ޖޭޕީގެ ލީޑަރުކަމަށް ޤާސިމް ކުރިމަތިލެއްވިނަމަވެސް މަޤާމަށް އިންތިޚާބު ވާނީ ޕާޓީގެ އަސާސީ ގަވާއިދުގެ އިސްލާހުތައް ފާސްވުމުން
19 ފެބުރުއަރީ 2023 | އާދީއްތަ 17:02ޖޭޕީގެ ލީޑަރުކަމަށް ގާސިމް އިންތިހާބުވި ކަމަށް ބައެއް މީޑިއާތަކުން ރިޕޯޓުކޮށްފައި ވީނަމަވެސް އެއީ މުޅިން ރަނގަޅު ވާހަކައެއް ނޫން
ޖުމްހޫރީ ޕާޓީގެ ލީޑަރު ގާސިމް އިބްރާހިމް
ޖުމްހޫރީ ޕާޓީގެ ލީޑަރުގެ މަގާމަށް ކުރިމަތިލެއްވި ހަމައެކަނި ބޭފުޅަކީ ގާސިމް އިބްރާހިމް ކަމުގައި ވީނަމަވެސް، އެ މަގާމަށް އެ މަނިކުފާނު އިންތިހާބު ވާނީ ޕާޓީގެ އަސާސީ ގަވާއިދަށް ހުށަހަޅައިފައިވާ އިސްލާހުތައް ފާސްވުމުން ކަމަށް އެ ޕާޓީގެ ސެކެޓްރީ ޖެނެރަލް، އަލީ އާރިފް ވިދާޅުވެއްޖެއެވެ.
ރާއްޖެއެމްވީއަށް މައުލޫމާތު ދެއްވަމުން އާރިފް ވިދާޅުވީ ޖޭޕީގެ ލީޑަރުކަމަށް ގާސިމް އިންތިހާބުވި ކަމަށް ބައެއް މީޑިއާތަކުން ރިޕޯޓުކޮށްފައި ވީނަމަވެސް އެއީ މުޅިން ރަނގަޅު ވާހަކައެއް ނޫން ކަމަށެވެ. އަދި ޕާޓީގެ އަސާސީ ގަވާއިދަށް ހުށަހަޅައިފައިވާ އިސްލާހު ފާސް ނުވެއްޖެނަމަ، ޖޭޕީގެ ކޮންގްރެސްގެ ތެރެއިން ފެންނަ ނުފެންނަ ސިއްރު ވޯޓަކަށް އަހާނެ ކަމަށެވެ.
ޖުމްހޫރީ ޕާޓީގެ ގައުމީ ކޮންގްރެސް ބޭއްވުމަށް ހަމަޖެހިފައި ވަނީ މި ހަފުތާ ބަންދުގައެވެ. ކޮންގުރެސްގައި ޕާޓީގެ އަސާސީ ގަވާއިދު އިސްލާހު ކުރުމުގެ މަސައްކަތާއި ޕާޓީގެ އެކި ގުނަވަންތަކަށާއި މަގާމުތަކަށް މީހުން އިންތިހާބު ކުރުން އޮންނާނެއެވެ.
ޖުމްހޫރީ ޕާޓީގެ ކޮންގުރެސްގައި އެ ޕާޓީން ރިޔާސީ އިންތިހާބަށް ވާދަކުރުމާ މެދުވެސް ގޮތެއް ނިންމާނެއެވެ. ޖޭޕީގެ ޤައުމީ ކޮންގްރެސްގައި 900ށްވުރެ ގިނަ މީހުން ބައިވެރިވާނެކަމަށްވެސް ޖުމްހޫރީ ޕާޓީން ބުނެއެވެ.
