ނޭޝަނަލް ޖިއޮގްރަފިކްގެ ޕްރިސްޓީން ސީސްއިން ރާއްޖޭގައި ކުރިޔަށްގެންދާ ސައިންޓިފިކް އެކްސްޕެޑިޝަންގައި ނޫރާއްޖޭގެ ސައިންޓިސްޓެއް
މި އެކްސްޕެޑިޝަން ނިންމުމަށްފަހު، އެކްސްޕެޑިޝަން ޓީމުން ސައިންޓިފިކް ރިޕޯޓަކާއި ޑޮކިއުމެންޓަރީ ވީޑިއޯއެއް ތައްޔާރުކުރާނެ
ނޭޝަނަލް ޖިއޮގްރަފިކްގެ ޕްރިސްޓީން ސީސްއިން ރާއްޖޭގައި ކުރިޔަށްގެންދާ ސައިންޓިފިކް އެކްސްޕެޑިޝަންގައި ބައިވެރިވި ނޫރާއްޖޭގެ ސައިންޓިސްޓް
ދިވެހިރާއްޖޭގެ ކަނޑުފަޅުގެ ސަރަހައްދުތައް ބޭނުންކުރެވޭގޮތް ތަރުތީބުކުރުމަށް ތައްޔާރު ކުރަމުންދާ މެރިން ސްޕޭޝަލް ޕްލޭން އެކުލަވާލުމަށް ބޭނުންވާ އިތުރު މައުލޫމާތު އެއްކުރުމުގެ ގޮތުން ނޭޝަނަލް ޖިއޮގްރިފިކްގެ ޕްރިސްޓީން ސީސް އިން ފެށި އެކްސްޕެޑިޝަންގައި ނޫރާއްޖޭގެ ސައިންޓިސްޓް މައީޝާ މުހައްމަދު ބައިވެރިވެއްޖެއެވެ.
ކުރިއަށް އޮތް މަހުގެ ތެރޭގައި ހުވަދު އަތޮޅާއި، ފުވައްމުލައް އަދި އައްޑޫ އަތޮޅަށް ދަތުރުކުރުމަށް ހަމަޖެހިފައިވާ މި އެކްސްޕެޑިޝަންގައި ބޭނުންކުރާނީ "ބްލޫ ފޯސް ތްރީ"އުޅަނދެވެ. ނޫ ރާއްޖެއިން ކުރީގައި ކުރިއަށްގެންގޮސްފައިވާ އެކްސްޕެޑިޝަންތަކުން ހޯދާފައިވާ މަޢުލޫމާތުތައް މިދަތުރުގައި ހިންގާނެ ސައިންޓިފިކް ދިރާސާތަކުން އިތުރަށް މުއްސަނދިވެގެންދާނެއެއެވެ. އަދި މި މަޢުލޫމާތަކީ، ދިވެހިރާއްޖޭގެ ކަނޑުފަޅުގެ ދިރުންތައް ހިމާޔަތްކޮށް، ދެމެހެއްޓެނިވި ގޮތެއްގައި ތަރައްޤީގެ ކަންކަން ބައްޓަންކުރުމަށް އެހީތެރިވެދޭނެ މަޢުލޫމާތުތަކަކަށް ވާނެއެވެ.
މި ދަތުރުގައި މައީޝާއާއި އެކު ރާއްޖޭ އަދި ބައިނަލްއަޤްވާމީ ގޮތުން ފާހަގަކޮށްލެވޭ ސައިންސްވެރިން ބައިވެރިވާނެއެވެ. މިގޮތުން، އެކްސްޕެޑިޝަން ލީޑަރ ޔުނިވާރސިޓީ އޮފް ޕްލިމައުތު ގެ ޑރ. ކީރަން ފްރޭސާރ އާއި އެކްސްޕެޑިޝަންގެ ޗީފް ސައިންޓިސްޓް ޑރ. އެލަން ފްރެއިޑްލަންޑަރ އަދި ރާއްޖޭގެ މެރިން ބައޮލޮޖިސްޓެއް ކަމުގައިވާ އާޔާ ނަސީމް ބައިވެރިވާނެއެވެ. މި ދަތުރުގެ ސައިންސްވެރިން ރާއްޖޭގެ ދެކުނުގެ ކަނޑުތަކުގެ ހާލަތު ދެނެގަތުމަށް ބެއިޓެޑް ރިމޯޓް އަންޑަރ ވޯޓަރ ވީޑިއޯ ސިސްޓަމްސް (ބްރަވްސް)، ޑީޕް ޑްރޮޕް-ކެމެރާ ސާރވޭ، މިކްރޯޕެލިއޯ އަދި މައިކްރޯޕްލާސްޓިކް ސާމްޕްލިން ފަދަ އުކުޅުތައް ބޭނުންކުރާނެއެވެ.
މި އެކްސްޕެޑިޝަން ނިންމުމަށްފަހު، އެކްސްޕެޑިޝަން ޓީމުން ސައިންޓިފިކް ރިޕޯޓަކާއި ޑޮކިއުމެންޓަރީ ވީޑިއޯއެއް ތައްޔާރުކުރާނެއެވެ. އަދި އެކްސްޕެޑިޝަންއިން އެއްކުރެވޭ މަޢުލޫމާތުން ރާއްޖޭގެ ކަނޑުފަޅު ބޭނުންކުރާގޮތުގެ ޕްލޭނަށް (މެރިން ސްޕޭޝަލް ޕްލޭން)، ނޫ ރާއްޖެއިން، ކުރިން އެއްކުރެވިފައިވާ މައުލޫމާތަށް އިތުރު ފުރިހަމަކަމެއް ލިބިގެންދާނެއެވެ. މެރިން ސްޕޭޝަލް ޕްލޭން ހެދުމަށް ނޫ ރާއްޖެއިން ކުރިންވެސް އެކި އެކްސްޕެޑިޝަންތައް ހިންގާ، އާންމުންގެ ހިޔާލު ހޯދުމުގެ ގޮތުން އާންމު ބައްދަލުވުންތަކާއި ކަނޑުފަޅު ބޭނުންކުރާގޮތުގެ ސާރވޭއެއްވެސް ވަނީ ކުރިއަށް ގެންގޮސްފައެވެ.
