ދައުލަތުގެ އިންޓަރނަލް އޮޑިޓް ކޮންފަރެންސް ފަށައި، އޮޑިޓް ޕޯޓަލް ލޯންޗުކޮށްފި

ދައުލަތުގެ އިންޓަރނަލް އޮޑިޓް ކޮންފަރެންސް ބުދަ ދުވަހު ފަށައިފިއެވެ.

މި ކޮންފަރެންސްގައި ޝަރަފުވެރި މެހެމާނެއްގެ ގޮތުން ބައިވެރިވަޑައިގެންނެވީ ކޮމިޝަނަރ އޮފް ޓެކްސޭޝަން ފަތުހުﷲ ޖަމީލެވެ.

ރަސްމިއްޔާތުގެ ތެރެއިން އޮޑިޓް ޕޯޓަލް އިފްތިތާހްކޮށްދެއްވީ އޮޑިޓަރ ޖެނެރަލް ހުސެއިން ނިޔާޒީއާއި ސްޓޭޓް އިންޓަރނަލް އޮޑިޓް ކޮމިޓީގެ ޗެއަރ ހަސަން މުހައްމަދުއެވެ.

ބުރާސްފަތި ދުވަހުގެ ނިޔަލަށް ކުރިއަށްދާ މި ކޮންފަރެންސްގައި ރާއްޖޭގެ އޮޑިޓް ދާއިރާގައި މަސައްކަތްކުރާ ފުންނާބު އުސް ބޭފުޅުންގެ ތަޖުރިބާތައް ހިއްސާ ކުރާނެއެވެ. އަދި އިންޓަރނަލް އޮޑިޓަރުންނަށް ދިމާވާ ގޮންޖެހުންތަކާއި އެ މައްސަލަތައް ހައްލުކުރާނެ ގޮތާ ގުޅޭގޮތުން މަޝްވަރާތައް ކުރިއަށްދާނެއެވެ.

ރަސްމިއްޔާތުގައި ވާހަކަފުޅު ދައްކަވަމުން ދައުލަތުގެ އިންޓަރނަލް ކޮމެޓީގެ ޗެއަރ ހަސަން މުހައްމަދު ވިދާޅުވީ އުންމީދަކީ އޮޑިޓް ކޮންފަރެންސް އަކީ ކޮންމެ އަހަރަކު ބޭއްވޭ ކޮންފަރެންސަކަށްވުން ކަމަށެވެ. ދައުލަތުގެ އިންޓަރނަލް އޮޑިޓް ކޮމެޓީގެ ހާލަތާއި ކޮމެޓީގެ މަސައްކަތް ކުރިއެރުވިދާނެ ކަންތައްތަކަށް ހަސަން މުހައްމަދު ވަނީ ވާހަކަފުޅު ދައްކަވާފައެވެ.

މި ރަސްމިއްޔާތުގެ ތެރެއިން ދައުލަތުގެ އިންޓަރނަލް އޮޑިޓްގެ ސްޓްރެޓެޖިކް އެކްޝަން ޕްލޭން ވެސް ވަނީ ލޯންޗުކޮށްފައިވެއެވެ. މި އެކްޝަން ޕްލޭން ލޯންޗުކޮށްދެއްވީ ކޮމިޝަނަރ އޮފް ޓެކްސޭޝަން ފަތުހުﷲ ޖަމީލެވެ.

މި ކޮންފަރެންސް އަމާޒުކޮށްފައިވަނީ ދައުލަތުގެ އިދާރަތަކާއި ސަރުކާރު ހިއްސާވާ ކުންފުނިތަކުގެ އިންޓަރނަލް އޮޑިޓް ޑިޕާޓްމަންޓުތަކަށެވެ.

މިކޮންފަރެންސްގައި ސަރުކާރުގެ އިދާރާތަކުން 300 މީހުން ބައިވެރިވެފައިވާއިރު ލޯކަލް ކައުންސިލްތަކުން ބައިވެރިވާ ފަރާތަތަކުގެ އިތުރުން އޮންލައިންކޮށްވެސް 400 ފަރާތަކުން މި ކޮންފަރެންސްގައި ބައިވެރިވާނެއެވެ. އެހެންކަމުން މިއީ މިދާއިރާއިން ރާއްޖޭގައި ބޭއްވޭ އެންމެ ބޮޑު އެއް ކޮންފަރެސަށް ވެގެންދާނެއެވެ.

އޮޑިޓް ޕޯޓަލްއަކީ ފިނޭން މިނިސްޓްރީގެ ބަނޑޭރި ޕޯޓަލްގެ މޮޑިއުލްއެކެވެ. މިމޮޑިއުލްގައި ދައުލަތުގެ އޮފީސްތަކުގެ އޮޑިޓްގެ މެމްބަރުންގެ މަޢުލޫމާތާއި ކޮމިޓީތަކަށް އައްޔަންކުރެވޭ ފަރާތްތަކުގެ މަޢުލޫމާތުވެސް ބަލަހައްޓާނެއެވެ.