ރަށްތައް ނުހެދި ހުރެފައި ކޮންޓްރެކްޓް ބާތިލްކުރާއިރު ދައުލަތަށް އެއްޗެއް ލިބޭގޮތަށް އެކަން ކުރަންޖެހޭ - މައުސޫމް
ލިކިއުޑޭޓް ޑެމޭޖަސް ހޯދޭތޯ މަސައްކަތް ކުރަންޖެހޭ
ޓޫރިޒަމް މިނިސްޓަރ ޑރ އަބްދުﷲ މައުސޫމް
ފަތުރުވެރިކަމަށް ތަރައްގީކުރުމަށް ދޫކުރާ ރަށްތައް ނުހެދި ހުރެފައި ކޮންޓްރެކްޓް ބާތިލްކުރާއިރު ގެއްލުމުގެ ބަދަލުގައި ދައުލަތަށް އެއްޗެއް ލިބޭގޮތަށް އެކަން ކުރަންޖެހޭ ކަމަށް ޓުއަރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވެއްޖެއެވެ.
އަންގާރަ ދުވަހުގެ ރައްޔިތުންގެ މަޖިލީހުގެ ޖަލްސާގައި ވާހަކަދައްކަވަމުން މިނިސްޓަރު މައުސޫމް ވިދާޅުވީ އެންމެ ބޮޑު އިންޑަސްޓްރީގައި އެތައް ރަށްތަކެއް ނުހެދި ހުންނަ އިރު، ސަރުކާރުން ރަށެއް ވަކިކޮށްލީމަ ކޯޓަށް ގޮސްގެން ބޮޑެތި ބަދަލުތައް ރައްޔިތުންގެ ފައިސާއިން ދޭންޖެހޭ ކަމަށެވެ. އެހެންކަމުން އެގްރީމެންޓުގައި ދެންހުރި ބައިން ދައުލަތަށް އެއްޗެއް ހޯދައިދޭންޖެހޭ ކަމަށާއި، ރައްޔިތުންގެ ހައްގުގައި މަަސައްކަތްތަކެއް ކޮށްދޭންޖެހޭ ކަމަށް ގަބޫލުކުރައްވާ ކަމަށެވެ.
މިނިސްޓަރު ވިދާޅުވީ އެކަމަކީ ވިސްނާފައި އޮތް ކަމެއް ކަމަށާއި، ލިކިއުޑޭޓް ޑެމޭޖަސް ހޯދޭތޯ މަސައްކަތް ކުރަންޖެހޭ ކަމަށެވެ. އަދި އެ މަސައްކަތް ކުރިއަށް ގެންދާނެ ކަމަށް މިނިސްޓަރު ވިދާޅުވިއެވެ. މިނިސްޓަރު ވިދާޅުވީ ރިސޯޓެއް ނުހެދި އޮތުމުން ދައުލަތަށް ލިބެންޖެހޭ އެއްޗެއް ގެއްލޭ ކަމަށެވެ. އެއްކަމަކީ އެ ސަރަހައްދެއްގެ އިގްތިސާދީ ތަރައްގީ ކަމަށާއި، ހާއްސަކޮށް އެއަރޕޯޓުތައް މުޅި ރާއްޖޭގައި ތަރައްގީކުރެވިގެންދާއިރު، އެއަރޕޯޓްތައް އަވަހަށް ދަތުރުކުރަން އެބަ ބޭނުންވާ ކަމަށެވެ. އެހެންނަމަވެސް އެ ތަރައްގީ ނުވާ ކަމަށާއި، ދެން އެ ސަރަހައްދެއްގެ އިގްތިސާދީ ހަރަކާތްތަކެއްވެސް ނުހިނގާ ކަމަށެވެ.
މީގެ އިތުރުން ދައުލަތަށް ލިބެންޖެހޭ ޓެކްސް ނުލިބޭ އިރު، ޒުވާނުންނަށް ވަޒީފާ ވެސް ނުލިބޭ ކަމަށެވެ. އެހެންވީމާ މިކަންކަމަކީ ކޮންމެހެންވެސް ވިސްނާފައި، ލިކިއުޑޭޓްސް ޑެމޭޖްގެ ބައެއް ކޮންޓްރެކްޓުގައި ހިމެމުން ވަރަށް މުހިންމު ކަމެއް ކަމަށް މިނިސްޓަރު ވިދާޅުވިއެވެ.
