ފިނޭންސް މިނިސްޓްރީ އާއި އެސްޑީއެފް ބެލެހެއްޓުމުގެ މަސައްކަތް ހަވާލުކުރަން ފާސްކޮށްފި
އިދާރާތަކާ އެކު މަޝްވަރާކުރުމަށް ފަހު ކޮމިޓީން އެ ވަނީ ބިލަށް އިސްލާހު ގެނެސްފަ
ފިނޭންސް މިނިސްޓަރ އިބްރާހީމް އަމީރު
ފިނޭންސް މިނިސްޓްރީ އާއި ސޮވަރިން ޑިވެލޮޕްމަންޓް ފަންޑް (އެސްޑީއެފް) ބެލެހެއްޓުމުގެ މަސައްކަތް ހަވާލުކުރަން ރައްޔިތުންގެ މަޖިލީހުން ފާސްކޮށްފި އެވެ.
އެ މައްސަލަ އަށް ރައްޔިތުންގެ މަޖިލީހުގެ މާލިއްޔަތު ކޮމިޓީން ބަހުސްކުރުމަށްފަހު ނިންމި ގޮތުގެ ރިޕޯޓު މަޖިލީހުން ފާސްކޮށްފައި ވަނީ ހޯމަ ދުވަހު އެވެ. އެގޮތަށް ފާސްކޮށްފައި ވަނީ 43 މެންބަރުންގެ ވޯޓާއި އެކުގައެވެ. އެ ކަމާއި ދެކޮޅަށް ވޯޓު ދެއްވީ އެންމެ މެންބަރެކެވެ. ސަރުކާރުގެ ފަރާތުން މިދިޔަ އަހަރުގެ މަޖިލީހުގެ ދެވަނަ ދައުރުގައި މި އިސްލާހު ހުށަހެޅުއްވީ ފުވައްމުލަކު ދެކުނު ދާއިރާގެ މެންބަރު މުހައްމަދު މުމްތާޒް އެވެ. އޭނާ ހުށަހެޅުއްވި އިސްލާހުގައިވާ ގޮތުން އެސްޑީއެފްއަކީ މާލިއްޔަތު ގާނޫނުގައިވާ ވަކި އުސޫލުތަކެއްގެ ދަށުން ބަލަހައްޓަން ޖެހެއެވެ.
ދައުލަތުގެ މާލިއްޔަތު ގާނޫނަށް ހުށަހެޅި އިސްލާހުގައި ބުނެފައި ވަނީ އެސްޑީއެފަށް ފައިސާ ޖަމާކުރުމާއި އެ ފަންޑުން ހަރަދުކުރާނެ ގޮތް ރައީސުލްޖުމްހޫރިއްޔާ ނިންމަވާނީ ފިނޭންސް މިނިސްޓަރުގެ ލަފާގެ މަތިން ކަމަށެވެ. މީގެ އިތުރުން އެ ފަންޑު ބަލަހައްޓާނީ ފިނޭންސް މިނިސްޓްރީން ކަމަށް ވަނީ ބަޔާންކޮށްފައިއެވެ. މިހާރު އޮތް ގޮތުން އެސްޑީއެފް ބަލަހައްޓަމުން ގެންދަނީ މޯލްޑިވްސް މަނިޓަރީ އޮތޯރިޓީންނެވެ.
އެ އިސްލާހުގައި އިތުރަށް ބުނެފައި ވަނީ އެސްޑީއެފް އިންވެސްޓް ކުރާނެ ގޮތްތައް ނިންމަން ފިނޭންސް މިނިސްޓަރުގެ ލަފާގެ މަތިން ރައީސް ފަސް މެންބަރުންގެ ކޮމިޓީއެއް އެކުލަވާލަން ޖެހޭނެ ކަމަށެވެ. އަދި އެސްޑީއެފް ހިންގާނެ އުސޫލުތައް މާލިއްޔަތު ގަވާއިދުގައި ލިޔެ އޮޑިޓްކޮށް ހިސާބުތައް ތައްޔާރުކުރަން ވެސް ޖެހޭނެ ކަމަށް ވަނީ ބުނެފައެވެ. އެ އިސްލާހާއި ގުޅިގެން އިދާރާތަކާ އެކު މަޝްވަރާކުރުމަށް ފަހު ކޮމިޓީން އެ ވަނީ ބިލަށް އިސްލާހު ގެނެސްފައެވެ. އެ އިސްލާހުގައި ދައުލަތުގެ ނަމުގައި ދަރަންޏަށް ފައިސާ ނެގުމާއި ގެރެންޓީ ދޫކުރުމުގެ ބާރު ހަމައެކަނި މިނިސްޓަރަށް ލިބިދޭ ގޮތަށް އޮތް މާއްދާ ގާނޫނުގައި ކުރިންވެސް އޮތް ގޮތަށް ބޭއްވުމަށް ވަނީ ނިންމާފައެވެ.
