ޤާނޫނީ ގޮތުން މަސައްކަތްތެރިންނަށް ޔޫނިއަން އުފެއްދުމުގެ ޙައްގު ލިއްބައިދޭ "އިންޑަސްޓްރިއަލް ރިލޭޝަންސް" ބިލު، މި ފެށޭ ހަފުތާގައި ރައްޔިތުންގެ މަޖިލީހަށް ފޮނުވާނެ ކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވީ މޯލްޑިވްސް ޓްރޭޑް ޔޫނިއަން ކޮންގްރެސްގެ މަސައްކަތްތެރިންގެ ޤައުމީ ބައްދަލުވުން ފެށުމުގެ ރަސްމިއްޔާތު ޝަރަފުވެރިކޮށްދެއްވައި ވާހަކަފުޅު ދައްކަވަމުންނެވެ. އެގޮތުން، މި ސަރުކާރުން ފާއިތުވި ހަތަރު އަހަރު ތެރޭގައި މަސައްކަތްތެރިންގެ ހާލަތު ރަނގަޅު ކުރުމަށް މުހިންމު މަސައްކަތެއް ކޮށްފައިވާކަން ރައީސް ފާހަގަކުރެއްވިއެވެ.
ރައީސް ވިދާޅުވީ މަސައްކަތްތެރިންގެ ހާލަތު ރަނގަޅު ކުރުމަށް މި ސަރުކާރުން ކުރި އެންމެ މުހިންމު އެއް ކަމަކީ މިނިމަމް ވޭޖު ތައާރަފު ކުރުން ކަމަށެވެ. މިނިމަމް ވޭޖަކީ ގާނޫނޫގައި ހިމެނިފައި އޮތަސް އެކަން ތަންފީޒު ކުރުމަށް ކުރީ ސަރުކާރުތަކުން މާބޮޑު ސަމާލުކަމެއް ދީފައި އޮތް ކަމެއް ނޫން ކަމަށާއި އެ މަނިކުފާނު ވެރިކަމާ ހަވާލުވެވަޑައިގެން އެންމެ ފުރަތަމަ ހާސިލް ކުރަން ކަނޑައެޅުއްވި ކަންކަމުގެ ތެރޭގައި މިނިމަމް ވޭޖު ތަންފީޒު ކުރުން ހިމެނޭ ކަމަށް ވިދާޅުވިއެވެ. އަދި މިނިމްވޭޖު ތަންފީޒު ކުރަން ފެށީ ދާއިރާގެ ތަޖުރިބާކާރުންގެ ލަފަޔާއި މަޝްވަރާއަށް ރިއާޔަތް ކުރުމަށްފަހު ކަމަށާއި މިނިމަމް ވޭޖުގެ ސަބަބުން ހުރިހާ ދާއިރާއެއްގެ މަސައްކަތްތެރިންނަށް މިއަދު އޭގެ މަންފާ ލިބެމުން އަންނަކަމަށް އެމަނިކުފާނު ވިދާޅުވިއެވެ.
ރައީސް ވިދާޅުވި ގޮތުގައި މިނިމަމް ވޭޖަށް ގެނައި ބަދަލުގެ ސަބަބުން ފަތުރުުވެރިކަމުގެ ދާއިރާގެ 13000 އަށްވުރެ ގިނަ މުވައްޒަފުންނަށް ފައިދާވެ، އަދި ސަރުކާރުގެ ވަޒީފާގައި އުޅޭ 15000 އަށްވިރެ ގިނަ މުވައްޒަފުންގެ އާމްދަނީއަށް ހެޔޮ ބަދަލެއް ވަނީ ގެނެވިފައެވެ. އަދި ފަތުރުވެރިކަމުގެ ސިނާއަތުގައި މަސައްކަތް ކުރާ މީހުންނަށް ސާވިސްޗާޖުގެ ފައިދާ ހަމަހަމައަށް ލިބިދިނުމަށް ގާނޫނަށް ގެނައި ބަދަލަކީ ވެސް މި ސަރުކާރުން ކުރި މުހިންމު މަސައްކަތެއްކަން އެމަނިކުފާނު ފާހަގަކުރެއްވިއެވެ.
ރާއްޖޭގައި ޔޫނިއަން ރަޖިސްޓްރީ ކުރެވޭނެ މަގެއް ކޮށައިދިނުމަކީ ވެސް މަސައްކަތްތެރިންގެ ޙައްގުގައި ކޮށްދޭންޖެހޭ މުހިންމު މަސައްކަތެއްކަން ފާހަގަކުރައްވައި ރައީސް ވިދާޅުވީ އެކަމަށް ބޭނުންވާ "އިންޑަސްޓްރިއަލް ރިލޭޝަންސް ބިލު" އެކުލަވައިލުމުގެ މަސައްކަތް މިހާރު ނިމިފައިވާ ކަމަށެވެ. އަދި މި ފެށޭ ހަފުތާ ތެރޭގައި އެެ ބިލު މަޖިލީހަށް ފޮނުވޭނެ ކަމަށާއި ބިލާ މެދު ހުރި ކަންބޮޑުވުންތައް ޓްރޭޑް ޔޫނިއަނުން ހިއްސާ ކުރުމުން އެ ފަރާތްތަކުން ފާހަގަކުރި ކަންކަމަށް ރިއާޔަތްކުރައްވައި ބިލު އަލުން މުރާޖައާ ކޮށްފައިވާކަން ވެސް އެމަނިކުފާނު ފާހަގަކުރެއްވިއެވެ.
