ރިޔާސީ އިންތިހާބުގައި ވާދަކުރަން އުންމީދުކުރާނެ، އެކަމަކު ގޮތް ނިންމާނީ ކައުންސިލުން: ޖޭޕީ
ޖުމްހޫރީ ޕާޓީގެ ކޮންގްރެސް މިމަހުގެ 24ން 25ށް ބޭއްވުމަށް ވަނީ ނިންމާފައި
އިލްހާމް - ޖުމްހޫރީ ޕާޓީގެ ލީޑަރުގެ އެޑްވައިޒަރު
ޖުމްހޫރީ ޕާޓީގައި ތިއްބެވި ސިޔާސީ ބޭފުޅުން އެ ޕާޓީ ރިޔާސީ އިންތިހާބުގައި ކުރިމަތިލައްވަން އުންމީދުކުރައްވާނެ ކަމަށާއި، ނަމަވެސް އެކަމާގުޅިގެން އަދި އެ ޕާޓީން ގޮތެއް ނިންމާފައި ނުވާކަމަށް އެ ޕާޓީގެ ލީޑަރުގެ އެޑްވައިޒަރު، އިލްހާމް އަހްމަދު ވިދާޅުވެއްޖެއެވެ.
ޖުމްހޫރީ ޕާޓީން އަންގާރަ ދުވަހު ހަވީރު ބޭއްވި ނޫސްވެރިންގެ ބައްދަލުވުމެއްގައި އިލްހާމް ވިދާޅުވީ، ޕާޓީގައި ތިއްބެވި ކައުންސިލް މެންބަރުންނާއި ސިޔާސީގޮތުން ގުޅިފައިވާ ބޭފުޅުންގެވެސް އުންމީދުތަކެއް ވާނެކަމަށާއި، ޖުމްހޫރީ ޕާޓީއަކީ މިއަދު ލީޑަރޝިޕަށް ބަލާއިރު އެންމެ ބޮޑު ލީޑަރޝިޕް އޮތް ޕާޓީކަމަށެވެ. މިއަދު ޖުމްހޫރީ ޕާޓީގެ ސަފުތައް ރުކުރުވާލައިފިނަމަ ރާއްޖޭގެ ސިޔާސީ ދާއިރާގެ އެންމެ ގިނަ މަގާމު އަދާކުރެއްވި ބޭފުޅުން ތިއްބަވާނީ އެ ޕާޓީގައި ކަމަށްވެސް އޭނާ ވިދާޅުވިއެވެ.
އިލްހާމް ވިދާޅުވީ ކަން އެހެން އޮތް ނަމަވެސް ޖުމްހޫރީ ޕާޓީން ރިޔާސީ އިންތިހާބުގައި ވާދަކުރާނެތޯ ނުވަތަ ނޫންތޯ އަދި ޕާޓީން ގޮތެއް ނުނިންމާ ކަމަށެވެ. ޕާޓީން ގޮތެއް ނިންމާނީ އެ ޕާޓީގެ ކޮންގްރެސް ނިމި ކައުންސިލުން ރިޔާސީ ކެނޑިޑޭޓާ ބެހޭ ގޮތުން ބަހުސް ފެށޭ ހިސާބުން ކަމަށެވެ. މިއަދު އެ ޕާޓީ އޮތީ ކޯލިޝަނެއްގެ ތެރޭގައި ކަމަށާއި މިއަދުވެސް އެ ތިއްބެވީ ކޯލިޝަންގެ ފަހަތުގައި ކަމަށް އިލްހާމް ވިދާޅުވިއެވެ.
މީގެ އިތުރުން އަނބުރައި ޕީޕީއެމާ ގުޅިވަޑައިގެންފާނެތޯ ނޫސްވެރިއަކު ދެންނެވި ސުވާލަކަށް ޖަވާބުދެއްވަމުން އިލްހާމް ވިދާޅުވީ، އެ ބޭފުޅުންނަކީ ސިޔާސީ ބޭފުޅުންނަށް ވާތީ ހުރިހާ ޕާޓީއަކާއެކު މަސައްކަތްކުރުމުގެ ފުރުސަތުވެސް އަބަދުވެސް ހުޅުވިފައިވާކަމަށެވެ. އެހެން ނަމަވެސް ޕީޕީއެމަށް ދިއުމުގެ ވިސްނުން ނެތްކަމަށާއި، ކުރެވިފައި އޮތީ މާ ރީތި ތަޖުރިބާއެއް ނޫންކަމަށްވެސް އޭނާ ވިދާޅުވިއެވެ.
ޖުމްހޫރީ ޕާޓީގެ ހަތަރުވަނަ ކޮންގްރެސް މި މަހުގެ 24 ވަނަ ދުވަހުން 25 ވަނަ ދުވަހަށް ބާއްވަން ނިންމައިފައިވާއިރު ރިޔާސީ އިންތިހާބުގައި އެ ޕާޓީން ވާދަކުރޭތޯ ނުވަތަ ނޫންތޯ ނިންމާނީ އެ ކޮންގްރެސްގައި ކަނޑައަޅާ އެ ޕާޓީގެ ކައުންސިލުންނެވެ.
