"އެއް އުންމަތެކޭ" ކެމްޕެއިންގައި އަތޮޅުތަކުގެ ރައްޔިތުންނަށްވެސް ބައިވެރިވެވޭނެ
19 ފެބުރުއަރީ 2023 | އާދީއްތަ 02:19މިކެމްޕެއިންގެ ދަށުން ވަނީ ހުކުރު ދުވަހު ގްރޭޓަރ މާލެ އޭރިއާގައި ހުކުރު ކުރި ހުރިހާ މިސްކިތްތަކެއްގައި ފަންޑުފޮށި ބަހައްޓާފައި
އެއް އުންމަތެކޭ ކެމްޕޭންގައި ބެހެއްޓި ފަންޑު ފޮއްޓެއް
ތުރުކީ އަދި ސީރިޔާ އަށް އައި ބާރުގަދަ ބިންހެލުމުގައި ހާލުގައިޖެހުނު ފަރާތްތަކަށް އެހީވުމަށްޓަކައި ޢިލްމުވެރިންނާއި މަދަނީ ޖަމްއިއްޔާތައް ގުޅިގެން ފެށި "އެއް އުންމަތެކޭ" ކެމްޕެއިންގައި މާލޭގެ އިތުރުން އަތޮޅުތަކުގެ ރައްޔިތުންނަށްވެސް ބައިވެރިވެވޭނެކަމަށް މިކެމްޕެއިން އިންތިޒާމުކުރާ ފަރާތުން ބުނެފިއެވެ.
ޚިދުމަތް ޖަމްއިއްޔާ، ނަސީހާ، އަލް ގަލަމް، ޔުނައިޓެޑް އިސްލާމިކް ސޮސައިޓީ، ދަރުމަ ފައުންޑޭޝަން، ޒާތުލްޚައިރު ފަދަ އެތައް ޖަމްއިއްޔާއަކާއި އެންޖީއޯތަކެއްގެ އިތުރުން އިލްމުވެރިން ގުޅިގެން ކުރިޔަށްގެންދާ މި ކެމްޕެއިން ލޯންޗުކޮށްފައިވަނީ މިދިޔަ ހަފްތާގެ ބުދަ ދުވަހުއެވެ. މިކެމްޕެއިންގެ ދަށުން ވަނީ ހުކުރު ދުވަހު ގްރޭޓަރ މާލެ އޭރިއާގައި ހުކުރުގެ ކުރި ހުރިހާ މިސްކިތްތަކެއްގައި ފަންޑުފޮށި ބަހައްޓާފައެވެ. މިފަންޑު ފޮށިތަކަށް ގިނަ އަދަދެއްގެ ރައްޔިތުން ފައިސާ ލާފައިވާކަމަށް އިންތިޒާމުކުރާ ފަރާތުން ބުނެއެވެ.
މިކެމްޕެއިނާ ގުޅޭގޮތުން ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަދައްކަވަމުން މަހަލްދީބު ފައުންޑޭޝަންގެ ޗެއާޕާސަން ޝެއިޚް އަބްދުﷲ ރަޝީދު ވިދާޅުވީ މިކެމްޕެއިންގެ ދަށުން ހުކުރު ދުވަހު ހަވީރު މާލެ ސަރަހައްދުގައި ގިނަ މީހުން އެއްވާ ތަންތަނުގައި ފަންޑު ފޮށި ބަހައްޓާފައިވާކަމަށެވެ. އަދި މިކެމްޕެއިންގެ ދަށުން އަތޮޅުތެރޭގެ ގިނަ ރަށްތަކަކުންވެސް އެހީތެރިކަން ފޯރުކޮށްދެމުންދާކަމަށެވެ.
މިކެމްޕެއިނާ ގުޅޭގޮތުން ވާހަކަދައްކަވަމުން އިންޓަރނޭޝަނަލް އެއިޑް ކެމްޕެއިން (އައިއޭސީ)ގެ ޑިރެކްޓަރ އޮފް އިންޓަރނޭޝަނަލް ރިލޭޝަންސް މުހައްމަދު އަލީ ވިދާޅުވީ ބިން ހެލުން އައުމާއެކު އެޖަމިއްޔާއިން ވަނީ އިމަރޖެންސީ ފަންޑެއް ހުޅުވާފައިކަމަށެވެ. އަދި އެފަންޑަށް ފައިސާ ޖަމާކުރުމުގެ ފުރުސަތު ހުރިހާ ދިވެހިންނަށް ހުޅުވާލާފައިވާއިރު އެންމެ ބޮޑަށް އިސްކަންދޭންވީ ދާއިމީ ބޯހިޔާވަހިކަމެއް ހަމަޖައްސައިދިނުމަށްކަމަށެވެ.
މިފަންޑަށް ފައިސާ ޖަމާވަމުން އަންނަ މިންވަރު ހާމަކުރަމުންދާނެކަމަށާއި މިފަންޑުގެ އެހީގައި ތުރުކީ އަދި ސީރިޔާގެ ރައްޔިތުންނަށް ވެދޭ އެހީތެރިކަންވެސް ހާމަކުރަމުންދާނެކަމަށް މުހައްމަދު އަލީ ވިދާޅުވިއެވެ.
ބިންހެލުމުގައި ގެއްލުން ލިބުނު ފަރާތްތަކަށް އެހީތެރިކަން ފޯރުކޮށްދިނުމަށް ބޭނުންވާ ފަރާތްތަކުން އިންޓަރނޭޝަނަލް އެއިޑް ކެމްޕޭންގެ ބީއެމްއެލް އިސްލާމިކް އެކައުންޓް ނަމްބަރު: 7770000062741 އަށް ފައިސާ ޖަމާ ކުރެވޭނެއެވެ.