މީގެ އިތުރުން މި އެކްސްޕެޑިޝަންގެ ތެރެއިން ދިވެހިރާއްޖޭގެ ދަރިވަރުންނާއި ޒުވާނުންނަށް އަމާޒުކޮށްގެން ލައިވް އޮންލައިން ސެޝަނަކާއި ސުވާލާއި ޖަވާބު ސެޝަނެއް ހިންގާނެއެވެ.
މިކަމާއި ގުޅޭ ގޮތުން މިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ ޑރ. ހުސައިން ރަޝީދު ހަސަން ވިދާޅުވީ، މި އެކްސްޕެޑިޝަންއާއެކު ރާއްޖޭގެ މެރިން އިކޯސިސްޓަމްތަކާ ގުޅޭގޮތުން ލިބިފައިވާ މައުލޫމާތު އިތުރަށް މުއްސަދިވެ، ކަނޑުފަޅުތަކާއި އޭގެ ރޯދި ހިމާޔަތްކުރަން މިކުރާ މަސައްކަތަށް ބާރުލިބިގެންދާނެ ކަމަށެވެ. އަދި މީގެ އިތުރުން، މިއީ ރާއްޖޭގެ ތިމާވެއްޓާއި ގުޅޭ އައު މައުލޫމާތު ހޯދައި ކަނޑުތަކަށް ކުރާ ޤަދަރާއި ލޯބި އިތުރަށް އާލާކުރަން ލިބިގެންދާ ރަނުގެ ފުރުޞަތެއްކަމަށް މިނިސްޓަރ ވިދާޅުވިއެވެ.
ނޫރާއްޖޭގެ ސައިންސް އެންޑް ކޮމިއުނިކޭޝަންސް ލިއޭސަން މައީޝާ މުހައްމަދު ވިދާޅުވި ރާއްޖޭގެ ދެކުނުގެ އަތޮޅު ތަކުގެ ކަނޑުގެ ހަލާތާއި ގުޅޭ އަގުހުރި މަޢުލޫމާތުތަކެއް އެއްކުރުމުގެ އިތުރުން ހިމާޔާތްކުރަންވީ ސަރަޙައްދުތައް ދެނެގަތުމަށް އެހީތެރިވެދޭނެ މި ދަތުރުގައި ބައިވެރިވުމުގެ ފުރުޞަތު ލިބުނީތީ އުފާކުރާ ކަމަށެވެ. މި ފަދަ އެކްސްޕެޑިޝަންތަކުގެ ސަބަބުން ކަނޑުފަޅުގެ ސަރަޙައްދުތައް ރައްކާކުރުމުގެ މުހިންމުކަމަށް ސައިންސް އިން ބާރުލިބި، ސަރުކާރުން ކަނޑައަޅާ ސިޔާސަތުތަކަކީ ސައިންސްގެ މައްޗަށް ބިނާވެފައިވާ ސިޔާސަތުތަކަށްވުމަށް މަގުފަހިވެގެންދާނެ ކަމަަށް އޭނާ ވިދާޅުވިއެވެ.
ނޭޝަނަލް ޖިއޮގްރަފިކް ޕްރިސްޓީން ސީސްގެ ޗީފް ސައިންޓީސްޓް ޑރ. އެލަން ފްރައިޑްލަންޑަރ ވިދާޅުވީ ނެޝަނަލް ޖިއޮކްރަފިކް ޕްރިސްޓީން ސީސް ޓީމުން ވަނީ ދުނިޔޭގެ ކަނޑުތަކުގެ އެންމެ މުހިންމު ސަރަޙައްދުތައް ހިމާޔާތްކުރުމަށް އެކި ކަންކޮޅުތަކުގައި މަސައްކަތް ކޮށްފަ ކަމަށެވެ. އަދި މިއީ އެ ޓީމުން ދިވެހިރާއްޖޭގައި މިގޮތަށް ހިންގާ މިފަދަ ފުރަތަމަ އެކްސްޕެޑިޝަން ކަމަށާއި، މިއީ، ދިވެހި ރާއްޖޭގެ ދެކުނުގެ އަތޮޅުތަކުގައި ހުރި ތަފާތު މާހައުލީ ނިޒާމުތަކާއި ގުޅޭ އިތުރު މަޢުލޫމާތު އެއްކުރުމަށް ލިބިގެންދާ ރަނގަޅު ފުރުޞަތެއް ކަމަށެވެ. އަދި ދިވެހި މުޖުތަމަޢުތަކާއި، އިޤްތިޞާދާއި، އަދި ރާއްޖޭގެ ތިމާވެއްޓަށް އުޖާލާ މުސްތަޤުބަލެއް ބިނާކޮށް، ދެމެހެއްޓެނިވި ގޮތެއްގައި ކަނޑުފަޅުގެ ސަރަޙައްދުތައް ހިމާޔަތްކޮށް ވަޒަންކުރުމަށް ކުރިޔަށް ގެންދާ ނޫ ރާއްޖެ ޕްރޮގްރާމުގެ ލަނޑުދަނޑިތައް ހާސިލްކުރުމަށްކުރާ މަސައްކަތުގައި ބައިވެރިވުމަކީ ޓީމަށް ލިބޭ ވަރަށް ބޮޑު އުފަލެއް ކަމަށެވެ.
