އަމާޒަކީ ރާއްޖޭގައި އޮތް ހުރިހާ ގޭންގެއް ނައްތާލުން: މިނިސްޓަރު އިހުސާން
މަސައްކަތް ކުރަމުންދާނީ ޒީރޯ ޓޮލަރެންސްގައި
ފުލުހުންގެ ޚިދުމަތުގެ ކުރިއަށް އޮތް ފަސް އަހަރުގެ ސްޓްރެޓެޖިކް ޕްލޭން އިފްތިތާހު ކުރި ރަސްމިއްޔާތުގައި ހޯމް މިނިސްޓަރު އަލީ އިހުސާން ވާހަކަދައްކަވަނީ
އަމާޒަކީ ރާއްޖޭގައި އޮތް ހުރިހާ ގޭންގެއް ނައްތާލުން ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެއެވެ.
ފުލުހުންގެ ޚިދުމަތުގެ ކުރިއަށް އޮތް ފަސް އަހަރުގެ ސްޓްރެޓެޖިކް ޕްލޭން އިފްތިތާހު ކުރި ރަސްމިއްޔާތުގައި ވާހަކަ ދައްކަވަމުން މިނިސްޓަރު އިހުސާން ވިދާޅުވީ އަމާން ވެއްޓެއް ގާއިމްކުރުމަށް އިސްކަންދޭ ކަމަށާއި، ގޭންގުތައް ހަދައިގެން ރާއްޖޭގައި އަމަންއަމާންކަން ނަގާލާފައި މިއޮތް އޮތުން ބަދަލުކުރާނެ ކަމަށެވެ.
މިނިސްޓަރު އިހުސާން ވިދާޅުވީ، އަމާޒަކީ މިފަސް އަހަރުގެ ތެރޭގައި ހުރިހާ ގޭންގުތައް ނާއްލުން ކަމަށާ، ރާއްޖޭގައި ދިހަ ގޭންގް އޮތް ކަމަށްވާނަމަ އެ އަދަދު ތިނަކަށް ބަދަލު ކުރުމަކީ އަމާޒު ނޫން ކަމަށެވެ. އަދި މަސައްކަތް ކުރަމުންދާނީ ޒީރޯ ޓޮލަރެންސްގައި ކަމަށް މިނިސްޓަރު އިހުސާން ވިދާޅުވިއެވެ.
މިނިސްޓަރު އިހުސާން ވިދާޅުވީ ރާއްޖެއިން ހަކުރުގެ މައްސަލަ ހައްލުނުވާނެ ކަމަށް ހިތަށް އަރާނެ ކަމަށާއި، އެހެން ހިތަށް އަރާ ކަމަށްވާނަމަ މައްސަލަތައް ހައްލުނުވާނެ ކަމަށެވެ. ނަމަވެސް ހިތާއި ސިކުނޑިން މިމައްސަލަތައް ހައްލުވާނެ ކަމަށް ގަބޫލުކުރަންޖެހޭ ކަމަށް މިނިސްޓަރު އިހުސާން ވިދާޅުވިއެވެ.
މިނިސްޓަރު އިހުސާން ވިދާޅުވީ ޔުނީފޯމް މުއައްސަސާއަށް އަހަރަކު ދެބިލިއަން ރުފިޔާ ހަރަދުކުރާ ކަމަށާއި، އެމުއައްސަސާ ތަރުތީބުކޮށް، ގާނޫނީ ބާރުވެރިކަން ދިނުމުން މަގުސަދުތައް ހާސިލްވާންޖެހޭ ކަމަށެވެ. އަދި އެއަޒުމުގައި ހުރިހާ ފުލުހުން ވެސް މަސައްކަތް ކުރަންޖެހޭ ކަމަށް މިނިސްޓަރު އިހުސާން ވިދާޅުވިއެވެ.
