ރައީސުލްޖުމްހޫރިއްޔާ މަލާވީގެ ރައީސްއާ ބައްދަލުކުރައްވައިފި
ތަރައްގީގެ ކަންކަމުގައި ދިމާވާ ގޮންޖެހުންތަކުން އަރައިގަތުމާ ގުޅޭގޮތުން މަޝްވަރާކުރެއްވި
މަލާވީ ރައީސްއާއެކު ބޭއްވެވި ބައްދަލުކުރެއްވުން
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް, މަލާވީގެ ރައީސް ލަޒަރުސް ޗަކްވޭރާއާ ބައްދަލުކުރައްވައިފިއެވެ.
މިބައްދަލު ކުރެއްވުން ކުރިޔަށް ދީޔައީ، ދޯހާގައި މިހާރު ކުރިޔަށްދާ، އދ. ގެ އެންމެ ކުޑަކޮށް ތަރައްޤީވެފައިވާ ޤައުމުތަކުގެ 5 ވަނަ ކޮންފަރެންސްގެ ހަވާސާގައެވެ.
މި ބައްދަލުކުރެއްވުމާ ގުޅޭގޮތުން ރައީސް ކުރެއްވި ޓްވީޓެއްގައި ވިދާޅުވީ ތަރައްގީގެ ކަންކަމުގައި ދިމާވާ ގޮންޖެހުންތަކުން އަރައިގަތުމާ ގުޅޭގޮތުން މަޝްވަރާކުރެއްވި ކަމަށެވެ. އަދި އެއް ގައުމުން އަނެއް ގައުމަށް އެއްބާރުލުންދީ، އެހީވުމުގެ މުހިންމުކަމާ ގުޅޭގޮތުން މަޝްވަރާކުރެއްވި ކަމަށް ރައީސް ވިދާޅުވިއެވެ.
ރައީސުލްޖުމްހޫރިއްޔާ ދޯހާއަށް ކުރައްވަމުންގެންދަވާ ދަތުރުފުޅުގައި ގައުމުތަކުގެ އިސްވެރިންނާ ވަކި ވަކިން ބައްދަލުކުރައްވައި ގައުމުތަކާއެކު އޮންނަ ގުޅުން ބަދަހިކުރުމާ ގުޅޭގޮތުން ގެންދަވަނީ މަޝްވަރާކުރައްވަމުންނެވެ.
