އެމްއޯސީގެ އަހަރީ އާންމު ޖަލްސާ ބާއްވައި ބަޖެޓު ފާސްކޮށްފި
އެމްއޯސީން މިއަހަރަށް 72 މިލިއަން ރުފިޔާގެ ބަޖެޓެއް ފާސްކޮށްފައިވާއިރު، އެ ބަޖެޓުގެ 80 އިންސައްތައަކީ ސަރުކާރުން ދޭ ފައިސާ
އެމްއޯސީގެ އަހަރީ އާންމު ޖަލްސާގެ ތެރެއިން
މޯލްޑިވްސް އޮލިމްޕިކް ކޮމެޓީ (އެމްއޯސީ)ގެ އަހަރީ އާންމު ޖަލްސާ ބާއްވައި، މިއަހަރުގެ ބަޖެޓު ފާސްކޮށްފި އެވެ.
އެމްއޯސީގެ އަހަރީ އާންމު ޖަލްސާ ކުރިއަށް ގެންގޮސްފައި ވަނީ ހޮނިހިރު ދުވަހު މީރުމާ ކާނިމާގަ އެވެ. އެމްއޯސީން މިއަހަރަށް 72 މިލިއަން ރުފިޔާގެ ބަޖެޓެއް ފާސްކޮށްފައިވާއިރު، އެ ބަޖެޓުގެ 80 އިންސައްތައަކީ ސަރުކާރުން ދޭ ފައިސާ އެވެ. އެއީ މިއަހަރު ރާއްޖެ އިން ބައިނަލްއަޤުވަމީ ގިނަ ގޭމްސްތަކެއްގައި ވާދަކުރާތީ ކަމަށް އެމްއޯސީން ވަނީ ބުނެފަ އެވެ. ރާއްޖެ އިން މިއަހަރު ބައިނަލްއަޤުވާމީ ފަސް ގޭމްސްއެއްގައި ބައިވެރިވުމަށް ވަނީ ހަމަޖެހިފަ އެވެ. އަހަރީ އާންމު ޖަލްސާގައި ވާހަކަފުޅު ދައްކަވަމުން އެމްއޯސީގެ ރައީސް މުޙައްމަދު ޢަބްދުއް ސައްތާރު (ޗަމްޕީ) ވިދާޅުވީ، މިއަހަރަށް ކަނޑައަޅާފައިވާ ބެޖެޓު މިހާރު ވާނީ ކުޅިވަރާ ބެހޭ ވުޒާރާ އަށް ފޮނުވާފައި ކަމަށެވެ. އަދި މިހާރު އެމްއޯސީ އާއި އެ ވުޒާރާއާ ދެމެދު ބަޖެޓާ ގުޅުން ހުރި މަޝްވަރާތައް ވެސް ކުރެވެމުންދާ ކަމަށެވެ. މީގެ އިތުރުން ޗަމްޕީ ފާހަގަ ކުރެއްވި ގޮތުގައި، މާލީ މުއާމަލާތްތަކާއި މާލީ އެންމެހައި ކަންކަން ކުރިއަށް ގެންދިޔުމަށް އެމްއޯސީން ވަރަށް ބޮޑަށް އިސްކަންދެ އެވެ.
ރާއްޖެ އިން މިއަހަރު ބައިވެރިވާ ގޭމްސްތަކުގެ ތެރޭގައި އިންޑިއަން އޯޝަން އައިލެންޑް ގޭމްސް (އައިއޯއައިޖީ)، އޭޝިއަން ގޭމްސް، އޭޝިއަން އިންޑޯ އެންޑް މާޝަލް އާޓްސް ގޭމްސް، އެނޮކް ވޯލްޑް ބީޗު ގޭމްސް އަދި ކޮމަންވެލްތު ޔޫތު ގޭމްސް ހިމެނެ އެވެ.
