2018 ވަނަ އަހަރު ތައިލެންޑްގެ ހޮހަޅައަކުން ސަލާމަތްކުރި 12 ފިރިހެން ކުދިންގެ ތެރޭގައި ހިމެނޭ ޑޫއަންޕެޗް ޕްރޮމްތެޕް އިނގިރޭސިވިލާތުގައި މަރުވެފައި އޮއްވާ ފެނިއްޖެއެވެ.

އުމުރުން 17 އަހަރުގެ ޒުވާނާ ހުކުރު ދުވަހު ލެސްޓާޝަޔަރގައި ހުންނަ އޭނާގެ ޑޯރމްގައި ހޭނެތިފައި އޮއްވާ ފެނިގެން ހޮސްޕިޓަލަށް ގެންދިޔަކަމަށާއި، އަންގާރަ ދުވަހު އޭނާ މަރުވެފައިވާ ކަމަށް ބީބީސީއިން ބުނެއެވެ.

އޭނާ ވަނީ މިދިޔަ އަހަރުގެ ފަހުކޮޅުން ފެށިގެން އިނގިރޭސިވިލާތުގެ ފުޓްބޯޅަ އެކަޑަމީއެއްގައި ބައިވެރިވެ އެތަނުގައި ފަރިތަކުރަމުން ގޮސްފައެވެ.

އޭނާ އަކީ ޗިއަންގް ރައި ޕްރޮވިންސްގައި ތަންތަން ބަލަމުންދަނިކޮށް ދެ ހަފްތާއަށް ވުރެ ގިނަ ދުވަހު ހޮހަޅައެއްގެ އެތެރޭގައި ތާށިވެފައި ތިބި ތައިލެންޑްގެ ފިރިހެން ކުދިންގެ ފުޓްބޯޅަ ޓީމުގެ ކެޕްޓަންއެވެ.

ހޮހަޅައިން ކުދިން ސަލާމަތްކުރުމުގެ ތެރޭގައި ޑައިވަރެއްގެ ޓޯޗް އަލި އެޅި އޭނާގެ ހިނިތުންވެފައި ހުރި މޫނަކީ ސަލާމަތް ކުރުމުގެ އޮޕަރޭޝަނުގައި ފެނިގެންދިޔަ އެންމެ ހަނދާނީ ތަސްވީރެވެ.

އޭނާ މަރުވީ ކިހިނެއް ކަމެއް ނޭނގުނު ނަމަވެސް ލެސްޓާޝަޔަރ ޕޮލިހުން ބުނީ އޭނާގެ މަރާ މެދު ޝައްކު ކުރެވޭ ގޮތަކަށް ނުބަލާ ކަމަށެވެ. ތައިލެންޑުގެ ރިޕޯޓްތައް ބުނާގޮތުން އޭނާގެ ބޮލަށް އަނިޔާވެފައިވެއެވެ.

އީސްޓް މިޑްލެންޑްސް އެމްބިއުލާންސް ސާވިސްގެ ތަރުޖަމާނަކު ވިދާޅުވީ ޕްރޮމްތެޕް އެމްބިއުލާންސްގައި ކެޓަރިން ޖެނެރަލް ހޮސްޕިޓަލަށް ގެންދިޔައީ ހުކުރު ދުވަހުގެ މެންދުރު ފަހު ކަމަށެވެ. އަދި އެއާ އެމްބިއުލާންސެއް ވެސް އެތަނަށް ފޮނުވާފައިވާކަމަށެވެ.

މިދިޔަ އަހަރުގެ އޮގަސްޓް މަހު އޭނާގެ ޓީމުގެ ކުޅުންތެރިންވަނީ ޕްރޮމްތެޕް، ހާބަރޯގެ ބްރޫކް ހައުސް ކޮލެޖް ފުޓްބޯޅަ އެކަޑަމީއާ ގުޅުމަށް ސްކޮލަޝިޕް ލިބުނުކަން އިންސްޓަގްރާމްގައި އިއުލާންކޮށް އުފާފާޅުކޮށްފައެވެ.