ޒިމްބާބްވޭގެ ރައީސްކަމުގެ މަގާމުން ރޮބަޓް މުގާބޭ އިސްތިއުފާ ދެއްވުމަށް އެގައުމުގެ ޒާނޫ-ޕީއެފް ޕާޓީން ދިން މުހުލަތު ހަމަވިއިރު ވެސް މުގާބޭ އިސްތިއުފާ ދެއްވާފައި ނުވާތީ  މުގާބޭ ރައީސްކަމުން ދުރުކުރުމުގެ މަޝްވަރާތައް ފެށުމަށް އެ ޕާޓީއިން ތައްޔާރުވެއްޖެއެވެ.

ޒާނޫ-ޕީއެފް ޕާޓީ އިން ރައީސް މުގާބޭ، ގައުމުގެ ރައީސްކަމުގެ މަގާމުން އިސްތިއުފާ ދެއްވުމަށް ހޯމަ ދުވަހު މެންދުރު 12 (ރާއްޖޭ ގަޑިން މެދުރު ފަހު 3:00) ޖެހުމާ ހަމައަށް މުހުލަތު ދިނެވެ. ރައީސް މުގާބޭ ޒިމްބާބްވޭގެ ރައީސް ކަމުގެ މަގާމުން ދުރުކުުރުމަށް ޒާނޫ-ޕީއެފް ޕާޓީ އިން ތައްޔާރުވަމުންދާއިރު، އެ ޕާޓީގެ ރައީސްގެ މަގާމުން އާދީއްތަ ދުވަހު މުގާބޭ ވަނީ ވަކިކޮށްފައެވެ. ރައީސް މުގާބޭ އަކީ ޒާނޫ-ޕީއެފް ޕާޓީގެ ކޯ ފައުންޑަރެކެވެ. އަދި އެތައް އަހަަރެއް ވަންދެން އެ ޕާޓީ ލީޑު ކުރެއްވިއެވެ. ޒާނޫ-ޕީއެފް ޕާޓީގެ ރައީސް ކަމުން  މުގާބޭ ވަކިކުރެއްވުމަށްފަހު އެ ޕާޓީގެ ލީޑަރަކަށް ހަމަޖައްސަވާފައި ވަނީ، މީގެ ހަފްތާތަކެއް ކުރިން ރައީސް މުގާބޭ މަގާމުން ވަކިކުރެއްވި އެމަނިކުފާނުގެ ކުރީގެ ނައިބު ރައީސް އެމަސަން ނަންގަގްވާ އެވެ.

ޒާނޫ-ޕީއެފް ޕާޓީ އިން ބުނެފައި ވަނީ ހޯމަ ދުވަހު މެންދުރު 12:00ގެ ކުރިން ރައީސް މުގާބޭ އިސްތިއުފާ ނުދެއްވައިފިނަމަ ގާނޫނު ހަދާ މަޖިލީހުގައި ރައީސް މުގާބޭގެ އިތުބާރު ނެތްކަމުގެ ވޯޓެއް ނަގައި، މަގާމުން ދުރުކުރާނެ ކަމަށެވެ.

އާދީއްތަ ދުވަހު ރައީސް މުގާބޭ ވަނީ ކުއްލި ގޮތަކަށް ގައުމާއި މުޚާތަބު ކުރައްވާފައެވެ. ރައީސް ކަމުން އިސްތިއުފާ ދެއްވާނެ ކަމަށް ވަރަށް ބޮޑަށް ބެލެވުނު، މުގާބޭގެ ތަގްރީރު ނިމިގެންދިޔައިރުވެސް މުގާބާ އިސްތިއުފާ ނުދެއްވުމުން ވަރަށް ގިނަ ބަޔަކަށް ހައިރާންކަން ލިބިގެންދިޔައެވެ. ރައީސް މުގާބޭގެ ވާހަކަފުޅުގައި އެމަނިކުފާނު ވިދާޅުވީ އަސްކަރިއްޔާގެ އަތްދަަަަަށަށް ގައުމު ގެނެސް އެމިނިކުފާނު ގޭ ބަންދުކުރުމަކީ އަސްކަރިއްޔާ އިން ގޯސްކޮށް ކުރި ކަމެއް ނޫން ކަަމަށެވެ. އަދި އަންނަ މަހު ބާއްވަން ހަމަޖެހިފައިވާ ޒާނޫ-ޕީއެފް ޕާޓީ ގެ ކޮންގްރެސް ގައިވެސް އެމަނިކުފާނު ބައިވެރިވެވަޑައިގަންނަވާނެ ކަމަށެވެ.

ޒިމްބާބްވޭގެ އަސްކަރިއްޔާގެ އަތްދަށަށް އެގައުމުގެ ކޮންޓްރޯލް ގެންގޮސްފައިވާއިރު އަސްކަރިއްޔާ އިން ބުނެފައި ވަނީ ޒިމްބާބުވޭގެ ރައީސް ރޮބާރޓް މުގާބޭއާ ދެކޮޅު ހަރަކާތެއް ނުހިންގާ ކަމަށާއި އަސްކަރިއްޔާއިން މަސައްކަތްކުރަނީ މުގާބޭގެ އަރިހުގައި ތިބި މުޖުރިމުން ހައްޔަރުކުރުމަށް ކަމަށެވެ. ހަމައެހެންމެ، އަސްކަރިއްޔާ އިން ބުނަމުން ދަނީ މުގާބޭގެ އަރިހުގައި ގައުމު ހިންގަން ތިބި މީހުން ގައުމު ހިންގާ ގޮތާއި ދޭތެރޭގައާއި އަދި ރައްޔިތުންނާއި ދޭތެރޭ ކަންކަން ކުރަމުން ގެންދާ ގޮތާއި ދޭތެރޭގައި  ހިތްހަމަ ނުޖެހޭ ކަމަށެވެ.

ޒިމްބާބްވޭގައި 1980 ވަނަ އަހަރުން ފެށިގެން ވެރިކަން ކުރައްވަނީ މުގާބޭ އެވެ. ރައީސް މުގާބޭގެ 37 އަހަރުވީ ޚުދުމުހުތާރު ވެރިކަމަށް ލޮޅުން އަރާފަދަ ހާލަތަކަށް އެގައުމުގެ ކަންކަން ގޮސްފައި މިވަނީ ނައިބު ރައީސް ކަމުގައި ހުންނެވި އެމަސަން ނަންގަގްވާ މިމަހުގެ ހަވަނަ ދުވަހު މަގާމުން ދުރުކުރައްވާފައި ވަނިކޮށެވެ. އުމުރުފުޅުން 75 އަހަރުފުޅުގެ ނަންގަގްވާ މަގާމުން ދުރުކުރެވުނީ ރައީސް މުގާބޭއަށް ފަހު އެ ގައުމުގައި ވެރިކަން ކުރައްވާނެ ބޭފުޅަކަށް މުގާބޭގެ އަނބިކަނބަލުން ގްރޭސް މުގާބޭ ޝައުގުވެރިކަން ފާޅުކުރައްވަމުން ގެންދަވަނިކޮށް ނަންގަގްވާވެސް އެކަމަށް ޝައުގުވެރިކަން ފާޅުކުރެއްވުމުން އުފެދުނު ހިތްހަމަ ނުޖެހުމާ ގުޅިގެންނެވެ.