ކެންސަރުގެ އަސަރު ހުރި ފޮޅު ޒާތުގެ ތަނެއް ބައިޑަންގެ ހަށިކޮޅުން ނަގައިފި
މިހާރު ބައިޑަންގެ ހާލު ރަނގަޅު
އެމެރިކާގެ ރައީސް ޖޯ ބައިޑަން
އެމެރިކާ ރައީސް ޖޯ ބައިޑަންގެ މޭފުޅު މަތީގައި ހުރި ފޮޅު ޒާތުގެ ތަނެއް މީގެ މަހެއްހާ ދުވަސް ކުރިން ނެގިއިރު އޭގައި ކެންސަރުގެ އަސަރު ހުރިކަމަށް ވައިޓް ހައުސްގެ ޑޮކްޓަރަކު ކަށަވަރުކޮށްދީފިއެވެ.
ލީޝަން ނުވަތަ ފޮޅަކީ ބައްޔެއްގެ ސަބަބުން ނުވަތަ ޓްރޯމާއެއްގެ ސަބަބުން ހަމުގެޓިޝޫއަށް އަންނަ ބަދަލަކާއެކު, ހަންގަނޑަށް ދިމާވާ މައްސަލައެކެވެ.
ރައީސް ބައިޑަންގެ ޑޮކްޓަރު ކެވިން އޯކޮނަރ ހުކުރު ދުވަހު ވިދާޅުވީ އެ ލީޝަންއަކީ ބެސަލް ސެލް ކާސިނޯމާއެއް ކަމަށެވެ. އަދި އެއީ ހަމުގެ ކެންސަރުގެ އާންމު ވައްތަރެއްކަމަށް ވިދާޅުވެފައި ވެއެވެ.
އެހެން ނަމަވެސް، ރިޕޯޓްތައް ބުނާގޮތުގައި ކެންސަރުގެއަސަރު ހުރި ހުރިހާ ބައިތަކެއް ބައިޑަންގެ ހަށިގަނޑުން މިހާރު ވަނީ ނަގާފައެވެ. އެހެންކަމުން، އިތުރު ފަރުވާއެއް ބައިޑަންއަށް ބޭނުން ނުވާކަމަށް ޑޮކްޓަރުން ބުނެއެވެ. އަދި މޭފުޅު މަތިން ހަން ނެގި ތަންވެސް މިހާރު ފަސޭހަވެފައިވާ ކަމަށް ބައިޑަންގެ ޑޮކްޓަރު ވިދާޅުވެއެވެ.
ކެންސަރުގެ އަސަރު ހުރި ބައިތައް އެއްކޮން ނަގާފައިވީނަމަވެސް ބައިޑަންގެ ރޫޓިން ހެލްތު ޕްލޭންގެ ތެރެއިން ހަމުގެ ސްކްރީނިންތައް ގަވާއިދުން ހައްދަވަމުން ގެންދާނެއެވެ.
ޑރ. އޯކްނަރ ވިދާޅުވާގޮތުގައި އަވަހަށް ފެނުމުން ބެސަލް ސެލްތަކަށް ފަސޭހައިން ފަރުވާ ދެވެއެވެ. އެއީ އާންމުކޮށް އެހެން ކެންސަރުތައް ފަދައިން ފެތުރޭ ބާވަތެއް ނޫންނަމަވެސް ސައިޒުން ބޮޑުވެދާނެތީ ނައްތާލަންޖެހެއެވެ.
ރައީސް ބައިޑަން މިހާރު ހުންނެވީ ހެޔޮ ހާލުކޮޅުގައި ކަމަށާއި، މަސައްކަތަށް ނުކުންނެވިނަމަވެސް މައްސަލައެއް ނެތްކަމަށް މިދިޔަ މަހު ޑޮކްޓަރުން ވަނީ ނިންމާފައެވެެ.
