ޓީމުގެ އެންމެ މުހިންމު ދެ ފޯވަޑުން ކަމަށްވާ ލަޔޮނަލް މެސީ އާއި ނޭމާ ސަންޓޯސް ޕީއެސްޖީގެ ސަޕޯޓަރުންގެ ކިބައިން މައާފަށް އެދެފި އެވެ.

މިކަން ކުރި މައިގަނޑު ސަބަބަކީ ޗެމްޕިއަންސް ލީގު ފުޓްބޯޅަ މުބާރާތުގައި އިއްޔެރޭ ޖަރުމަނުގެ ބަޔާން މިއުނިކް އަތުން ޕީއެސްޖީ އަމިއްލަ ދަނޑުގައި 1-0 އިން ބަލިވުމެވެ. މި ނަތީޖާގެ ސަބަބުން މީގެ ހަފުތާއެއް ފަހުން ބަޔާންގެ ދަނޑުގައި އެ ޓީމު ދެ ލަނޑުން ބަލިނުކުރެވިއްޖެނަމަ ޕީއެސްޖީ ޗެމްޕިއަންސް ލީގުން ކަޓާނެ އެވެ.

ނޭމާ އާއި މެސީ އަކީ ބޮޑު މުސާރަ ދީފައި ޕީއެސްޖީގެ ތާރީހުގައި ފުރަތަމަ ފަހަރަށް އެކުލަބަށް ޗެމްޕިއަންސް ލީގު ކާމިޔާބު ކުރުމަށް ގެނައި ދެ ކުޅުންތެރިއެކެވެ. ނަމަވެސް ޖެހިޖެހިގެން ދެ ވަނަ ސީޒަނެއްގައި މުބާރާތުން ކަޓާނެ ކަމަށް ބެލެވެން ފެށުމާއެކު ސަޕޯޓަރުންގެ ނުރުހުން ވަނީ ކުޅުންތެރިންނަށް އަމާޒުވެފަ އެވެ.

މެސީ އާއި ނޭމާގެ އިތުރުން އެހެން ކުޅުންތެރިންނަށް ވެސް ރޭ މޮޅަށް ނުކުޅެވުނެވެ. ނަމަވެސް ސަޕޯޓަރުންގެ މެޗު ނިމެންދެން ޓީމަށް ތަރުހީބު ދިނުމުގައި ދެމިތިއްބެވެ. މެޗަށް ފަހު މެސީ އާއި ނޭމާ ސަޕޯޓަރުންނާ ބައްދަލުކޮށް މައާފަށް އެދުނުއިރު މި ދެ ކުޅުންތެރިން އަންނަ ސީޒަނުގައި ޕީއެސްޖީން ނުފެނުން ކައިރިކަމަށް މީޑިއާތަކުން ދަނީ ބުނަމުންނެވެ. މި ސީޒަނާއެކު ނޭމާގެ ކޮންޓްރެކްޓް ބާކީ އަހަރަކަށްވާއިރު މެސީގެ ކޮންޓްރެކްޓް ނިމޭނެ އެވެ. މި ދެ ކުޅުންތެރިން ޓީމު ދޫކޮށްދާން ބޭނުންވާ މައިގަނޑު ސަބަބަކީ ފްރާންސްގެ ޒުވާން ފޯވަޑް ކީލިއަން އެމްބާޕޭއާ އޮތް ގުޅުން ރަނގަޅު ނުވުމާއި އެމްބާޕޭ އަށް ކުލަބުގައި ގިނަ ބާރުތަކެއް ލިބިފައިވުމެވެ. އަދި ނޭމާ އާއި މެސީ ނެތި ޕީއެސްޖީ އަށް ތަށި ހޯދައިދޭން އެމްބާޕޭ ދަނީ ބާރު އަޅަމުންނެވެ. އަނިޔާގެ ސަބަބުން ރޭގެ މެޗުގައި އެމްބާޕޭ ކުޅެން ނުކުތީ ބަޔާންއިން ގޯލު ޖެހުމުންނެވެ. އޭނާ މޮޅަށް ކުޅުނަސް އޭނާ ދެއްކިފަދަ ކުޅުމާގާތަށް ވެސް މެސީ އާއި ނޭމާ އަށް ނުކުޅެވުނެވެ.