މިއަހަރުގެ ފީފާ ކުލަބް ވޯލްޑް ކަޕް މުބާރާތް ސައުދީ އަރަބިއްޔާގައި ބާއްވަން ދުނިޔޭގެ ފުޓުބޯޅައިގެ މައި އިދާރާ (ފީފާ) އިން ނިންމައިފި އެވެ.

މިއަހަރުގެ މުބާރާތް ބޭއްވުމަށް ފީފާ އިން ތާވަލްކޮށްފައި ވަނީ ޑިސެމްބަރު މަހުގެ 12 އިން 22 އަށެވެ. ސައުދީން ދެކޭ ގޮތުގައި ފީފާގެ މިފަދަ ބޮޑު މުބާރާތެއް އެ ޤައުމުގައި ބޭއްވިގެން ދިޔުމަކީ ކުރިއަށް އޮތް ތަނުގައި އެކަމުގެ ފައިދާ އެ ޤައުމުގެ ފިރިހެން އަދި އަންހެން ފުޓުބޯޅަ ޓީމުތަކަށް ކުރާނެ ކަމެކެވެ. ސައުދީގައި މުބާރާތް ބާއްވަން ފީފާގެ ކައުންސިލުން ނިންމާފައިވަނީ އަންގާރަ ދުވަހު އެވެ.

މިކަމާ ގުޅިގެން ސައުދީގެ ސްޕޯޓްސް މިނިސްޓަރު ޕްރިންސް އަބްދުލްއަޒީޒް ބިން ތުރުކީ އަލް ފައިސަލް ވިދާޅުވީ، ސައުދީގައި މުބާރާތް ބޭއްވުމުގެ ޝަރަފު ލިބުނީތީ އެ ޤައުމުން ވަރަށް އުފާވާ ކަމަށާއި، އެކަމުގެ ސަބަބުން ދުނިޔޭގެ ބޮޑެތި މަޝްހޫރު ކުލަބުތަކާއި އެ ކުލަބުތަކުގެ ސަޕޯޓަރުންނަށް ސައުދީ އަށް އާދެވޭނެ ކަމަށާއި، އެކަމަށް މަރުޙަބާ ވިދާޅުވާ ކަމަށެވެ. މީގެ އިތުރުން، ގިނަ ސަޕޯޓަރުން ޤަބޫލު ކުރާ ގޮތުގައި ފުޓުބޯޅައިގައި ސައުދީ އަށް މަތީ ފެންވަރުގައި ވާދަކުރެވޭނެ ކަމަށާއި، ސައުދީގައި އޮތީ ފެންވަރު އޮތް ޓީމެއް ކަމަށެވެ. އެއަށްފަހު މިހާރު ދެން އޮތީ، ސައުދީ އަށް ދުނިޔޭގެ ފެންވަރުގައި މުބާރާތްތައް ބޭއްވޭނެ ކަން ސާބިތުކޮށްދިނުން ކަމަށެވެ. އިތުރަށް އޭނާ ވިދާޅުވީ ސަައުދީން ފުޓުބޯޅަ އަށް އޮންނަ ލޯތްބާއި، އެ ކުޅިވަރަށް ހިތްޖެހިފައި އޮންނަ މިންވަރު ވެސް ދައްކުވައިދޭން ބޭނުންވާ ކަމަށެވެ.

މީގެ އިތުރުން އޭނާ ވިދާޅުވީ މިއަދަކީ ފުޓުބޯޅައިގައި ސައުދީން އެހެން ހަރުފަތަކަށް ދާން ކުރާ މަސައްކަތަށް ލިބުނު ހިތްވަރެއް ކަމަށެވެ. ސައުދީ ފުޓުބޯޅައިގައި މަސައްކަތް ކުރާ އެންމެހައި ފަރާތްތަކަށް ފުރިހަމަ އަށް އިތުބާރު ކުރައްވާކަން ފާހަގަކުރައްވާ އޭނާ ވިދާޅުވީ، ތަފާތު ލެވެލްތަކުގައި ކުރިއެރުންތައް ލިބެމުން އަންނަ މަންޒަރު ވެސް ފެންނަ ކަމަށެވެ. މީގެއިތުރުން ސައުދީން ބައިނަލްއަޤުވާމީ މުބާރާތްތައް ހޯސްޓު ކުރުމުގެ ބޭނުމަކީ، ކުޅިވަރުގެ ބާރުން އެ ޤައުމުގެ ކުޅިވަރުގައި ހަރަކާތްތެރިވާ އަންހެން ކުދިންނާއި ފިރިހެން ކުދިންނަށް އިތުރު ހިތްވަރެއް ލިބިގެންދާތީ ކަމަށެވެ. ހަމައެއާއެކު އެކަމުގެ ސަބަބުން އިތުރު އެހެން ގުޅުންތަކެއް ވެސް އުފެދިގެން ދާތީ ކަމަށެވެ.

ކުލަބް ވޯލްޑް ކަޕް މުބާރާތް ސައުދީގައި ބާއްވަން ނިންމާފައިވާއިރު، 2030 ވަނަ އަހަރުގެ ފީފާ ވޯލްޑް ކަޕް ވެސް އެ ޤައުމުގައި ބޭއްވުމަށް ބިޑު ކުރަން ތައްޔާރުވަމުން އަންނަ ކަމަށް މީޑިއާ ރިޕޯޓުތައް ބުނެ އެވެ.