ފޯ ނޭޝަންސް ކަޕްގައި ވާދަކުރުމަށް މެލޭޝިޔާ އާއި އަފްޣާނިސްތާނު ޓީމު ރާއްޖެ އަށް

އަންނަ ބުރާސްފަތި ދުވަހު ރާއްޖޭގައި ފަށާ ބައިނަލްއަޤުވާމީ ވޮލީ ބޯޅަ މުބާރާތް، ފޯ ނޭޝަންސް ކަޕްގައި ވާދަކުރުމަށް މެލޭޝިޔާ އަދި އަފްޣާނިސްތާނު ޓީމު ރާއްޖެ އަތުވެއްޖެ އެވެ.

މި ދެ ޤައުމުގެ ވޮލީ ޓީމު ރާއްޖެ އައިސްފައި ވަނީ އަންގާރަ ދުވަހުގެ ހެނދުނު އެވެ. މި މުބާރާތުގައި ވާދަކުރަނީ ރާއްޖޭގެ އިތުރުން އަފްޣާނިސްތާން، ސިންގަޕޫރު އަދި މެލޭޝިޔާ އެވެ. މެލޭޝިޔާގެ ފިރިހެން ޓީމާއި އަންހެން ޓީމު ރާއްޖެ އައިސްފައިވާއިރު، އަފްޣާނިސްތާނުން އައީ ފިރިހެން ޓީމެވެ. މުބާރާތުގައި އަފްޣާނިސްތާނުން ވާދަކުރަނީ ފިރިހެން ޓީމު އެކަންޏެވެ. މުބާރާތުގައި ވާދަކުރާ ސިންގަޕޫރުގެ ފިރިހެން ޓީމާއި އަންހެން ޓީމު ރާއްޖެ އައުމަށް ހަމަޖެހިފައި ވަނީ ބުދަ ދުވަހު އެވެ.

ފޯ ނޭޝަންސް ކަޕް ފެށުމެއް ހަމަޖެހިފައި ވަނީ ބުރާސްފަތި ދުވަހުގެ މެންދުރު އެވެ. އެ ދުވަހުގެ 14:30 ގައި އޮންނަ ފިރިހެން މެޗުގައި ބައްދަލުކުރާނީ އަފްޣާނިސްތާނާއި ސިންގަޕޫރު އެވެ. އެ ދުވަހުގެ 16:30 ގައި އޮންނަ އަންހެން މެޗުގައި ބައްދަލު ކުރާނީ ރާއްޖެ އާއި މެލޭޝިޔާ އެވެ. ބުރާސްފަތި ދުވަހުގެ ރޭ 20:30 ގައި ރާއްޖޭގެ ޤައުމީ ފިރިހެން ޓީމުން ވެސް ނިކުންނާނީ މެލޭޝިޔާއާ ދެކޮޅަށެވެ. މުބާރާތް ކުރިއަށް ގެންދިޔުމަށް ހަމަޖެހިފައި ވަނީ ރައުންޑްރޮބިން އުސޫލުންނެވެ.