ހުޅުމާލެ ދެވަނަ ފިޔަވަހީގެ ވަގުތީ މާރުކޭޓު ގޮޅިތަކަށް އެދުމުގެ ފުރުސަތު އެޗްޑީސީން ހުޅުވާލައިފި
3 މާރިޗު 2023 | ހުކުރު 12:57ގޮޅިތަކަށް އެދި ހުށަހަޅާ ފޯމުތައް ބަލައިގަންނާނީ 9 މާޗު 2023ވާ ބުރާސްފަތި ދުވަހު ހެނދުނު 9:30 އިން 11:00 އަށް
ހިޔާ މަޝްރޫއުގެ ދަށުން އަޅާފައިވާ ފްލެޓްތައް
ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން ހުޅުމާލެ ދެވަނަ ފިޔަވަހީގައި ހުޅުވާ ވަގުތީ މާރުކޭޓުގެ ގޮޅިތަކަށް އެދުމުގެ ފުރުސަތު ހުޅުވާލައިފިއެވެ.
އެޗްޑީސީން މި މާރުކޭޓުން 18 ގޮޅިއެއް ދޫކުރަން ނިންމާފައިވާއިރު ނުވަ ގޮޅި ހާއްސަކޮށްފައިވަނީ ހުޅުމާލޭގައި ދިރިއުޅޭ ފަރާތްތަކަށެވެ. އެގޮތުން، އެ ކުންފުނިން ފުރުސަތު ހުޅުވާލީ މި ނުވަ ގޮޅިއަށެވެ.
ހިޔާ ސަރަހައްދުގައި ރޯދަ މަހަށް ހާއްސަ ކޮށްގެން މާރުކޭޓެއް ހުޅުވަން އެޗްޑީސީން ނިންމީ، ރޯދަ މަހު އެ ސަރަހައްދުގައި ދިރިއުޅޭ ރައްޔިތުންނަށް ފަސޭހަކަމާއެކު ކާބޯތަކެތި ލިބޭނެ ގޮތް މަގު ފަހިކޮށްދިނުމުގެ ބޭނުމުގައެވެ.
އެޗްޑީސީން ބުނެފައިވާ ގޮތުގައި މި ގޮޅިތަކަށް އެދި ހުށަހަޅާ ފޯމުތައް ބަލައިގަންނާނީ 9 މާޗު 2023ވާ ބުރާސްފަތި ދުވަހު ހެނދުނު 9:30 އިން 11:00 އަށެވެ.
މި މާރުކޭޓުން ގޮޅި ދޫކުރުމަށް ހަމަޖެހިފައިވަނީ ފޯމު ހުށަހަޅާ ފަރާތްތަކުގެ ތެރެއިން ޝަރުތުހަމަވާ ފަރާތްތަކުގެ މެދުގައި ގުރުއަތުން ނަގައިގެންނެވެ. ގުރުއަތުލުން އޮންނާނީ ފޯމު ބަލައިގަންނަ ތާރީހުގައި ފޯމު ބަލައިގަތުން ނިމުމުން ކަމަށް އެޗްޑީސީން ބުންޏެވެ.
އެޗްޑީސީން މި ގޮޅިތައް ދޫކުރަން ހަމަޖެހިފައިވަނީ ދެ މަސް ދުވަހަށެވެ. އެގޮތުން ދެ މަސްދުވަހަށް 5،000 ރުފިޔާ، ކުލީގެ ގޮތުގައި ވަނީ ކަނޑައަޅައިފައެވެ.
ރޯދަ މަހު މާރުކޭޓުގެ ޚިދުމަތްތަކަށް އޮންނަ ޑިމާންޑު އިތުރުކަން ފާހަގަކޮށް އެޗްޑީސީން ބުނީ، އެ ކުންފުނިން ރައްޔިތުންނަށް ލުއި ގޮތްތައް ހޯދައިދިނުމަށް މާލޭ ސިޓީ ކައުންސިލަށް ވެސް ވަގުތީ މާރުކޭޓެއް ހަދަން ބިން ހަމަޖައްސާފައިވާ ކަމަށެވެ. ސިޓީ ކައުންސިލުން ވެސް މިހާރު ވަނީ އެ މާރުކޭޓުން ދޫކުރާނެ ގޮޅިތަކަށް އެދުމުގެ ފުރުސަތު ވެސް ހުޅުވާލާފައެވެ.
މާލޭ ސިޓީ ކައުންސިލުގެ އިތުރުން ރައްޔިތުންނަށް ބޭނުންވާ ކާބޯތަކެތި ފޯރުކޮށްދިނުމަށް ދެވަނަ ފިޔަވަހިން އެސްޓީއޯއަށް ވެސް އެޗްޑީސީން ވަނީ އެހީތެރިކަން ފޯރުކޮށްދީފައެވެ. އެގޮތުން، ވިނަރެސް ފްލެޓުތަކުގެ ކޮމަރޝަލް ބްލޮކްގައި އެސްޓީއޯގެ ޚިދުމަތް ފޯރުކޮށްދިނުމަށް ޔުނިޓެއް ކަނޑައަޅައި މިދިޔަ މަހު ހަވާލުކޮށްފައި ވާނެކަމަށް އެޗްޑީސީން ބުނެއެވެ.
އެޗްޑީސީން ބުނީ ރައްޔިތުންގެ ލާބަޔާއި މަންފާއަށް ކުރެވޭ ކޮންމެ ކަމަކީ ވެސް އެ ކުންފުނިން ބަލައިގަންނާނެ ކަމެއް ކަމަށާއި، އެފަދަ ކަންކަމަށް އެ ކުންފުނީގެ އެއްބާރުލުން ހުރިހާ މުއައްސަސާއަކަށް ވެސް ލިބޭނެ ކަމުގެ ޔަގީންކަން ދޭކަމަށެވެ.
