ހަތް ލަނޑު ވަނީ ހެދުނު އެންމެ ގޯހަކުން: ޔުނައިޓެޑްގެ ކޯޗު

އިނގިރޭސި ޕްރެމިއާ ލީގުގައި ރޭ ލިވަޕޫލުން ޔުނައިޓެޑް ކޮޅަށް ހަތް ލަނޑުގެ ބޮޑު މޮޅެއް ހޯދީ ޔުނައިޓެޑަށް ހެދުނު އެންމެ ގޯހަކުން ކަމަށް ކޯޗު އެރިކް ޓެން ހާގް ބުނެފި އެވެ.

މެޗަށް ފަހު ވާހަކަ ދައްކަމުން ޓެން ހާގް ބުނީ ލިވަޕޫލުން ފުރަތަމަ ގޯލު ޖެހީ ފުރަތަމަ ހާފުގައި ހެދުނު އެންމެ ގޯހަކުން ކަމަށެވެ. އަދި އެއާއެކު އޭނާގެ މުޅި ޓީމުގެ ރޭވުންތެރިން ރޫޅިގެންދިޔައީ ކަމަށެވެ.

އޭނާ ބުނީ 2017 ވަނަ އަހަރަށްފަހު ޔުނައިޓެޑަށް ކާމިޔާބު ކުރެވުނު ހަމައެކަނި ތަށި ކަމަށްވާ ކަރަބޯ ކަޕް ހުސްވި ހަފުތާގައި ކާމިޔާބުކޮށް، ޔޫރޮޕާ ލީގުގައި ބާސެލޯނާ ބަލިކުރެވުމުންނާއި މެންޗެސްޓާ ސިޓީއާ ދެކޮޅަށް ހޯދި ކާމިޔާބީގެ ސަބަބުން ޓީމާމެދު އެންމެވެސް ތިބީ ވަރަށް އިތުބާރުކޮށްގެން ކަމަށެވެ.

އޭނާ އަދި މި ސީޒަނުގައި ޔުނައިޓެޑްގެ ފަރާތުން ފެނިގެންގޮސްފައިވަނީ ފަހަތުން އަރައި މޮޅުވާ މަންޒަރު ކަމަށާއި ނަމަވެސް މި މެޗުގައި އެފަދަ ކަމެއް ވެސް ނުފެނުނު ކަމަށެވެ.

މި މެޗުން ބަލިވުމުން މި ސީޒަނުގެ ޕްރެމިއާ ލީގު ޔުނައިޓެޑަށް ކާމިޔާބު ނުކުރެވޭނެކަން ގާތްގަނޑަކަށްވަނީ ކަށަވަރުވެފަ އެވެ. މިވަގުތު ޔުނައިޓެޑާއި އެއްވަނާގައިވާ އާސެނަލްއާ ދެމެދު 14 ޕޮއިންޓްގެ ފަހަރެއް އެބައޮތެވެ. ޔުނައިޓެޑްގެ މި ބައްޔަކީ 1931ގެ ފަހުން އެ ޓީމުގެ އެންމެ ބޮޑު ބައްޔެވެ.