އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) ގައި ސިއްހީ ހިދުމަތް ދިނުމަށް ބޭނުންކުރާ ބައެއް ވަސީލަތްތައް ވަގުތުން ވަގުތަށް ހޯދުމުގައި ދަތިތައް ދިމާވަނީ އެ ހޮސްޕިޓަލުން އަމަލުކުރަންޖެހޭ ގާނޫނީ އުސޫލުތަކެއް ހުރުމުން ކަމަށް އެ ހޮސްޕިޓަލުން ބުނެފިއެވެ.
"މިހާރު" ނޫހުގައި ޝާއިއުކޮށްފައިވާ ޚަބަރަކާ ގުޅިގެން އައިޖީއެމްއެޗުން އާދީއްތަ ދުވަހުގެ ރޭ ނެރުނު ބަޔާނެއްގައި ބުނީ އެ ހޮސްޕިޓަލަށް ތަކެތި ހޯދަނީ ދައުލަތުގެ މާލިއްޔަތުގެ ގާނޫނާއި ގަވާއިދުގެ ދަށުން އެ ތަކެތީގެ އަގާއި ފެންވަރު ބަލައި، ވަކި އުސޫލަކުން ގަންނަ، ބަލިމީހުންނަށް ރައްކާތެރި އަދި ދުނިޔޭގެ ސެޓިފައިޑް ބޮޑީތައް ކަމަށްވާ އެމެރިކާގެ އެފްޑީއައި އާއި ޔޫރަޕުގެ ސީއީން ގަބޫލުކުރާ ފެންވަރުގެ ތަކެތި ކަމަށެވެ. އަދި އެ ގޮތަށް މުދާ ގަތުމުގައި ރައްކާތެރިކަމާއި ފެންވަރު ކަށަވަރު ކުރުމާއެކު ޚަރަދު ކުޑަކުރުމަށް އިސްކަންދިނުމަށް އައިޖީއެމްއެޗުން އަމަލުކުރަން ޖެހޭ ޤާނޫނީ އުސޫލުތަކެއް ހުރުމުން ބައެއް ފަހަރު ޑިޕާޓުމެންޓުތަކުން ހޯދުމަށް އެދޭ ވަކި ބްރޭންޑެއްގެ މެޝިނެއް އެ ވަގުތު ހޯދުމުގައި ދަތިތަކާ ދިމާވުމަކީ އެކަށީގެންވާ ކަމެއްކަމުގައި އެ ހޮސްޕިޓަލުން ވަނީ ފާހަގަކޮށްފައެވެ.
އައިޖީއެމްއެޗުން ބުނީ އަލްޓްރާސޮނޮގްރެފީ (ޔޫއެސްޖީ) މެޝިނެއް ނެތްކަމަށް ބުނެ ފަތުރަނީ ހަގީގަތާ ޚިލާފު ވާހަކައެއް ކަމަށެވެ. އަދި އެ ހޮސްޕިޓަލުގައި މިހާރުވެސް އޭގެ ފަސް މެޝިން އެބަހުރި ކަމަށް އެ ހޮސްޕިޓަލުން ބުންޏެވެ.
އައިޖީއެމްއެޗަކީ ރައްޔިތުންނަށް ބޭނުންވާ ސިއްހީ ފަރުވާ ފޯރުކޮށްދޭ ސަރުކާރުގެ މައި ހޮސްޕިޓަލު ކަމަށްވާ އިރު، އެ ހޮސްޕިޓަލުގެ ހިދުމަތްތަކާ މެދު ރައްޔިތުންގެ ހިތުގައި ސުވާލު އުފެދި، އިތުބާރު ގެއްލޭ ފަދަ ކަންކަން ނުކުރުމަށް އައިޖީއެމްއެޗުން ވަނީ އިލްތިމާސްކޮށްފައެވެ.
