ގުޅީފަޅު އެކޮމޮޑޭޝަން ބްލޮކުގެ ތެރެއިން ފެނުނީ ގެއްލިގެން ހޯދަމުން ދިޔަ މީހާގެ ހަށިގަނޑު
23 ފެބުރުއަރީ 2023 | ބުރާސްފަތި 12:59ހަށިގަނޑު އާއިލާއާ ހަވާލުކުރުމަށް މި ހަފްތާގެ ތެރޭގައި އިންޑިއާއަށް ވަނީ ފޮނުވާފައި
ގުޅީފަޅުގެ އެކޮމެޑޭޝަން ބްލޮކެއްގައި އަލިފާން ރޯވުން
ކ. ގުޅީފަޅުގައި މިދިޔަ ޑިސެމްބަރު މަހުގެ 16 ވަނަ ދުވަހު ހިނގި އަލިފާނުގެ ހާދިސާއަށްފަހު އެތަން ސާފުކުރަމުން ދަނިކޮށް ފެނުނު އިންސާނެއްގެ ހަށިގަނޑަކީ، އެތަނުން ގެއްލިގެން ހޯދަމުން ދިޔަ މީހާ ކަން ދެނެގަނެވިފައިވާ ކަަމަށް ފުލުހުންް ބުނެފިއެވެ.
ފުލުހުން ބުނީ އެ ހަށިގަނޑުގެ ބައިތަކަކީ ގެއްލިގެން ހޯދަމުން ދިޔަ މީހާގެ ހަށިގަަނޑުގެ ބައިތަކެއް ކަމަށެވެ. އަދި މިހާރު އެ ހަށިގަނޑު އޭނާގެ އާއިލާއާ ހަވާލުކުރުމަށް މި ހަފްތާގެ ތެރޭގައި އިންޑިއާއަށް ފޮނުވާފައިވާ ކަމަށެވެ.
ގުޅީފަޅުގައި އަލިފާން ރޯވީ ތިލަ-މާލެ ބުރިޖުގެ މަސައްކަތް ކުރާ އިންޑިއާގެ އެފްކޮންސް ކުންފުނީގެ މުވައްޒަފުން ދިރިއުޅެމުންދިޔަ ބްލޮކެއްގައެވެ.
މި ހާދިސާއާ ގުޅިގެން އެފްކޮންސްއިން ފުރަތަމަ ނެރުނު ބަޔާނުގައި ބުނީ އެތަނުގައި ދިރިއުޅެމުންދިޔަ އެންމެން ސަލާމަތް ކުރެވުނު ކަމަށެވެ. ނަމަވެސް އަލުން އެތަނުގައި ދިރިއުޅެމުން އައި މީހުންގެ އަދަދު ބެލުމުން އެކަކު މަދުކަން ފާހަގަ ކުރެވިގެން ފުލުހުންނަށާއި ސިފައިންނަށް ރިޕޯޓު ކުރިކަން ކަމަށް ބުނެފައިވެއެވެ.
