އިތުރު ސަބްސްކްރައިބަރުން ހޯދުމަށް ނެޓްފްލިކްސްއިން ގިނަ ގައުމުތަކެއްގައި އަގު ހެޔޮކޮށްފި

އިތުރު ސަބްސްކްރައިބަރުން ހޯދުމަށް ނެޓްފްލިކްސްއިން ގިނަ ގައުމުތަކެއްގައި އަގު ހެޔޮކޮށްފިއެވެ.

ނެޓްފްލިކްސްއިން ވަނީ 30ށްވުރެ ގިނަ ގައުމުގައި އަގު ހެޔޮކޮށް، ބައެއް ހާލަތްތަކުގައި ސަބްސްކްރިޕްޝަނެއްގެ އަގު ދެބައިކުޅަ އެއްބައި ކުޑަކޮށްފައެވެ.

މެދުއިރުމަތީގެ ބައެއް ހިސާބުތަކާއި ސަބް ސަހަރާ އެފްރިކާ، ލެޓިން އެމެރިކާ އަދި އޭޝިއާގެ ބައެއް ހިސާބުތަކުން ވަނީ އަގު ހެޔޮކޮށްފައެވެ.

އަގު ދަށްކޮށްފައި މިވަނީ ދިރިއުޅުމުގެ ހަރަދުގެ ދަތިކަމާއި އެހެން ސްޓްރީމިން ހިދުމަތްތަކުގެ ވާދަވެރިކަމުގެ ތެރޭގައި ސަބްސްކްރައިބަރުންގެ އަދަދު ދަށްވެފައިވާ ދަނޑިވަޅެއްގައެވެ.

190ށްވުރެ ގިނަ ގައުމުގައި ހިންގާ ނެޓްފްލިކްސްއިން އަންނަނީ ބައިނަލްއަގުވާމީ އައު ސަރަހައްދުތަކުގައި ހިއްސާ ބޮޑުކުރުމަށް މަސައްކަތް ކުރަމުންނެވެ.

ނެޓްފްލިކްސްގެ އަގު ހެޔޮކުރަން ރާވާފައިވާ ގައުމުތަކުގެ ތެރޭގައި އިނގިރޭސިވިލާތާއި އެމެރިކާގެ ނަން ހިމަނާފައެއް ނުވެއެވެ.

ނެޓްފްލިކްސްއިން މިގޮތަށް ނިންމާފައިމިވަނީ، ޕާސްވޯޑް ހިއްސާކުރުން ހުއްޓުވުމަށް އެކުންފުނިން ރާވަމުންދާ ދަނޑިވަޅެއްގައެވެ.