އަސްކަރީ ގުޅުން ވަރުގަދަ ކުރުމާ ގުޅޭގޮތުން ޔޫއޭއީ އާއެކު މަޝްވަރާކޮށްފި

ދިވެހިރާޖެއާއި، ޔުނއިޓެޑް އެރެބް އެމިރޭޓްސް (ޔޫއޭއީ) އާ ދެމެދު އަސްކަރީ ގުޅުން ވަރުގަދަކުރުމާ ގުޅޭގޮތުން މަޝްވަރާކޮށްފިއެވެ.

މި މަޝްވަރާ ކުރިއަށްގެންގޮސްފައިވަނީ އަބޫދާބީގައި މިހާރު ކުރިއަށްދާ އިންޓަރނޭޝަނަލް ޑިފެންސް އެގްޒިބިޝަން (އައިޑީއީއެކްސް 2023) ގެ ތެރެއިންނެވެ. މި އެގްޒިބިޝަންގެ ތެރެއިން ރާއްޖޭގެ ޑިފެންސް މިނިސްޓަރ މާރިޔާ ވަނީ ޔޫއޭއީގެ އަސްކަރިއްޔާގެ ޗީފް އޮފް ސްޓާފް އީސާ ސައިފް ބިން އަބްލަން އަލް މަޒޫރީއާ ބައްދަލުކުރައްވާފައެވެ.

މި ބައްދަލުވުމުގައި ދެގައުމުގެ ގުޅުންތައް ބަދަހިކުރުމާ ގުޅޭގޮތުން މަޝްވަރާކޮށްފައިވެއެވެ. އަދި އަސްކަރިއްޔާއާ ގުޅުންހުރި ކަންކަމަށް ޚާއްސަކޮށް އަލިއަޅުވާލައްވާފައިވެއެވެ.

މި ބައްދަލުވުމާ ގުޅޭގޮތުން މިނިސްޓަރ މާރިޔާ ކުރެއްވި ޓްވީޓެއްގައި ވިދާޅުވީ ޔޫއޭއީގެ އަސްކަރިއްޔާގެ ޗީފް އޮފް ސްޓާފާއެކު ބޭއްވުނު ބައްދަލުވުމުގައި މުހިންމު މަޝްވަރާތަކެއް ކުރިއަށްގެންދެވިފައިވާކަމަށެވެ. އަދި ދެގައުމުގެ ގުޅުން ބަދަހިކުރުމަށް ކުރިއަށްއޮތްތަނުގައި ގުޅިގެން ގިނަ ހަރަކާތްތަކެއް ކުރިއަށްގެންދިއުމަށް އުންމީދުކުރައްވާކަމަށް މިނިސްޓަރ ވިދާޅުވިއެވެ.