ބުޅާ ޖަންގަލި: ޒިންމާއިން ބަރީއްޔަވެ، އުފާ ހޯދަން ބޭނުންވާ މީހުންނަށް ރަނުގެ ފުރުޞަތެއް

ސޯޝަލް މީޑިއާގެ އެކި ޕްލެޓްފޯމްތަކަށް ބަލާލި ކަމުގައި ވީ ނަމަވެސް ބުޅަލުގެ ވީޑިއޯތަކާއި ފޮޓޯތައް ނުފެންނަ ދިމާލެއް މަދުވާނެއެވެ. އަމިއްލަ ދަރިން ފަދައިން ބުޅާ ގެންގުޅޭ މީހުންނާއި، މަގުމަތީގައި "ޔަތީމު" ވެފައިވާ ބުޅާތަކަށް ގަވައިދުން ކާންބޯންދީ ހަދާ މީހުންގެ ވާހަކަތައް ތާ އަބަދުމެހެން އިވިއިވި ނުވަތަ ފެނިފެނި ހުރެއެވެ. 

ކިތަންމެ ގެންގުޅޭ ހިތްވި ކަމުގައި ވީ ނަމަވެސް، އަމިއްލަ ގޭގައި އޮޅުކޮށްގެން ބުޅާ ގެންގުޅުމަކީ ކޮންމެކޮންމެ މީހަކަށް ލިބިފައި އޮންނަ ނަޞީބެއް ނޫނެވެ. ޖާގައިގެ ދަތިކަން ނުވަތަ އެކުގައި ގެދޮރު ހިއްސާ ކުރާ މީހަކު ބުޅާ ދެކެ ބިރު ގަތުން ފަދަ ކޮންމެވެސް ސަބަބަކާ ހެދި، ބުޅާ ގެންގުޅެވޭ ގޮތް ނުވެފައި ތިބި، އެހެން ނަމަވެސް ބުޅާ ދެކެ އިންތިހާއަށް ލޯބިވާ މީހުން މަދެއް ނޫނެވެ. އުރުދުންގެ ވެރިރަށް އައްމާންގެ "ކެޓް ޖަންގަލް" ނުވަތަ ބުޅާ ޖަންގައްޔަށް ބަލާލުމުން އެކަން ކިތަންމެހާ ރަނގަޅަކަށްވެސް ސާބިތުވެއެވެ.

އަމިއްލަ ގޭގައި ބުޅަލެއް ގެންގުޅުމުގެ ހުރިހާ ޒިންމާއަކުން ސަލާމަތްވެފައި ވާ ހާލު، ބުޅާތަކާއެކު އެތައް ވަގުތެއް ހޭދަ ކުރުމުގެ ފުރުސަތު، އައްމާންގެ ބުޅާ ޖަންގަލިން ހޯދާދެއެވެ. ބުޅާތަކާއެކު ކުޅެ، ސަކަރާތް ޖަހާ، އުފާވެރި ވަގުތުތަކެއް ހޭދަކޮށް، ދުނިޔަވީ ހާސްކަމާއި ނުތަނަވަސްކަން ހަނދާން ނެތިކޮށްލާނެ ފުރުޞަތެއް ހޯދާދެއެވެ. 

ބުޅާ ޖަންގަލި ހެދުމުގެ ޚިޔާލު، ނުހާދު އަޝޫރީއަށް ލިބުނީ، މުޅި ދުނިޔެ ފުރަބަންދު ކުރި ކޮވިޑް-19ގެ ބަލިމަޑުކަމަށްފަހު އެކި ހިސާބުތަކަށް މީހުން ދޫކޮށްލަމުން ދިޔަ ބުޅާތައް ފެނުނު ހިސާބުންނެވެ. އަޝޫރީ ނިންމީ، ބުޅާތަކަށް ހާއްސަ، ޕްލޭގްރައުންޑެއް ނުވަތަ ކުޅޭތަނެއް ހަދާށެވެ. އަދި އެތަނަކީ ބުޅާ ގެންގުޅެން ލޯބިކުރާ ފަރާތްތަކަށް، އުފާވެރި ވަގުތުކޮޅެއް ހޭދަކޮށްލެވޭ ތަނަކަށް ހެދުމަށް އަޝޫރީ އަމާޒު ހިފިއެވެ.

އުރުދުންއަށް ނިސްބަތްވާ ޝަމްސް އަލް-ޖުންދީއަކީ ބުޅާ ދެކެ އިންތިހާއަށް ލޯބިވާ، އެހެން ނަމަވެސް، އަމިއްލަ ގޭގައި ބުޅާ ގެންގުޅުމުގެ ނަޞީބު ލިބިފައި ނުވާ މީހެކެވެ.

ބުޅާތަކަށް ހާއްސަ ޕްލޭގްރައުންޑެއް ހެދުމުގެ ޚިޔާލުވީ، ކޮންމެ ގޮތެއްވިއަސް، ކަސްޓަމަރުންގެ މެދުގައި މަޤުބޫލު ޚިޔާލަކަށެވެ.

އަޝޫރީގެ ބުޅާ ޖަންގަލީގައި މިހާރު ދިރިއުޅެމުންދާ ބުޅާތައް އެއްފަސް ކުރުމަށް އޭނާ ވަނީ 6 އެއްކަ މަސްދުވަސް ހޭދަކޮށްފައެވެ. މިއަދު އޭނަގެ ބުޅާ ޖަންގަލީގައި ދިރިއުޅޭ ބުޅާތަކުގެ އަދަދު 40 އާ ގާތް ކުރެއެވެ.