ބޭރު ގައުމުތަކަށް ދަތުރުކުރާ ދިވެހިންނަށް ރައްކާތެރިކަން ކަށަވަރުކޮށްދިނުމަށް ގޮވާލާ ހުށަހެޅި ކުއްލި މައްސަލަ ބޭރުކޮށްލައިފިއެވެ.

މި މައްސަލަ ހުށަހެޅުއްވީ ނައިފަރު ދާއިރާގެ މެންބަރު އަހުމަދު ޝިޔާމެވެ. މިފަދަ މައްސަލައެއް ޝިޔާމް މަޖިލީހަށް ހުށަހަޅުއްވާފައިވަނީ އޭނާ ނިސްބަތްވެވަޑައިގަންނަވާ ޕީޕީއެމްގެ އިސް ސަފުގައި އިންޑިއާއަށް އައުޓް ގޮވާ، އިންޑިއާގެ ރައްޔިތުންނަށް ފުރައްސާރަކޮށް އިންޑިއާ ސަރުކާރަށް ބަދުބަސް ބުނާ އެކްޓިވިސްޓަކު އިންޑިއާއަށް ދިއުމުން އެގައުމުން ބޭރުކޮށްލާފައިވަނިކޮށެވެ.

މި މައްސަލައިގައި ބުނެފައިވަނީ ރާއްޖެއިން ބޭރުގައި ދިރިއުޅޭ ދިވެހިންނާއި ބޭރު ގައުމުތަކަށް ދަތުރުކުރާ ދިވެހިން ރާއްޖޭގެ ގާނޫނު އަސާސީގެ 27 ވަނަ މާއްދާއިން ލިބިދޭ ހިޔާލު ފާޅުކުރުމުގެ މިނިވަންކަމާއި، 32ވަނަ މާއްދާއިން ލިބިދޭ އެއްވެއް އުޅުމުގެ މިނިވަންކަން ބޭނުން ހިފައިގެން ރައްޖޭގެ ސިޔާދަތު އޮންނަ ސަރަހައްދުގައި ފާޅުކުރާ ހިޔާލަކާ ގުޅިގެން އެ މީހުންނާމެދު ތައައްސުފީ ގޮތެއްގައި ބައެއް ބޭރު ގައުމުތަކުން ފިޔަވަޅު އަޅަމުންދާ ދިއުމާމެދު ކަންބޮޑުވާ ކަމަށެވެ.

ހަމައެފަދައިން ދިވެހިންނާ މެދު ފިޔަވަޅުއަޅާއިރު، ދިވެހި ރައްޔިތުންގެ ހައްގުތައް ކަށަވަރުކޮށް ދިވެހިންގެ ރައްކާތެރިކަން ޔަގީންކުރުމަށް ފިޔަވަޅުތަކެއް ނޭޅުމަކީ، ރާއްޖޭގެ ސަރަހައްދުގެ އެތެރޭގެއާއި އެ ސަރަަހައްދުން ބޭރުގައި ދިވެހިންގެ މިނިވަންކަމާއި ރައްކާތެރިކަން ކަށަވަރުކޮށްދިނުމަށް ދިވެހި ޖުމްހޫރިއްޔާގެ ގާނޫނު އަސާސީން ދިވެހި ދައުލަތަށް މަތިކޮށްފައިވާ ދުސްތޫރީ އަދި އަހުލާގީ ޒިންމާއަށް ހިޔާނަތްތެރިވުން ކަމަށެވެ.

އަދި މިފަދަ ކަންކަމާމެދު އަޅަންޖެހޭ ފިޔަވަޅު ނޭޅި، ދިވެހިންގެ ހައްގުތައް ކަށަވަރުކޮށްނުދެވި ބޭރުގެ ދައުލަތަކުން ތައައްސުފީ ނިންމުންތައް ނިންމުމަށް ދޫކޮށްލެވިއްޖެނަމަ، އެކަމުގެ ރައްދުގައި ރާއްޖޭގައި އެ ގައުމަކާއި އެ ގައުމެއްގެ ރައްޔިތުންނާމެދު ނުރުހުމާއި ނަފުރަތު އުފެދި އެ ނަފުރަތުގެ ޖަޒުބާތުގައި ހިނގައިގެން ނުވާނެ ނުރަނގަޅުކަމެއް ހިނގައިދިއުމުގެ އިހްތިމާލު އޮތުމާއެކު، ދިވެހިން ދެިވހި ފަސްގަނޑުގައި ފާޅުކުރާ ހިޔާލުތަކާއި ގުޅިގެން އެ ހިޔާލު ފާޅުކުރާ މީހުންނަށް ވަކިން އަމާޒުކޮށްގެން ބޭރުގެ ދައުލަތަކުން އެ ދިވެހިންނަށް އަދަބު ދޭން ފަށައިފިނަމަ، އެކަމުގެ ސަބަބުން ގާނޫނު އަސާސީން ކަށަވަރުކޮށްދޭ ހައްގުތައް ބޭނުންކުރުމާއި ނުކުރުމުގެ އިހްތިޔާރު ދިވެހިންގެ އަތުން ބީވެ އެ ހައްގުތައް ލިބުމާއި ނުލިބުން އެހެން ދައުލަތެއްގެ ރުހުމާއި ނުރުހުމުގެ މައްޗަށް ބަރޯސާވުމުގެ ބިރު އެބައޮތް ކަމަށެވެ.

އަދި ދިވެހިރާއްޖެއިން ބޭރުގައި ދިރިއުޅޭ އަދި ރާއްޖެއިން ބޭރު ގައުމުތަކަށް ދަތުރުކުރާ ދިވެހިން ދިވެހި ޖުމްހޫރިއްޔާގެ ގާނޫނު އަސާސީން ކަށަވަރުކޮށްދޭ ހައްގެއް ބޭނން ހިފާފައިވާ ގޮތަކާ ގުޅިގެން ތައައްސުފީ ގޮތެއްގައި ފިޔަވަޅުއަޅައި، އެހެން ދައުލަތަކުން އެ ރައްޔިތުންނަށް އަދަބުދީފިނަމަ އެކަން ހުއްޓުވައި، އެފަދަ ހައްސާސް ކަންކަމުގައި ޑިޕްލޮމެޓިކް އުސޫލުތަކުގެ ތެރެއިން އަޅަންޖެހޭ ފިޔަވަޅުތައް އަޅައި، ކޮންމެ ފަސްގަނޑެއްގައި ތިއްބަސް ދިވެހިންނަށްވީތީ ދިވެހި ދައުލަތުން ފޯރުކޮށްދޭންޖެހޭ ރައްކާތެރިކަން ތަފާތުކުރުމެއް ނެތި ހުރިހާ ދިވެހިންނަށް ލިބޭނެ މަގުން އަމަލުކުރުމަށް ދިވެހި ސަރުކާރަށް ގޮވާލާ ކަމަށެވެ.

ކުއްލި މައްސަލަ ބަލައިގަތުމާއި މެދު ނެގުނު ވޯޓުގައި ބައިވެރިވި 55 މެންބަރުންގެ ތެރެއިން ކުއްލި މައްސަލަ ބަލައިގަތުމަށް ވޯޓުދެއްވީ 6 މެންބަރުންނެވެ. މި ކުއްލި މައްސަލަ ބަލައިގަތުމާއި ދެކޮޅަށް 39 މެންބަރަކު ވޯޓު ދެއްވި އިރު 10 މެންބަރަކު ވޯޓު ނުދެއްވާ ތިއްބެވިއެވެ.