ރާއްޖޭގެ ކޯސްޓް ގާޑުން މި އަހަރު ހިންގާ ބޭސިކް ޑައިވް ކޯހުގައި، ކެމްބޯޑިއާގެ ސިފައިންގެ އޮފިސަރުން ބައިވެރިވުމުގެ ފުރުޞަތު ދީފައިވާނެ
ރައީސުލްޖުމްހުރިއްޔާ އިބްރާހީމް މުހައްމަދު ޞާލިހު ގުޅިފައިވާ ބަޔާން ދެއްވަނީ
ރާއްޖޭގެ ތަފާތު ރިޒޯޓްތަކުގައި އިންޓަރންޝިޕް ފުރިހަމަ ކުރުމުގެ 20 ފުރުޞަތު ކެމްބޯޑިއާގެ ރައްޔިތުންނަށް ދިނުމަށް ހުށަހަޅާފައިވާ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު އަދި ކެމްބޯޑިއާގެ ބޮޑުވަޒީރު ސަމާޑެކް އައްކާ މޮހާ ސޭނާ ޕަޑެއި ޓެޗޯ ހުން ސެން ދެއްވި ޖޮއިންޓް ޕްރެސް ސްޓޭޓްމަންޓްގައި، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވިދާޅުވީ ރާއްޖޭގެ ފަތުރުވެރިކަމުގެ ޞިނާޢަތުގައި، ކެމްބޯޑިއާގެ ރައްޔިތުން ވަޒީފާ އަދާކުރުމުގެ ޝައުޤުވެރިކަމާ ބެހޭގޮތުން ވެސް ދެބޭފުޅުން މިއަދު މަޝްވަރާ ކުރެއްވި ކަމަށެވެ. އެ މަޝްވަރާގެ ތެރެއިން އެމަނިކުފާނު ވާނީ، ތަޖުރިބާ ޙިއްޞާ ކުރުމުގެ ޕްރޮގްރާމްގެ ތެރެއިން، ރާއްޖޭގެ ތަފާތު ރިޒޯޓްތަކުގައި، އިންޓަރންޝިޕް ފުރިހަމަ ކުރުމުގެ 20 ފުރުޞަތު ދިނުމަށް ހުށަހަޅާފައި ކަމަށް ރައީސް ވިދާޅުވިއެވެ.
ރައީސް ވިދާޅުވީ ކެމްބޯޑިއާއާއި ދިވެހިރާއްޖެއާ ދެމެދު ބޭއްވި މަޝްވަރާތަކުގެ އިތުރުން، ކެމްބޯޑިއާއާއި ރާއްޖެއާ ދެމެދު މަޝްވަރާ ކުރުމާއި، ވިސާ މަޢާފްކޮށްދިނުމާއި، ޞިއްޙީ ދާއިރާއާއި، ފަތުރުވެރިކަމުގެ ދާއިރާއާއި، އިޤްތިޞާދީ ތަރައްޤީގެ ދާއިރާއިން ޖުމްލަ 6 އެއްބަސްވުމެއްގައި ސޮއިކޮށްފައިވާ ކަމަށެވެ. އޭގެ އިތުރުން، ދެ ޤައުމުގެ ވިޔަފާރިވެރިންގެ ޖަމުޢިއްޔާގެ މެދުގައިވެސް ވަނީ އެމް.އޯޔޫ.އެއްގައި ސޮއިކޮށްފައިވާ ކަމަށް ރައީސް ވިދާޅުވިއެވެ.
ޖުމްލަ ގޮތެއްގައި މިއަދު ސޮއިކުރި އެއްބަސްވުންތަކުގެ ސަބަބުން، ދެ ޤައުމުގެ މުސްތަޤުބަލަށް އުޖާލާކަން ގެނުވައިދޭނެ ކަމަށް ރައީސް ވިދާޅުވިއެވެ. އަދި ކުރިމަގުގައި މި ގުޅުން އިތުރަށް ދިރުވައި އާލާކޮށް ހަރުދަނާ ކުރުމަކީ އެމަނިކުފާނު ނުހަނު އިސްކަން ދޭ ކަމެއް ކަމަށް ރައީސް ވިދާޅުވިއެވެ.
ރައީސް ވިދާޅުވީ ސަރަޙައްދީ ފެންވަރުގައި، 2022 ވަނަ އަހަރު ކެމްބޯޑިއާއިން ވަނީ، އެސޯސިއޭޝަން ފޮރ ސައުތު އީސްޓް އޭޝިއަން ނޭޝަންސްގެ ރިޔާސަތު ފުރިހަމަކޮށްފައި ކަމަށެވެ. މިގޮތުން، އާސިއާންގެ ރިޔާސަތު ފުރިހަމަކުރެއްވުމުގައި، ބޮޑުވަޒީރުގެ ޒަޢާމަތުގައި އަދާކުރެއްވި ދައުރަށް ރައީސް ވަނީ ތައުރީފް ކުރައްވާފައެވެ.
އަދި އާސިއާންގެ އޮބްޒަރވަރ ޤައުމަކަށް ވުމަށްޓަކައި ރާއްޖެއިން ކުރަމުންދާ މަސައްކަތްތަކަށް ބޮޑުވަޒީރު ދެއްވާ އެއްބާރުލެއްވުން ފާހަގަކުރައްވާ، އެކަމަށްޓަކައި ބޮޑުވަޒީރަށް، ރައީސް ވަނީ ޝުކުރު ވިދާޅުވެފައެވެ. އަދި ރާއްޖެއިން ކުރަމުން އަންނަ މި މަސައްކަތް މި އަހަރު ތެރޭގައި ޙަޤީޤަތަކަށް ވެގެންދާނެ ކަމަށް ގަބޫލުކުރައްވާ ކަމަށް ރައީސް ވިދާޅުވިއެވެ.
ކެމްބޯޑިއާއަކީ ގާތްގަނޑަކަށް ތިން ޕަސެންޓް މުސްލިމުން އުޅޭ ޤައުމަކަށްވާއިރު، އޮގަނައިޒޭޝަން ފޮރ އިސްލާމިކް ކޯޕަރޭޝަންގެ އޮބްޒަރވަރ ޤައުމެއްގެ ގޮތުގައި ބައިވެރިވުމަށް ކެމްބޯޑިއާ ސަރުކާރުން ވަރަށް ގިނަ މަސައްކަތްތަކެއް ކޮށްފި ކަމަށާއި، އެކަމަށްޓަކައި ކެމްބޯޑިއާއިން އެ ކުރާ މަސައްކަތަށް ރާއްޖޭގެ ފުރިހަމަ އެއްބާރުލުން ލިބޭނެކަމަށް ރައީސް ވިދާޅުވިއެވެ.
