފެށިގެންދާނެ ކަމަށެވެ. އެހެންނަމަވެސް މި މަސައްކަތްތައް ފެށޭނެ ތާރީޚެއް ދެއްވާފައެއް ނުވެއެވެ.

މާލޭ ސަރަހައްދުގައި ދިރިއުޅޭ ރައްޔިތުން ދަތުރު ދިއުމަށް ޚާއްސަކޮށް ތަރައްގީކޮށްފައިވާ ކުޑަގިރި ރަސްމީކޮށް ހުޅުވާފައިވަނީ ފެބްރުއަރީ 11 ވަނަ ދުވަހުއެވެ.