ހިލޭ ޖެހުމެއްގައި ފަހު ވަގުތު މެސީ ކާމިޔާބު ކުރި ލަނޑުން މޮޅުވެ ޕީއެސްޖީ އަށް ލީޑެއް

ފަހު ވަގުތު ލިއޮނަލް މެސީ ކާމިޔާބު ކުރި ލަނޑާއެކު މޮޅުވެ ޕެރިސް ސެއިންޓް ޖާމަން (ޕީއެސްޖީ) އިން އެއް ވަނައިގައި ލީޑު ހިފަހައްޓައިފި އެވެ.

އާދިއްތަ ދުވަހުގެ ރޭ ޕީއެސްޖީގެ އަމިއްލަ ދަނޑުގައި ލީލްއާ ދެކޮޅަށް ކުޅުނު މެޗު އެ ޓީމުން ކާމިޔާބު ކުރީ 4-3 އިންނެވެ. މެޗުގައި ފުރަތަމަ ލަނޑު ޖަހައި ކުރި ހޯދީ ވެސް ޕީއެސްޖީ އިންނެވެ. މެޗުގެ 11 ވަނަ މިނެޓުގައި ބްރެޒިލްގެ ތަރި ނޭމާ ޖޫނިއާ ތަނަވަސްކޮށްދިން ފުރުސަތެއްގައި އެ ޓީމަށް ލީޑު ނަގައިދިނީ ފްރާންސްގެ ތަރި ކީލިއަން އެމްބާޕޭ އެވެ. އޭގެ ހަ މިނެޓު ފަހުން ނޭމާ ވަނީ ޕީއެސްޖީގެ ދެ ވަނަ ލަނޑު ޖަހައިދީފަ އެވެ. އެ ލަނޑު ނޭމާ ޖެހީ އެ ޓީމުގެ މިޑްފީލްޑަރު ވިޓީނިއާ ތަނަވަސްކޮށްދިން ފުރުސަތެއްގަ އެވެ. ފުރަތަމަ ހާފު ނިމުމުގެ ކުރިން ބަފޯޑް ޑިއާކައިޓް ވަނީ ލަނޑެއް ޖަހައި ލީލް އަށް އުންމީދެއް ހޯދައިދީފަ އެވެ.

ދެ ވަނަ ހާފަށް ނުކުމެ ލީލް އިން ވަނީ ނަތީޖާ ހަމަހަމަކޮށް ލީޑު ވެސް ނަގައިފަ އެވެ. އެ ޓީމަށް ނަތީޖާ ހަމަހަމަކޮށްދިނީ 58 ވަނަ މިނެޓުގައި ލިބުނު ޕެނަލްޓީއެއް ކާމިޔާބުކޮށްގެން ޖޮނަތަން ޑޭވިޑް އެވެ. އޭގެ ކުރިން މެޗުގެ 51 ވަނަ މިނެޓުގައި ޕީއެސްޖީގެ ނޭމާ އަށް ލިބުނު އަނިޔާއެއްގެ ސަބަބުން އޭނާ ވަނީ ބަދަލުކޮށްފަ އެވެ. މެޗުގައި ފުރަތަމަ ފަހަރަށް ލީލް އަށް ލީޑު ނަގައިދިނީ 69 ވަނަ މިނެޓުގައި ޖޮނަތަން ބަމްބާ އެވެ. އެއީ ލީލްގެ އެންހެލް ގޮމޭސް ތަނަވަސްކޮށްދިން ފުރުސަތަކުންނެވެ. މެޗުގެ ފުރިހަމަ ވަގުތު ހަމަވާން ތިން މިނެޓަށް ވެފައި ވަނިކޮށް ހުއާން ބާނަޓް ތަނަވަސްކޮށްދިން ފުރުސަތަކުން އެމްބާޕޭ ވަނީ ޕީއެސްޖީ އަށް ނަތީޖާ ހަމަހަމަކޮށްދީފަ އެވެ. މެޗު އެއްވަރުވާން ދަނިކޮށް އިތުރު ވަގުތުގައި ލިބުނު ހިލޭ ޖެހުމެއްގައި ބޯޅަ ގޯލަށް ފޮނުވާލައިގެން މެޗުން ޕީއެސްޖީ އަށް ތިން ޕޮއިންޓު ހޯދައިދިނީ މެސީ އެވެ.

މެޗުން މޮޅުވެ ޕީއެސްޖީ އެއް ވަނައިގައި އޮތީ ކުޅުނު 24 މެޗުން 57 ޕޮއިންޓާއެކު އެވެ.