ތުރުކީއާއި ސޫރިޔާއަށް އެހީވާން އިލްމުވެރިންނާއި މަދަނީ ޖަމްއިއްޔާތައް ގުޅިގެން ހާއްސަ ޕްރޮގްރާމެއް
މި ހަރަކާތުގެ ނަމަކީ "އެއް އުންމަތެކޭމީ..!"
ތުރުކީއާއި ސޫރިޔާއަށް އެހީވުމުގެ ފަންޑް ރެއިޒިންގ ހަރަކާތް އިފްތިތާހު ކުރުމުގެ ތެރެއިން
ތުރުކީ އަދި ސޫރިޔާ އަށް ދިމާވެފައިވާ ބިންހެލުމުގެ ކާރިސާގައި ހާލުގައިޖެހުނު ފަރާތްތަކަށް އެހީވުމަށްޓަކައި ޢިލްމުވެރިންނާއި މަދަނީ ޖަމްއިއްޔާތައް ގުޅިގެން ފަންޑް ރެއިޒިންގ ޕްރޮގްރާމެއް ލޯންޗުކޮށްފިއެވެ.
މި ފަންޑު ލޯންޗު ކޮށްފައިވަނީ ބުދަ ދުވަހުއެވެ. މިއީ "އެއް އުންމަތެކޭމީ..!" މި ނަމުގައި ކުރިއަށްގެންދާ ފަންޑް ރެއިޒިންގ ހަރަކާތެކެވެ.
މި ކެމްޕޭން ލޯންޗްކުރުމަށް ބުދަ ދުވަހު ޕޯސްޓް ބިލްޑިންގުގައި ބޭއްވި ނޫސްވެރިންގެ ބައްދަލުވުމެއްގައި ކަމާގުޅޭ މައުލޫމާތުތައް ވަނީ ހިއްސާކޮށްފައެވެ. އެގޮތުން ފަންޑު އިންތިޒާމުކުރާ ފަރާތްތަކުން މައުލޫމާތު ދޭގޮތުގައި، ޚިދުމަތް ޖަމްއިއްޔާ، ނަސީހާ، އަލް ގަލަމް، ޔުނައިޓެޑް އިސްލާމިކް ސޮސައިޓީ، ދަރުމަ ފައުންޑޭޝަން، ޒާތުލްޚައިރު ފަދަ އެތައް ޖަމްއިއްޔާއެއް މިހާރު މި ފަންޑާ ވަނީ ގުޅިފައެވެ.
ހުކުރު ދުވަހު ފަންޑު ފޮށިތައް މިސްކިތްތަކުގައި ބެހެއްޓުމަށް ހަމަޖެހިފައިވާއިރު، އެހީ ފޯރުކޮށްދޭން ބޭނުންވާ މީހުންނަށް ވަނީ އެ ފުރުސަތު ހުޅުވާލާފައެވެ.
ފެބްރުއަރީ 6 ވަނަ ދުވަހު ތުރުކީވިލާތާއި ސޫރިޔާ ހިއްސާކުރާ ބޯޑަރު ސަރަހައްދަށް، ރެކްޓަރ މިންގަނޑުން 7.8ގެ ބާރު މިނުގައި އައި ވަރުގަދަ ބިންހެލުމުގައި 35000ށްވުރެ ގިނަ މީހުން ވަނީ މަރުވެފައެވެ. އަދި އެތައް އިމާރާތެއް ވެއްޓި އެތައް ބަޔަކު ވަނީ ހާލުގައި ޖެހިފައެވެ.
ތުރުކީއާއި ސޫރިޔާގައި ހާލުގައި ޖެހިފައިވާ ފަރާތްތަކަށް އެހީވުމަށް ބައިނަލްއަގުވާމީ ފެންވަރުގައިވެސް ދަނީ ހަރަކާތްތައްް ކުރިއަށްގެންދަމުންނެވެ.
