9 އަހަރު ފަހުން ކެމްބޯޑިއާގައި ދޫނި ރޯގާ ޖެހިގެން އިންސާނަކު މަރުވެއްޖެ
މަރުވެފައިވަނީ 11 އަހަރުގެ އަންހެން ކުއްޖެއް
ކެމްބޯޑިއާގައި 11 އަހަރުގެ ކުއްޖަކު ވަނީ ދޫނި ރޯގާ ޖެހިގެން މަރުވެފައި
ނުވަ އަހަރުފަހުން ކެމްބޯޑިއާގައި އެޗް5އެން1 ނުވަތަ އާއްމު ނަމުންނަމަ ދޫނި ރޯގާ ޖެހިގެން އިންސާނަކު މަރުވެއްޖެއެވެ.
ރޮއިޓަރސް އިން ރިޕޯޓް ކޮށްފައިވާގޮތުގައި އެ ޤައުމުން ދޫނި ރޯގާ ޖެހިގެން މަރުވީ 11 އަހަރުގެ އަންހެން ކުއްޖެކެވެ. އެ ކުއްޖާ މަރުވެފައިވަނީ ބުރާސްފަތި ދުވަހުއެވެ.
ކެމްބޯޑިއާގެ ހެލްތު މިނިސްޓަރު މަމް ބަންހެންގ ނެރުއްވި ބަޔާނެއްގައި ވިދާޅުވީ މިއީ 2014ގެ ފަހުން އެ ޤައުމުގައި ދޫނި ރޯގާ ޖެހިގެން އިންސާނަކު މަރުވި ފުރަތަމަ ފަހަރުކަމަށެވެ. އެއާއެކު ރައްކާތެރި ކަމުގެ ފިޔަވަޅުތައް އެޅުމަށް އިރުޝާދު ދެއްވިއެވެ.
11 އަހަރުގެ އަންހެން ކުއްޖާ މަރުވެފައިވަނީ ކެމްބޯޑިއާގެ ޕްރޭ ވެންގ ޕްރޮވިންސުގައެވެ. އެހެންކަމުން އެ ޕްރޮވިންސް ޑިސްއިންފެކްޓް ކުރުމުގެ މަސައްކަތް އެ ޤައުމުގެ ސިއްޙީ ޚިދުމަތްތެރިން ވަނީ ފަށައިފައެވެ.
މަރުވި ކުއްޖާގެ އިތުރުން ޕްރޭ ވެންގައި ދިރިއުޅޭ އިތުރު 12 މީހުންނަށް ދޫނި ރޯގާ ޖެހިފައިވާކަން ވަނީ ޔަޤީންކުރެވިފައެވެ.
