މެލެޝީއާގެ އިސްލާމިކް ޕާޓީން ފޭކު ކަނޑި ހިފައިގެން ހިނގާލުމެއް ކުރިއަށްގެންދިޔަ މައްސަލަ ބަލަނީ
20 ފެބުރުއަރީ 2023 | ހޯމަ 16:31މި ހިނގާލުމަކީ ޓެރެންގަނޫ އިސްލާމިކް ޔޫތު އެސޯސިއޭޝަން (ހިމްޕިޓް) ނުވަތަ ޓެރެންގަނޫ މުސްލިމް ޔޫތު ގޭދަރިންގެ ނަމުގައި ޕާސް ޔޫތު ވިންގްއިން ކުރިއަށްގެންދާ ދެ ދުވަހުގެ ހިނގާލުމެއް
މެލެޝީއާގެ އިސްލާމިކް ޕާޓީން ފޭކު ކަނޑި ހިފައިގެން ހިނގާލުމެއް ކުރިއަށްގެންދިޔަ މައްސަލަ ބަލަނީ
މެލޭޝީއާގެ އިސްލާމިކް ޕާޓީ، ޕާޓި އިސްލާމް ސެ-މެލޭޝިއާ (ޕާސް)ގެ ޔޫތު ވިންގުގެ މެމްބަރުން ފޭކު ކަނޑިއާއި ދަނޑިއާއި ޝީލްޑް ހިފައިގެން ހިނގާލުމެއް ހިންގި ހާދިސާއެއް ތަހުގީގުކުރަމުންދާކަމަށް އެގައުމުގެ ފުލުހުން ބުނެފިއެވެ.
ޓެރެންގަނޫގެ ޕޮލިސް ޗީފް ރޮހައިމީ އެމްޑީ އީސާ ވިދާޅުވި ގޮތުގައި ފުރަތަމަ ތަހުގީގުތަކުން ދައްކާ ގޮތުގައި މި ހަރަކާތް ހިނގާފައިވަނީ ހުކުރު ދުވަހު (ފެބްރުއަރީ 17) ޓެރެންގަނޫގެ ސެޓިއުގެ ރިސޯޓެއްގައެވެ. އޭނާ ވަނީ މިކަމުގެ ފުރިހަމަ ތަހުގީގެއްކޮށް، ފިޔަވަޅުއަޅަންޖެހޭފަދަ ކަމެއް ހުރިނަމަ ފިޔަވަޅު އަޅާނެ ކަމަށް ވިދާޅުވެފައެވެ.
ރޮހައިމީ ވިދާޅުވީ ޕާސްގެ ޔޫތު ވިންގުން ހިނގާލުމެއް ބާއްވާނެކަން ފުލުހުންނަށް އެންގި ނަމަވެސް އެހިނގާލުުގައި ހަތިޔާރުގެ ރެޕްލިކާތައް ބޭނުންކުރާނެކަން ފުލުހުންނަށް އަންގާފައި ނުވާކަމަށެވެ. އަދި މިފަދަ ތަކެތި ހިފައިގެން ހިނގާލުން ކުރިއަށް ގެންގޮސްފައިވާތީ އާންމުންގެ މެދުގައި ނުތަނަވަސްކަން އުފެދިފައިވާކަމަށް ރޮހައިމީ ވިދާޅުވިއެވެ.
އިހު ޒަމާނުގެ އިސްލާމީ ހަނގުރާމައިގެ ހެދުމުގައި ތިބެ ޕާޓީގެ ޔޫތު ވިންގުގެ މެމްބަރުން ފޭކް ކަނޑިތަކާއި ދަނޑިތަކާއި ޝީލްޑް ހިފައިގެން ހިނގާލުމެއް ހިންގާ މަންޒަރުގެ ބައެއް ފޮޓޯތަކާއި ވީޑިއޯތައް ސޯޝަލް މީޑިއާގައި ވަނީ އާންމުވެފައެވެ.
މި ހިނގާލުމަކީ ޓެރެންގަނޫ އިސްލާމިކް ޔޫތު އެސޯސިއޭޝަން (ހިމްޕިޓް) ނުވަތަ ޓެރެންގަނޫ މުސްލިމް ޔޫތު ގޭދަރިންގެ ނަމުގައި ޕާސް ޔޫތު ވިންގްއިން ކުރިއަށްގެންދާ ދެ ދުވަހުގެ ހިނގާލުމެކެވެ.
