އެއްފައިން ކުޅެ، މޮޅު ގޯލެއް ޖެހި މާސިން އެލެކްސީގެ ވާހަކަ

ފީފާއިން ހޮވާ އަހަރުގެ އެންމެ މޮޅު ގޯލު ޖެހުމަކީ ކޮންމެ ފުޓްބޯޅަ ކުޅުންތެރިއެއްގެ ވެސް ހުވަފެނެކެވެ. 2019 ވަނަ އަހަރު ފީފާ ޕުސްކާސް އެވޯޑްގެ ނަމުގައި މި އިނާމް ތައާރްފަކުރުމާއެކު ކުޅުންތެރިންގެ މެދުގައި އެވޯޑުގެ ވާދަވެރިކަން ވަރަށް ބޮޑުވިއެވެ. މިއަށްފަހު މިހާތަނަށް މިއެވޯޑް ހާސިލްކުރީ މުޅިން ވެސް ފުރިހަމަ ސިއްހަތެއްގައި، ގަދަވެ ސަލާމަތުން ތިބި ކުޅުންތެރިންނެވެ. ނަމަވެސް ހޯމަ ދުވަހުގެ ރޭ ފީފާ ޕުސްކާސް އެވޯޑް ލިބުނީ ވަރަށް ހާއްސަ ކުޅުންތެރިއަކަށެވެ.

އެއީ ޕޮލެންޑްގެ މާސިން އެލެކްސީއެވެ. އޭނާއަކީ އަސައެއްގެ އެހީގައި ކޮޅަށްހުރެ، އެއްފައިން ފުޓްބޯޅަ ކުޅޭ ކުޅުންތެރިއެކެވެ. އެލެކްސީ ޕުސްކާސް އެވޯޑް ހޯދިއިރު އޭނާއަކީ ކާކުކަން ފީފާ ދަ ބެސްޓް އެވޯޑްސް ހަފުލާ ބަލަމުންދިޔަ ގިނަ ބަޔަކަށް ވެސް ނޭނގުނެވެ. ނަން ގޮވުމާއެކު އޭނާ ފެންކަޅިވިއެވެ. އެވޯޑް ބަލައި އޭނާ ސްޓޭޖަށް އެރީ ބާރަށް ހިނގާފައި ގޮހެވެ. މިއީ ގިނަ ބަޔަކަށް އޭނާ ފާހަގަކުރަން ނޭނގުނު އެއް ސަބަބެވެ.

އެލްކްސީއާއެކު އެވޯޑަށް ވާދަކުރި އަނެއް ދެ ކުޅުންތެރިންނަކީ އެންމެންނަށް ވެސް ފަރިތަ ދެ ކުޅުންތެރިންނެވެ. ބްރެޒިލްގެ ފޯވަޑް ރިޗާލިސަންއާއި މާސޭއަށް ކުޅޭ ފްރާންސްގެ ޑިމިޓްރީ ޕަޔެޓްއެވެ. އެކަމަކު މި ދެ ކުޅުންތެރިން ފަހަތަށް ޖައްސައި އެލެކްސީ ކުރިހޯދީ އާދަޔާހިލާފު މޮޅު ގޯލަކުންނެވެ.

އެއް ފައި ބުރިކޮށްލާފައި ހުރުމުން ދަނޑުމަތީގައި ހަރަކާތްތެރިވެ އުޅުމަށް އޭނާއަށް ކުރިމަތިވެފައިވާ ހުރި އެތައް ގިނަގުނަ އުނދަގޫތަކާއެކު، އެލެކްސީ ޕޮލެންޑް އެމްޕުޓީ ފުޓްބޯޅަ ލީގުގައި ގޯލް ޖެހީ އިދިކޮޅު ޕެނަލްޓީ ބޮކްސްމަތިން ފުންމައިގެން އަރައި ބައިސްކަލް ކިކަކުންނެވެ. އެއީ އޭނާ ކުޅޭ، ވާޓާ ޕޮޒްނަންއާއި ސްޓަލް ރިސްޒޯ ކުޅުނު މެޗުގައެވެ. އޭނާގެ މި ލަނޑަކީ ޓީމުގެ ކުޅުންތެރިންނަށް ވެސް ގަބޫލުކުރަން ދަތިވި ލަނޑެކެވެ.

މާޓިން އެލެކްސީ އަކީ އެންމެ ފުރަތަމަ ގޯލްކީޕަރަކެވެ. ދިރިއުޅުމަށް ކުރަމުންދިޔަ މަސައްކަތަކީ ކޮންސްޓްރަކްޝަން މަސައްކަތެވެ. އުމުރުން 23 އަހަރުގައި އޭނާގެ ފައި ބުރިކޮށްލަން ޖެހުނީ މަގު ހަދަން ގެންގުޅުނު ކޮންކްރީޓް މެޝިނެއް ފައިމައްޗަށް ވެއްޓި، ލިބުނު އަނިޔާއިން އަރައިގަނެ، ފުރާނަ ސަލާމަތްކުރުމަށް، އެ ފައި ބުރިކޮށްލަން ޑޮކްޓަރުން ލަފާދިނުމުންނެވެ.

މި ހާދިސާއަށް 12 އަހަރު ފަހުން އެމްޕުޓީ، ކުޅުންތެރިއެއްގެ ގޮތުގައި ގައުމު ތަމްސީލުކުރަން ފުޓްބޯޅަ ބޫޓަށް އެރި ނަމަވެސް ކޮންސްޓްރަކްޝަން މަސައްކަތް ދޫކޮށެއްނުލައެވެ. މިހާރު އޭނާއަކީ ކޮންސްޓްރަކްޝަން ދާއިރާގެ ވިޔަފާރިވެރިއެކެވެ. އޭނާ ވަނީ މިދިޔަ އަހަރު ބޭއްވި އެމްޕުޓީ ވޯލްޑްކަޕްގައި ޕޮލެންޑްގެ ގައުމީ ޓީމް ވެސް ތަމްސީލުކޮށްފައެވެ.

އޭނާ ބުނީ އެއްފައި ގެއްލުމާއެކު ހަޔާތުގައި ހިތްދަތި ދުވަސްތަކެއް ވޭތުކުރަން ޖެހުނު ކަމަށެވެ.

ވާތުފައި ބުރިކޮށްލުމަށްފަހު އަލުން ފުޓްބޯޅައެއްގައި ފުރަތަމަ ފަހަރަށް އޭނާ ފައި ޖައްސާލީ ފަސް އަހަރުވީ ދަރިފުޅާ އެކުގައެވެ.

އެއީ ތެދެކެވެ. ޕުސްކާސް އެވޯޑާއެކު އޮލެކްސީގެ ނަން ދުނިޔޭގެ އެތަން މިތަނުގައި ވިދާލައިފިއެވެ. ރާއްޖެއެމްވީގެ ވެބްސައިޓު މެދުވެރިކޮށް، މުޅި ދިވެހިރާއްޖެއަށް ވެސް އެލެކްސީ މަޝްހޫރުވީއެވެ. ސޯޝަލް މީޑިޔާގައި އޭނާ ފޮލޯކުރާ މީހުންގެ އަދަދު އިތުރުވެގެންދަނީ ރޮކެޓް ސްޕީޑުގައެވެ.