އޮޑިޓިންގ ދާއިރާއިން މީހުން ލިބުމުގައި އަދިވެސް ދަތިތައް އެބަހުރި ކަމަށާއި, ފިނޭންސް މިނިސްޓްރީން އަންނަ މަހު ބާއްވަން ނިންމާފައިވާ ދައުލަތުގެ އިންޓަރނަލް އޮޑިޓް ކޮންފަރެންސްގައި އެ ދާއިރާއަށް މީހުން ޝައުގުވެރިކުރުވުމަށް މަސައްކަތް ކުރާނެ ކަމަށް އެ މިނިސްޓްރީން ބުނެފިއެވެ.

"ރާއްޖެޓީވީ"ގެ ފަލަސުރުހީގައި ވާހަކަފުޅުދައްކަވަމުން ފިނޭންސް މިނިސްޓްރީގެ ސްޓޭޓް އިންޓަރނަލް އޮޑިޓް ކޮމިޓީ މެމްބަރު މުހައްމަދު ޝިފާއު އިބްރާހީމް ވިދާޅުވީ، މިއީ ދައުލަތުގެ ހުރިހާ އިދާރާއެއްގެ އިންޓަރނަަލް އޮޑިޓްގެ މުވައްޒަފުންނާއި ދާއިރާގެ ހުރިހާ ބޭފުޅުން އެއްތަނަކުން ބައްދަލުވެ މައުލޫމާތު ހިއްސާ ކުރުމާއި ޓްރެއިނިން ހިންގުމަށް ކުރިއަށްގެންދާ ހަރަކާތެއް ކަމަށެވެ. އަދި މި ހަރަކާތުގެ މައިގަނޑު މަގުސަދަކީ އެއްބަޔަކު އަނެއްބަޔަކަށް ދެނެގަނެ އެއްބަޔަކު އަނެއްބަޔަކު ކުރާ މަސައްކަތްތައް ދެނެގަތުން ކަމަށް އޭނާ ވިދާޅުވިއެވެ.

މީގެ އިތުރުން، އޮޑިޓިންގ ދާއިރާގެ ތަޖުރިބާކާރުން އެ ފަރާތްތަކުގެ ތަޖުރިބާ މި ކޮންފަރެންސްގައި ހިއްސާކުރާނެ ކަމަށާއި، އޭގެ ސަބަބުން ދާއިރާގައި މަސައްކަތްކުރާ މުވައްޒަފުންނަށް ވަރަށް ބޮޑު ފައިދާއެއް ވާނެކަމަށް ފިނޭންސް މިނިސްޓްރީން ގަބޫލުކުރާ ކަމަށްވެސް އޭނާ ވިދާޅުވިއެވެ.

ޝިފާއު ވިދާޅުވީ މައިގަނޑުގޮތެއްގައި އޮޑިޓިންގ ދާއިރާގައި ފާހަގަކުރެވެނީ މުވައްޒަފުންގެ ތަޖުރިބާއާއި ދާއިރާއަށް ޝައުގުވެރިކަން ހުންނަ ފަރާތްތައް މަދުކަން ކަމަށެވެ. އެހެންކަމުން އެކަމަށް ފޯކަސްކޮށްގެން ޓްރެއިނިންތައް ކުރިއަށް ގެންދާނެކަމަށް އޭނާ ވިދާޅުވިއެވެ.

މި ކޮންފަރެންސް އޮންނާނީ އަންނަ މާޗް 1ން 2ށް ދަރުބާރުގޭގައެވެ. މި ކޮންފަރެންސްގައި ރާއްޖޭގެ އޮޑިޓް ދާއިރާގައި މަސައްކަތްކުރާ ފުންނާބު އުސް ބޭފުޅުންގެ ތަޖުރިބާތައް ހިއްސާ ކުރާނެއެވެ. އަދި އިންޓަރނަލް އޮޑިޓަރުންނަށް ދިމާވާ ގޮންޖެހުންތަކާއި އެ މައްސަލަތައް ހައްލުކުރާނެ ގޮތާ ގުޅޭގޮތުން މަޝްވަރާތައް ކުރިއަށްދާނެއެވެ.

މި ކޮންފަރެންސް އަމާޒުކޮށްފައިވަނީ ދައުލަތުގެ އިދާރަތަކާއި ސަރުކާރު ހިއްސާވާ ކުންފުނިތަކުގެ އިންޓަރނަލް އޮޑިޓް ޑިޕާޓްމަންޓުތަކަށެވެ. އަދި އިންޓަރނަލް އޮޑިޓް ކޮމިޓީތަކާއި އަތޮޅު ކައުންސިލްތަކާއި ރަށު ކައުންސިލްތަކުގެ ފައިނޭންސް ދާއިރާގައި މަސައްކަތްކުރާ ފަރާތްތައްވެސް ބައިވެރިވާނެ ކަަމަށް ފިނޭންސުން ބުންޏެވެ.

މި ކޮންފަރެންސަށް ހާޒިރުވެގެން 300އެއްހާ މީހުން ބައިވެރިވާނެ ކަމަށް ފިނޭންސް މިނިސްޓްރީން ބުންޏެވެ. އަދި 402 މީހުން އޮންލައިންކޮށް ބައިވެރިވާއިރު، އޮންލައިންކޮށް 1000 މީހުންނަށް ކޭޓަރ ކުރެވޭނެ ކަމަށް އުއްމީދުކުރާ ކަމަށްވެސް އެ މިނިސްޓްރީން ބުނެއެވެ.

މި ކޮންފަރެންސްގެ ތީމަކީ "ޝިފްޓިން މައިންޑްސެޓް އެޑިން ވެލިއު ތުރޫ އިންޓަރނަލް އޮޑިޓް"އެވެ.