މާލޭގައި ހެލްމެޓު އަޅައިގެން އުޅޭނަމަ ހުއްޓުވައި ފޮޓޯ ވެސް ނަގާނެ: ސީޕީ
މި ގޮތަށް ބަދަލު ގެނައީ ހެލްމެޓު އަޅައިގެން ކުށްކުރާ މިންވަރު އިތުރުވާތީ
ހެލްމެޓު އަޅައިގެން މީހަކު ހައިވޭގައި ދުއްވަނީ
މިއަދުގެ ފަހުން މާލެ ސަރަހައްދުގައި ހެލްމެޓު އަޅައިގެން އުޅޭ މީހުން ބަލާ ފާސްކޮށް ފޮޓޯ ވެސް ނަގާނެ ކަމަށް ކޮމިޝަނަރ އޮފް ޕޮލިސް މުހައްމަދު ހަމީދު ވިދާޅުވެއްޖެއެވެ.
ސީޕީ "ރާއްޖެއެމްވީ" އާ ވަހަކަ ދައްކަވަމުން މިއަދު ވިދާޅުވީ ހެލްމެޓުގެ ނަހަމަ ބޭނުންކޮށް ކެމެރާތަކަށް މޫނު ނާރާނޭހެން ނިވާކޮށްގެން ކުށްތަކަށް އަރައިގަންނަ މިންވަރު އިތުރުވެފައިވާ ކަމަށާއި އެ ކަމަށް ގާނޫނުގެ ތެރެއިން ހޯދެން އޮތް ހައްްލެއް ހޯދަން މަސައްކަތް ކުރަމުންދާ ކަމަށެވެ.
ސީޕީ ވިދާޅުވީ ކުށްކުރުމުގައި މީހުން ގެންގުޅޭ އުކުޅުތައް ބަދަލުކުރަމުން އަންނަކަމަށާއި އެ ކަންކަން ހުއްޓުވުމަށް އުސޫލުތައް ވެސް ބަދަލުކުރަން ޖެހޭ ކަމަށެވެ.
ފުލުހުން މިއަދު ނެރުނު ބަޔާނެއްގައި ބުނެފައިވަނީ ހެލްމެޓު އެޅުން ލާޒިމުކޮށްފައި ނުވާ ސަރަހައްދުތަކުގައި ކާކުކަން ވަންހަނާކޮށް ކުށްކުށަށް އަރައިގަތުމުގެ ނިޔަތުގައި ހެލްމެޓު އަޅައިގެން ބައެއް މީހުން އުޅޭކަން ފާހަގަކުރެވިފައިވާ ކަމަށެވެ. އެހެންކަމުން ހެލްމެޓު އެޅުން ލާޒިމްކުރާ ސަރަހައްދުތައް ފިޔަވައި އެހެން ސަރަހައްދުތަކުގައި ހެލްމެޓް އަޅައިގެން އެއްގަމު އުޅަނދު ދުއްވާ މިހުންނަށް ފާރަވެރިވެ، ތުހުމަތު ކުރެވޭ މީހުން ހުއްޓުވައި ބަލައި ފާސްކުރާނެ ކަމަށް އެ ބަޔާނުގައި ބުނެފައިވެއެވެ.
އެއްގަމު އުޅަނދު ދުއްވުމުގެ އާއްމު ގަވައިދުގައިވާ ގޮތުން، ދެ ފުރޮޅުލީ އުޅަނދު ދުއްވާއިރު، އެ އުޅަނދު ދުއްވަން އިންނަ މީހާ އާއި ފަހަތުގައި އިންނަ މީހާ ހެލްމެޓް އެޅުން ލާޒިމްކޮށްފައިވަނީ 30 ކިލޯ މީޓަރަށް ވުރެ ބާރަށް ދުއްވަން ހުއްދަކޮށްފައިވާ ސަރަހައްދުތަކުގައެވެ. އެގޮތަށް ބަލާއިރު، މާލެ ސަރަހައްދުގައި ހެލްމެޓް އެޅުން ލާޒިމްކޮށްފައިވަނީ ސިނަމާލެ ބްރިޖާއި ހައިވޭގައި ދުއްވާއިރު އެކަންޏެވެ.
ފުލުހުން މި ގޮތަށް އުސޫލު ބަދަލުކޮށްފައިވާއިރު ބުރާސްފަތި ދުވަހު ވަނީ ހުޅުމާލޭގައި ހުންނަ ޓޭކްއަވޭ ކެފޭއެއްގެ ތެރެއަށް ހެލްމެޓު އަޅައިގެން ތިބި ބަޔަކު ވަދެ މަރުތޭލުން އެ ތަަނަށް ވަނީ ގެއްލުން ދީފައެވެ.
