ގޭންގު ކުށްތައް މަނާކުރުމުގެ ގާނޫނަކީ ބޭނުންކުރެވޭ ގޮތަށް އޮތް ގާނޫނެއް ނޫން: ޕީޖީ
26 ފެބުރުއަރީ 2023 | އާދީއްތަ 10:10ގޭންގު ކުށްތައް ހުއްޓުވަން ސަރުކާރުން މަސައްކަތްކުރާކަމަށް ވިދާޅުވި
ޕްރޮސެކިއުޓަރ ޖެނެރަލް ހުސައިން ޝަމީމް ނޫސްވެރިންނާ ބައްދަލުކުރައްވަނީ
ގޭންގު ކުށްތައް މަނާކުރުމާބެހޭ ގާނޫނަކީ މިހާރު ބޭނުންކުރެވޭ ގޮތަށް އޮތް ގާނޫނެއް ނޫންކަމަށް, ޕްރޮސިކިއުޓަރ ޖެނެރަލް ހުސައިން ޝަމީމް ވިދާޅުވެއްޖެއެވެ.
އާދީއްތަ ދުވަހު ނޫސްވެރިންނާ ބައްދަލު ކުރައްވައި ޕީޖީ ވިދާޅުވީ، ގޭންގުތަކާ ގުޅޭ މައްސަލަތަކެއް މި ދުވަސްވަރުވެސް ފެންމަތިވެފައިވާކަމަށާއި އެ ބާވަތުގެ މައްސަލަތަކުގައި ޕީޖީން ދައުވާކުރާނެކަމަށެވެ. އަދި ފުލުހުން ތަހުގީގުކޮށްފައި ފޮނުވުމުން އަޅަންޖެހޭ ފިޔަވަޅުތައް އެ އޮފީހުން އަޅަމުން ގެންދާނެކަމަށް ޕީޖީ ވިދާޅުވިއެވެ.
ޝަމީމް ވިދާޅުވީ، ބޭނުންވަނީ އެ ގޮތަށް ހުށަހަޅާ މައްސަލަތައް އަވަހަށް ކޯޓުން ނިމެންކަމަށާއި، އެންމެ ބޮޑަށް ދިމާވާ ގޮންޖެހުމަކީ ޝަރީއަތް ނިމެންދެން މީހުން ބަންދުގައި ތިބުން ކަމަށެވެ. ހާއްސަކޮށް މުޖުތަމައަށް ނުރައްކާވާ ގޮތަށް ހުންނަ މައްސަލަތައް އަވަހަށް ނިމެން ބޭނުންވާކަން އޭނާ ފާހަގަކުރެއްވިއެވެ.
ގޭންގު ކުށްތަކާގުޅޭ ގާނޫނާ ގުޅިގެން ނޫސްވެރިއަކު ކުރެއްވި ސުވާލަކަށް ޖަވާބުދެއްވަމުން ޕީޖީ ވިދާޅުވީ، އެ ގާނޫނުގެ ދަށުން އަދި ރާއްޖޭގައި ކޮށްފައި އޮތީ އެންމެ ދައުވާއެއް ކަމަށެވެ. އެ ގާނޫނަކީ ކުރީ ޒަމާނުގައި ލިޔެފައި އޮތް ގާނޫނެއް ކަމުން އެ ގާނޫނު އޮތީ މާ ފަހި ގޮތަކަށް ނޫންކަމަށްވެސް ޝަމީމް ވިދާޅުވިއެވެ. އަދި ގާނޫނުގައި އެއްޗެއް ލިޔާއިރުގައި އަމަލީ ގޮތުން އެކަން ކުރާނެ ގޮތެއްވެސް ހޯދަންޖެހޭ ކަމަށް ވިދާޅުވިއެވެ.
ގާނޫނުލްއުގޫބާތުގައި ހުރިހާ ކުށެއް ހިމެނުމަކީ ވަރަށް ބޮޑު މަސައްކަތެއް ކަމަށާއި، ބަންޑާރަ ނައިބު އެ މަސައްކަތް ކުރައްވަން އެބަ ގަސްދުވެސް ކުރައްވާ ކަމަށް ވިދާޅުވިއެވެ. އަދި އަމަލީ ގޮތުން މަސައްކަތްކުރާއިރު ގޭންގު ކުށްތަކުގެ ގާނޫނަކީ މިހާރު ބޭނުން ކުރެވޭ ގޮތަށް އޮތް ގާނޫނެއް ނޫން ކަމަށްވެސް އޭނާ ވިދާޅުވިއެވެ.
އިތުރަށް ޝަމީމް ވިދާޅުވީ، ގޭންގު ކުށްތައް ހުއްޓުވުމަށްޓަކައި ސަރުކާރުން މަސައްކަތްތަކެއް ކުރައްވާ ކަމަށާއި އެކަމަށް ހާއްސަ، ރައީސުލްޖުމްހޫރިއްޔާގެ ޓާސްކުފޯހެއް ވެސް އޮންނަ ކަމަށެވެ. އަދި ސިފައިންނާއި ފުލުހުން ގުޅިގެން ހިންގާ އޮޕަރޭޝަންގެ ސަބަބުން ގޭންގު ކުށްތައް ކޮންމެވެސް ވަރަކަށް މަދުވެއްޖެ ކަމަށްވެސް އޭނާ ވިދާޅުވިއެވެ.
