ފަތުރުވެރިކަމުން 27.6 އިންސައްތައިގެ ކުރިއެރުން

އަހަރުގެ މިހާތަނަށް 308،000 އަށްވުރެ ގިނަ ފަތުރުވެރިން ރާއްޖެ ޒިޔާރަތްކޮށްފިއެވެ.

ޓޫރިޒަމް މިނިސްޓްރީން އާންމުކޮށްފައިވާ ރާއްޖޭގެ ފަތުރުވެރިކަމުގެ އެންމެ ފަހުގެ ތަފާސްހިސާބުތައް ދައްކާގޮތުން ފެބްރުއަރީ 21 ގެ ނިޔަލަށް މިއަހަރު 308،367 ފަތުރުވެރިން ވަނީ ރާއްޖެ އައިސްފައެވެ. މިއީ ފާއިތުވި 2 އަހަރާ އަޅާ ބަލާއިރު 27.6 އިންސައްތަ އިތުރު އަދަދެއް ކަމަށް ޓޫރިޒަމް މިނިސްޓްރީން ހާމަކުރެއެވެ.

ޖެނުއަރީ މަސް ނިމުނުއިރު ރާއްޖެ އައިސްފައިވަނީ 172،499 ފަތުރުވެރިންނެވެ. ފެބްރުއަރީ މަހުގެ 1 އިން 21 އަށް 135،868 ފަތުރުވެރިން އައިސްފައިވެއެވެ. މި އަދަދުތަކަކީ ފާއިތުވި 2 އަހަރާ އަޅާ ބަލާއިރުވެސް ބޮޑުތަނުން އިތުރު އަދަދުތަކެކެވެ.

އަހަރުގެ މިހާތަނަށް ދުވާލެއްގެ މައްޗަށް ރާއްޖެ އަންނަ ފަތުރުވެރިންގެ އަދަދުވެސް ވަނީ އިތުރުވެފައެވެ. 2022 ވަނަ އަހަރު ނިމުނުއިރު 4،000 އާ 5،000 ދެމެދުގެ އަދަދަކަށް ދުވާލެއްގެ މައްޗަށް ފަތުރުވެރިން ޒިޔާރަތްކޮށްފައިވާއިރު، މިއަހަރުގެ މިހާތަނަށް ދުވާލަކު 5،930 ފަތުރުވެރިން ޒިޔާރަތްކުރާކަމަށް ވަނީ ރެކޯޑުކޮށްފައެވެ. އަދި 8 ދުވަހު ރާއްޖޭގައި މަޑުކުރާކަމަށް ރެކޯޑުކޮށްފައިވެއެވެ.

އަހަރުގެ މިހާތަނަށް އެންމެ ގިނަ ފަތުރުވެރިން އަންނަމުންދަނީ ރަޝިއާ މާކެޓުންނެވެ. އެ މާކެޓުން މިހާތަނަށް 39،262 ފަތުރުވެރިން އައިސްފައިވާކަމަސް ތަފާސްހިސާބުން ދައްކައެވެ. ރަޝިއާއަށްފަހު އެންމެ ގިނަ ފަތުރުވެރިން އަންނަމުންދަނީ އިންޑިއާއިންނެވެ. އެގައުމުން 33،561 ފަތުރުވެރިން މިހާތަނަށް އައިސްފައިވެއެވެ. އަދި އިނގެރޭސިވިލާތް ތިންވަނައިގައި ހިމެނޭއިރު އެ މާކެޓުން މިހާތަނަށް 28،876 ފަތުރުވެރިން ވަނީ އައިސްފައެވެ. މި މާކެޓުތަކުގެ އިތުރުން އިޓަލީ، ޖަރުމަނު، ފްރާންސް، އެމެރިކާ، ޗައިނާ، ސްވިޒަރލޭންޑް އަދި ޕޮލޭންޑް މި މާކެޓުތަކުގެ ތެރޭގައި ހިމެނެއެވެ.

ރާއްޖެއަށް ފަތުރުވެރިންް އަންނަ އަދަދުތަކަށް ބަލާއިރު ކޮންމެ މަހަކުވެސް ރާއްޖެ އަންނަ ފަތުރުވެރިން އޭގެ ކުރީ މަސްތަކާ އަޅާ ބަލާއިރު ދަނީ އިތުރުވަމުންނެވެ. މިއަހަރު ނިމޭއިރު ޖެނުއަރީ މަހު ފަތުރުވެރިން އައި އަދަދަށްވުރެ އިތުރުވާނެ ކަމަށް މިނިސްޓްރީން އަންދާޒާކުރެއެވެ. އަދި ކޮވިޑް-19ގެ ކުރިން ހުރި އަދަދުތަކަށް ފަތުރުވެރިން އަންނަން ފަށާނެ ކަމަށް މިނިސްޓްރީން ބުނެއެވެ.