ހަތް ލަނޑުން ބަލިވުމުން ޔުނައިޓެޑްގެ ލެޖެންޑުން ރަތަށް

އިނގިރޭސި ޕްރެމިއާ ލީގުގައި ރޭ ލިވަޕޫލް އަތުން 7-0އިން މެންޗެސްޓާ ޔުނައިޓެޑް ބަލިވުމުން އެކުލަބުގެ ލެޖެންޑުންގެ ރުޅިއަތުވެއްޖެ އެވެ.

އެއްވަނާގައިވާ އާސެނަލްއަށްވުރެ 14 ޕޮއިންޓު ފަހަތުން ތިން ވަނާގައި އޮތް ޔުނައިޓެޑްގެ މި ބައްޔަކީ 1931ގެ ފަހުން އެ ޓީމުގެ އެންމެ ބޮޑު ބައްޔެވެ. އަދި މި ބައްޔާއެކު މި ސީޒަނުގެ ޕްރެމިއާ ލީގު ކާމިޔާބު ނުކުރެވޭނެކަން ގާތްގަނޑަކަށްވަނީ ޔަގީންވެފަ އެވެ.

ޔުނައިޓެޑްގެ އެންމެ ކާމިޔާބު ކޯޗު އެލެކްސް ފާގަސަންގެ ދުވަސްވަރު ޓީމުގެ ކެޕްޓަންކަން ކުރި އަޔަލޭންޑްގެ ކުރީގެ ކެޕްޓަން ރޯއި ކީން އަކީ މި ނަތީޖާއާމެދު އެންމެ ބޮޑަށް ނުރުހުންވި އެއް ކުޅުންތެރިޔާ އެވެ.

އޭނާ ބުނީ މެޗުގައި ލިވަޕޫލުން ދެއްކީ ވަރަށް މޮޅު ކުޅުމެއް ކަމަށެވެ. އަދި ޔުނައިޓެޑްގެ އެންމެ ވާދަވެރި ޓީމު ދަނޑުމަތީގައި މޮޅުވާން ބޭނުންވެގެން އުޅުނު ކަމަށާއި މުޅި މެޗަށް ބަލާއިރު ޔުނައިޓެޑްގެ ކުޅުންތެރިން ތިބީ މާބޮޑަށް މަޑުމަޑުން ކަމަށެވެ.

ޔުނައިޓެޑްގެ ކުރީގެ ކެޕްޓަން ގެރީ ނެވިލް ވެސް ބުނީ މި މެޗުގައި އޭނާގެ ކުރީގެ ޓީމު ކުޅުނީ ހީކުރިވަރަށްވުރެ ދަށް ކުޅުމެއް ކަމަށެވެ.

އޭނާ ބުނީ ކޯޗު އެރިކް ޓެންހަގް ވަރަށް އަވަހަށް މި ނަތީޖާއާ މެދު ފިޔަވަޅު އަޅަންޖެހޭ ކަމަށެވެ.

ލިވަޕޫލްގެ ކުރީގެ ޑިފެންޑަރު ގްރޭމް ސޫނެސް ބުނީ ޔުނައިޓެޑް ކޮޅަށްވަން ފުރަތަމަ ގޯލުގެ ޒިންމާ ޑިފެންޑަރު ރަފޭލް ވަރާނޭ ނަގަންޖެހޭ ކަމަށެވެ. އަދި ޔުނައިޓެޑާއި ލިވަޕޫލަށް ވެސް ކުޅުނު މައިކަލް އޮވެން ބުނީ ފުރަތަމަ ގޯލަކީ ޔުނައިޓެޑްގެ ކުޅުންތެރިން ވާހަކަ ނުދައްކައި ތިބުމުގެ ނަތީޖާ ކަމަށެވެ.