މި ބިލު ގާނޫނަކަށްވުމުން ޔޫނިއަން އުފެއްދުމުގެ ޙައްގު މަސައްކަތްތެރިންނަށް ގާނޫނީ ގޮތުން ކަށަވަރުވެގެންދާނެ. އަދި ވަޒީފާ ދޭ މީހުންނާއި ވަޒީފާ އަދާ ކުރާ މީހުންނާ ދެމެދު އުފެދޭ މައްސަލަތަކާއި ދެބަސްވުންތައް ހައްލު ކުރުމަށް ހަރުދަނާ ނިޒާމެއް ކަނޑައެޅިގެންދާނެ. ހަމައެފަދައިން ދެފަރާތުގެ މެދުގައި އުފެދޭ ދެބަސްވުންތައް ވާހަކަދައްކައިގެން ހައްލުކޮށް ދެ ފަރާތުގެ މެދުގައި ބަދަހި ގުޅުމެއް އުފެއްދުމަށް މަގުފަހިވެގެންދާނެ.ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު
މަސައްކަތްތެރިންގެ އިޖުތިމާއީ ރައްކާތެރިކަން ކަށަވަރު ކުރުމަކީ ސަރުކާރުގެ ވަރަށް މުހިންމު ވައުދެއްކަން ފާހަގަކުރައްވައި ރައީސް ވަނީ ހާއްސަކޮށް، ވަޒީފާ ގެއްލޭ މީހުންނަށް އިޖުތިމާއީ ރައްކާތެރިކަން ހޯދައިި ދިނުމަކީ ކުރަން ޖެހޭ ކަމެއްގެ ގޮތުގައި ސިފަކުރައްވާފައެވެ. އެހެންކަމުން ހަރުދަނާ އުސޫލުތަކެއްގެ ތެރެއިން ބައްޓަން ކުރެވޭ ނިޒާމެއްގެ ދަށުން "އަންއެމްޕްލޯއިމެންޓް އިންޝުއަރެންސް ބެނިފިޓް" ތައާރަފު ކުރުމުގެ މަސައްކަތް ވެސް ސަރުކާރުން ކުރަމުންދާކަން އެމަނިކުފާނު ފާހަގަކުރެއްވިއެވެ. މިކަމަށްޓަކައި ގާނޫނީ އޮނިގަނޑަށް ގެންނަން ޖެހޭ ބަދަލުތަކާ ބެހޭގޮތުން ބޭރުގެ ފަންނީ އެހީއާއެކު ކަމާބެހޭ ގާނޫނުގެ ދެލި ކޮޕީ އެކުލަވައިލުމުގެ މަސައްކަތް ކުރައްވަމުންގެންދަވާ ކަމަށާއި މާލަސްތަކެއް ނުވެ އެ ބިލުވެސް މަޖިލީހަށް ފޮނުވޭނެ ކަމަށް ރައީސް ވިދާޅުވިއެވެ.
މީގެ އިތުރުން މަސައްކަތުގެ މާހައުލުގައި ގާނޫނީ ރައްކާތެރިކަން ކަށަވަރުކޮށްދިނުމުގެ ގޮތުން މުވައްޒަފުން ދިރިއުޅުމަށް ހަމަޖައްސާ ތަންތަނުގެ އާއްމު މިންގަނޑުގެ ގަވާއިދެއް ކަނޑައަޅައި މިހާރު ތަންފީޒު ކުރެވުމުންދާކަމަށް ރައީސް ވިދާޅުވިއެވެ. އަދި މި މަސައްކަތަށް އިތުރު ގާނޫނީ ބާރު ދިނުމުގެ ގޮތުން "އޮކިއުޕޭޝަނަލް ހެލްތު އެންޑް ސޭފްޓީ ބިލު" މަޖިލީހަށް ފޮނުވާފައިވާނެ ކަމަށާއި އެ ބިލު ދިރާސާ ކޮށް އަވަހަށް މަޖިލީހުން ބިލު ނިންމައިދިނުމަށް އެމަނިކުފާނު އެދިވަޑައިގެންނެވިއެވެ.
ރައީސް ވިދާޅުވި ގޮތުގައި ވަޒީފާ ބޭނުންވާ ފަރާތްތަކާއި ވަޒީފާ އަދާ ކުރާ ފަރާތްތަކަށް ހުރި ގިނަ ގޮންޖެހުންތައް މި ސަރުކާރުން ހުށަހަޅާ ބިލުތަކުން ލިބިގެންދާނެއެވެ. އަދި ރާއްޖެއަކީ ޙައްގުތައް ކަށަވަރުވެފައިވާ އަމާން މާހައުލެއްކަމުގައި ވެގެންދިއުމަކީ އުއްމީދެއް ކަމަށް ވެސް އެމަނިކުފާނު ވިދާޅުވިއެވެ.
ރައީސް ވަނީ ވަޒީފާ ހޯދައިނުމަށް ވެސް ގިނަ މަސައްކަތްތައް މި ސަރުކާރުން ކުރާކަން ފާހަގަކުރައްވާފައެވެ. އެގޮތުން ދާދިފަހުން ތައާރަފު ކުރި ނޭޝަނަލް ޖޮބް ސެންޓަރަކީ މި ކަމުގެ ވަރަށް މުހިންމު ފިޔަވަޅެއް ކަމަށް ވިދާޅުވިއެވެ.
