ބުޅާ، ސަލާމަތްކުރި މީހާއާ ވަކިވާން ގަބޫލެއް ނުވި

އަޅުގަޑުމެންގެ ހަޔާތުގައި ލޯބީގެ ތަފާތު މިސާލުތައް ފެނެއެވެ. އެކިތަންތަނުން އެކި ސިފަސިފައިގައެވެ. މިފަހަރު އާދަޔާ ޚިލާފު ލޯތްބެއް ފެނިފައި މިވަނީ ފެބްރުއަރީ ހަވަނަ ދުވަހު ތުރުކީއާއި ސީރިޔާއަށް ބިންހެލުން އައި ސަރަހައްދުންނެވެ. ވެއްޓުނު އިމާރާތްތަކުގެ ދަށުން އާދަޔާ ޚިލާފު ގޮތްގޮތަށް މީހުންނާއި ކުދިން ސަލާމަތްކޮށްދީ، ކަރުނަ ފައިބަމުން ދިޔަ ލޯތަކަށާއި ނުތަނަވަސް ހިތްތަކަށް ކޮންމެވެސް ވަރެއްގެ ހަމަޖެހުމެއް ގެނުވަމުން އަންނައިރު މިފަހަރު ތަފާތު ވާހަކައެކެވެ.

މިފަހަރުގެ ވާހަކައަކީ އިންސާނެއްގެ ވާހަކައެއް ނޫނެވެ. ވެއްޓުނު އިމާރާތެއްގެ ދަށުން ވަރަށް ފަހުން ސަލާމަތްކުރި ބުޅަލެއް، އެސޮރު ސަލާމަތްކުރި، ފަޔަރ ޑިޕާޓްމަންޓްގެ އަލީ ނަމަކަށް ކިޔާ މީހަކާ ވަކިވާން ދެކޮޅުހަދަމުންދާ ވާހަކައެވެ. އެ ބުޅާ ފެނުނުއިރު އޮތީ ބަނޑުހައިވެ، އަދި ބިރުން ތުރުތުރުއަޅާ ހާލުގައި ކިލަޔާ ކުނޑިތަކުން ފޮރުވިފައި ކަމަށްވެއެވެ. އެފަދަ ބިރުވެރި ހާލަތަކުން ސަލާމަތްކޮށްދީ އަލުން ދުނިޔޭގެ އަލިކަމަށް އާދެވެމުން ބުޅާ މިހާރު ހުރިހާ ވަގުތެއްވެސް ހޭދަކުރަން ބޭނުންވަނީ އެސޮރު ސަލާމަތްކޮށްދިން އަލީއާ އެކުގައެވެ. ނިދާއިރުވެސް އޮންނަން ބޭނުންވަނީ އަލީގެ ގައިގައި ޖެހިގެންނެވެ.

ގާފުނީގެ ދަށުން ބުޅާފެނުމުން އަލީވެސް ވަރަށް ލޯބިން ބުޅާ އުރާލައި އަދި ބޮސްދޭ މަންޒަރު ފެންނަ ފޮޓޯތަކާ ވީޑިއޯތައް ސޯޝަލް މީޑިޔާގައި ދައުރުވަމުން ދެއެވެ. ބުޅާ ކޮނޑުމަތީ ބާއްވައިގެން ވެއްޓިފައިވާ އިމާރާތުގެ ގާފުނިން ފައިބާ މަންޒަރުފެންނަ ވީޑިއޯތައް ވަނީ އާންމުވެފައެވެ. މި ވީޑިއޯއަށް ފަސް މިލިއަން ވިއުއާއި 1.7 ލައިކް ލިބިފައިވާ ކަމަށް ވެއެވެ.

އަލީ މިހާރު ވަނީ ބުޅާ އެޑޮޕްޓްކޮށްފައެވެ. އޭގެ ނަމަކަށް ދީފައިވަނީ އެންކާޒްއެވެ. ތުރުކީ ބަހުން އެންކާޒްގެ މާނަޔަކީ ގާފުނި ކަމަށްވެއެވެ. ބުޅަލަށް އެ ނަން ދީފައިވަނީ އެސޮރު ފެނުނު ތަނަށް ނިސްބަތް ކޮށްފައެވެ.