މިއުނިކް ސެކިއުރިޓީ ކޮންފަރެންސް ރަޝިޔާ ނުހިމަނާ ކުރިޔަށް ދަނީ

ދުނިޔޭގެ ސަލާމަތާ ބެހޭގޮތުން ދުނިޔޭގެ ލީޑަރުންނާއި ސިޔާސީ އިސްފަރާތްތަކުގެ އިތުރުން ސެކިއުރިޓީ އެކްސްޕަރޓުން މަޝްވަރާކުރުމަށް އަހަރަކު އެއްފަހަރު ބާއްވާ މިއުނިކް ސެކިއުރިޓީ ކޮންފަރެންސް، ވިހި އަހަރުތެރޭ ފުރަތަމަ ފަހަރަށް ރަޝިޔާ އަށް ދައުވަތުނުދީ ޖަރމަނީގެ މިއުނިކްގައި ކުރިއަށް އެބަދެއެވެ.

ތިން ދުވަހުގެ މި ކޮންފަރެންސް ހުކުރު ދުވަހު ފައްޓަވާދެއްވާފައިވަނީ ޔޫކްރެއިންގެ ރައީސް ވޮލޮޑޮމިރް ޒެލެންސްކީ ވީޑިއޯ މެދުވެރި ކުރައްވާ ދެއްވި މެސެޖަކުންނެވެ. ޒެލެންސްކީގެ ވާހަކަފުޅުގައި ވަނީ ހަނގުރާމައިގައި ޔޫކްރެއިނަށް ކާމިޔާބު ލިބުން ނޫން އެހެން ގޮތެއް ނެތްކަމަށާއި އެހެން ކަމުން ގައުމުތަކުން ޔޫކްރެއިނަށް ވާ އެހީ އަވަސް ކުރުމަށް ގޮވާލައްވާފައެވެ. އަދި ޔޫކްރެއިން ރައްޔިތުންގެ ފުރާނައިގެ ރައްކާތެރިކަންވަނީ އެހީގެ ސްޕީޑްގެ މައްޗަށް ބިނާވެގެން ކަމަށް ވިދާޅުވެފައެވެ.  

ކޮންފަރެންސްގައި އެމެރިކާ ތަމްސީލުކުރައްވަނީ އެ ޤައުމުގެ ނާއިބު ރައީސް ކަމަލާ ހެރިސް އެވެ. އެކަމަނާގެ ވާހަކަފުޅުގައި ވަނީ ރަޝިޔާ ޔޫކްރެއިން ހަނގުރާމައިގައި ރަޝިޔާއިން އިންސާނިއްޔަތާ ޚިލާފް ޖަރީމާތައް ހިންގަމުންދާ ކަމަށް ވިދާޅުވާ ވިދާޅުވުން ތަކުރާރު ކުރައްވާފައެވެ. ރަޝިޔާގެ އަމަލުތަކުގެ ތަފްސީލަށް ވަޑައިގަންނަވަމުން އެކަމަނާ ވިދާޅުވީ އަނިޔާ ލިބުނު އެންމެންގެ ފަރާތުން އެކަން ކުށްވެރިކޮށް ރަޝިޔާއަށް ފިޔަވަޅު އަޅަން ޖެހޭ ކަމަށާއި އިންސާފު އަރާހަމަކުރާނެކަން ރަޝިޔާއިން ދަންނަން ޖެހޭނެ ކަމަށެވެ.   

ރަޝިޔާ ޔޫކްރެއިންގެ ހަނގުރާމައަށް އެއް އަހަރުފުރެން ތައްޔާރުވެފައިވާ އިރު ލީޑަރުން މައިގަނޑު ގޮތެއް ވާހަކަފުޅު ދައްކަވާފައިވަނީ ޔޫކްރެއިނަށް އެހީތެރިކަން ފޯރު ކޮށްދެވޭނެ އިތުރު ގޮތްތަކާ ބެހޭ ގޮތުންނެވެ.

އިނގިރޭސި ބޮޑުވަޒީރު ރިޝީ ސުނަކްގެ ވާހަކަފުޅުގައި ވަނީ ގައުމުތަކުން ޔޫކްރެއިނަށް ފޯރުކޮށްދޭ އެހީ ދެގުނަޔަށް އިތުރު ކުރަން އެބަޖެހޭ ކަމަށް ވިދާޅުވެފައެވެ.

ކޮންފަރެންސްގައި ޔޫކްރެއިންގެ ފޮރިން މިނިސްޓަރު ވިދާޅުވީ ރަޝިޔާއިން ހަނގުރާމަ ކުރަމުން ގެންދަނީ ގައުމެއް އެއްކޮށް ނައްތާލުމަށް ކަމަށެވެ. އެހެނީ ޔޫކްރެއިނަކީ މިނިވަން މުސްތަގިއްލު ދައުލަތެއްގެ ގޮތުގައި ދެމިއޮތުމަށް ރަޝިޔާއިން ބޭނުން ނުވާތީ ކަމުގައި އޭނާ ވިދާޅުވެފައި ވެއެވެ.

މިއުނިކް ސެކިއުރިޓީ ކޮންފަރެންސްގައި ދުނިޔޭގެ ސާޅީހަކަށް ހެޑް އޮފް ސްޓޭޓުންނާއި ސަރުކާރުތަކުގެ ވެރިން ބައިވެރިވެ ވަޑައިގަންނަވައެވެ. މީގެ އިތުރުން 100 އެއްހާ ގައުމުން ސެކިއުރިޓީ އެކްސްޕަރޓުން ވެސް މި ކޮންފަރެންސްގައި ބައިވެރިވެއެވެ. ރަޝިޔާގެ އިތުރުން އީރާން އަށް ވެސް ކޮންފަރެންސް އަށް ދައުވަތު ދީފައެއް ނުވެއެވެ. އެއީ އެގައުމުގައި ސަރުކާރާ ދެކޮޅަށް މުޒާހަރާ ކުރަމުންދާ ފަރާތްތަކާމެދު ހަރުކަށިކޮށް އަމަލު ކުރަމުން ގެންދާތީ އެކަން ކުށްވެރި ކުރުމުގެ ގޮތުންނެވެ.

މިދިޔަ އަހަރުގެ މިއުނިކް ކޮންފަރެންސަށް ރަޝިޔާއަށް ދައުވަތު ދެވުނު ނަމަވެސް އެ ޤައުމުން ބައިވެރި ވެފައެއް ނުވެއެވެ. ރަޝިޔާއިން ޔޫކްރެއިން ހިފުމަށް ހަމަލާދިނީ ކޮންފަރެންސް ނިމުނުތާ ހަތަރު ދުވަސް ފަހުން މަރޗް 24 ގައެވެ.

އަނެއްކޮޅުން ޚަބަރު ލިބޭ ގޮތުގައި މިމަހު 24 ވަނަ ދުވަހު ހަނގުރާމަޔަށް އަހަރެއް ފުރޭއިރު ރަޝިޔާ އަދިވެސް އޮތީ ގޮތް ދޫކުރާ ގޮތަކަށް ނޫނެވެ. އަދި ކޮންފަރެންސް ކުރިޔަށް ދަނިކޮށް ހޮނިހިރު ދުވަހުވެސް ވަނީ ކްރޫޒް މިސައިލް ހަމަލާތަކެއް ދީ ޔޫކްރެއިންގެ ދެސަރަހައްދަކަށް ބޮޑެތި ގެއްލުންތަކެއް ދީފައެވެ.